അഭിപ്രായമില്ലെങ്കിൽ ഒ.ടി.ടി.ക്കും വേണ്ട; ഗ്രാഫ് താഴ്ന്ന് മലയാള സിനിമയുടെ ഒ.ടി.ടി. കച്ചവടം

2024-ൽ ഇതുവരെ മലയാളത്തിൽ 120 ചിത്രങ്ങൾ എത്തിയതിൽ 50 ശതമാനത്തിന്റേയും ഒ.ടി.ടി. വ്യാപാരം തീരുമാനമായിട്ടില്ല. ഇതിൽ മുൻനിര നടന്മാരുടെ ചിത്രങ്ങളും ഉൾപ്പെടുന്നു. പ്രേക്ഷക അഭിപ്രായമില്ലാത്ത ചിത്രങ്ങൾക്ക് ചെറിയ തുക നൽകാനേ കമ്പനികൾ തയ്യാറാകുന്നുള്ളൂ.

അങ്ങനെ നൽകാൻ പല നിർമാതാക്കളും ഒരുക്കമല്ല. കഴിഞ്ഞവർഷം മലയാള സിനിമയെ വലിയ നഷ്ടത്തിൽനിന്ന് രക്ഷപ്പെടുത്താൻ ഒ.ടി.ടി. വലിയപങ്ക് വഹിച്ചിരുന്നു. 2023-ൽ മലയാളത്തിൽ 220 സിനിമകൾ ഇറങ്ങിയതിൽ 14 എണ്ണം മാത്രമേ തിയേറ്ററിൽ വിജയം നേടിയുള്ളൂ. മൊത്തം സിനിമകളുടെ 70 ശതമാനത്തിന്റേയും ഒ.ടി.ടി. കച്ചവടം നടന്നതുകൊണ്ടാണ് വലിയ നഷ്ടമില്ലാതെ പോയത്.

കോടിയിൽനിന്ന് ലക്ഷത്തിലേക്ക്

അത്യാവശ്യം അറിയപ്പെടുന്ന അഭിനേതാക്കളോ സംവിധായകരോ ഉള്ള ചിത്രങ്ങൾക്ക് രണ്ട്, മൂന്ന് കോടിവരെ നേരത്തെ ഒ.ടി.ടി. കമ്പനികൾ നൽകാൻ തയ്യാറായിരുന്നു. എന്നാലിപ്പോൾ 50-75 ലക്ഷത്തിലേക്ക് ചുരുങ്ങി. മുൻനിര നടന്മാരുടെ ചിത്രങ്ങളെ ഇതൊന്നും ബാധിച്ചിട്ടില്ല. അവയൊക്കെ സിനിമ തിയേറ്ററിലെത്തുംമുൻപേ ഒ.ടി.ടി. കച്ചവടം തീരുമാനിക്കും. കച്ചവടം അറിയാവുന്ന നിർമാതാക്കൾ സിനിമയുടെ പ്രാരംഭപ്രവർത്തനങ്ങളിൽത്തന്നെ വില്പന സാധ്യതകളും കണ്ടെത്താൻ ശ്രമിക്കും. അത്തരത്തിൽ പ്രീ ബിസിനസിൽ ചില ചിത്രങ്ങൾ വിറ്റുപോകുന്നു. അവ തിയേറ്ററിൽ പരാജയപ്പെട്ടാലും നിർമാതാവിന് ഒ.ടി.ടി. തുകയിൽ നഷ്ടം വരില്ല.

മലയാളത്തിൽ അത്യാവശ്യം താരമൂല്യമുള്ള അഞ്ച് നടന്മാരുടെ കഴിഞ്ഞ ഒരു വർഷത്തിനിടെ റിലീസായ ഓരോ ചിത്രങ്ങൾ ഇതുവരെയും കച്ചവടമായിട്ടില്ല. ഇപ്പോഴും കമ്പനികളുമായി ചർച്ചകൾ നടക്കുന്നതേയുള്ളൂ.