സ്വർണവില വീണ്ടും മലക്കംമറിഞ്ഞു; കേരളത്തിൽ വൻ ഇടിവ്, വഴിയൊരുക്കി ‘അമേരിക്കൻ പലിശ’

ഇന്നലെ തിരിച്ചുകയറ്റത്തിന്റെ സൂചന നൽകി മുന്നേറിയ സ്വർണവില ഇന്നു പൊടുന്നനേ മലക്കംമറിഞ്ഞു. കേരളത്തിൽ ഗ്രാമിന് 175 രൂപ കുറഞ്ഞ് 11,045 രൂപയും പവന് 1,400 രൂപ ഇടിഞ്ഞ് 88,360 രൂപയുമായി.

ഇന്നലെ രാവിലെയും ഉച്ചയ്ക്കുമായി ഗ്രാമിന് 145 രൂപയും പവന് 1,160 രൂപയും കൂടിയിരുന്നു. യുഎസ് കേന്ദ്രബാങ്കായ ഫെഡറൽ റിസർവ് അടിസ്ഥാന പലിശനിരക്ക് കുറച്ചിട്ടും സ്വർണവില ഇന്ന് ഇടിയുകയായിരുന്നു.
പൊതുവേ യുഎസിൽ പലിശനിരക്ക് കുറയുമ്പോൾ സ്വർണവില കൂടാറാണ് പതിവ്.

ഇക്കുറി കടകവിരുദ്ധമായി വിലതാഴ്ന്നു. അതിന്റെ കാരണം ഇങ്ങനെ:
∙ പലിശനിരക്ക് കാൽ ശതമാനം കുറച്ചെങ്കിലും ഇനിയുള്ള യോഗങ്ങളിൽ ഇളവ് പ്രതീക്ഷിക്കേണ്ടെന്ന് ഫെഡറൽ റിസർവ് വ്യക്തമാക്കി.
∙ പലിശനിരക്ക് കുറയുമ്പോൾ ഡോളർ ദുർബലമാകുകയും സ്വർണത്തിന്റെ ഡിമാൻഡ് കൂടുകയും വില കുതിക്കുകയും ചെയ്യും.

ഇനി തൽക്കാലം ഇതിനുള്ള സാധ്യത മങ്ങിയതോടെ സ്വർണനിക്ഷേപ പദ്ധതികളിൽ ലാഭമെടുപ്പ് തകൃതിയായി, വിലയിടിഞ്ഞു.
∙ യുഎസ് ഡോളർ ഇൻഡക്സും യുഎസ് ട്രഷറി യീൽഡും (ഗവൺമെന്റ് കടപ്പത്ര ആദായനിരക്ക്) മെച്ചപ്പെട്ടതും സ്വർണത്തിന് തിരിച്ചടിയായി.
ഔൺസിന് 38 ഡോളർ താഴ്ന്ന് 3,949.22 ഡോളറിലാണ് ഇപ്പോൾ രാജ്യാന്തര വിലയുള്ളത്. കേരളത്തിൽ ഇന്ന് 18 കാരറ്റ് സ്വർണവില ഗ്രാമിന് 155 രൂപ കുറഞ്ഞ് 9,120 രൂപയിലെത്തി.

വെള്ളിവില ഗ്രാമിന് 2 രൂപ താഴ്ന്ന് 158 രൂപ. മറ്റൊരു വിഭാഗം ജ്വല്ലറികൾ 18 ഗ്രാം സ്വർണത്തിന് ഇന്നു നിശ്ചയിച്ച വില 150 രൂപ കുറച്ച് 9,080 രൂപയാണ്; വെള്ളിവില 155 രൂപയിൽ നിലനിർത്തി.

7,080 രൂപയാണ് 14 കാരറ്റ് സ്വർണം ഗ്രാമിന് വില; 9 കാരറ്റിന് 4,590 രൂപ.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
… FacebookTwitterWhatsAppTelegram