ഒരു അധികാരവുമില്ല! ട്രംപിന്റെ തീരുവ യുദ്ധം തോൽവിയിലേക്ക്? സുപ്രീം കോടതിയിലും തോറ്റാൽ ട്രംപ് എന്തു ചെയ്യും?

യുഎസ് പ്രസിഡന്റ് എന്ന നിലയിൽ മറ്റു രാജ്യങ്ങൾക്കുമേൽ ഏകപക്ഷീയമായി പകരംതീരുവ പ്രഖ്യാപിക്കാൻ ട്രംപിന് ഒരധികാരവുമില്ലെന്ന് അപ്പീൽ കോടതി വ്യക്തമാക്കിയതോടെ, ദുർബലമായി ട്രംപ് ഭരണകൂടത്തിന്റെ വ്യാപാരനയം. അപ്പീൽ കോടതി വിധി അമേരിക്കയ്ക്ക് ഗുരുതരമായ നയതന്ത്ര നാണക്കേടുണ്ടാക്കുമെന്നായിരുന്നു ട്രഷറി സെക്രട്ടറി സ്കോട് ബെസ്സന്റിന്റെ പ്രതികരണം.

അപ്പീൽ കോടതിയുടെ വിധി നടപ്പായാൽ അത് അമേരിക്കയ്ക്ക് വൻ ദുരന്തമാകുമെന്ന് ട്രംപും പ്രതികരിച്ചു.
അതേസമയം, സുപ്രീം കോടതിയെ സമീപിക്കുമെന്ന് ട്രംപ് വ്യക്തമാക്കിയതിനാൽ ഒക്ടോബർ 14 വരെ വിധി അപ്പീൽ കോടതി സ്റ്റേ ചെയ്തിട്ടുണ്ട്. ഇനി സുപ്രീം കോടതിയും ട്രംപിന്റെ താരിഫുകൾ നിയമവിരുദ്ധമാണെന്ന് വിധിച്ചാൽ ട്രംപ് എന്തു ചെയ്യും? അദ്ദേഹം ഇന്ത്യയ്ക്കുമേൽ ഉൾപ്പെടെ പ്രഖ്യാപിച്ച തീരുവകളെല്ലാം അസാധുവാകുമോ?
ദേശീയ അടിയന്തരാവസ്ഥ!
കഴിഞ്ഞ ഏപ്രിൽ 2നാണ് ‘ലിബറേഷൻ ഡേ’ പ്രഖ്യാപനവുമായി ട്രംപ്, താരിഫ് ആയുധം ഏതാണ്ടെല്ലാ രാജ്യങ്ങൾക്കുംമേൽ തൊടുത്തത്.

ഇന്റർനാഷനൽ എമർജൻസി ഇക്കണോമിക് പവേഴ്സ് ആക്ട് (ഐഇഇപിഎ) പ്രകാരം നാഷനൽ എമർജൻസി പ്രഖ്യാപിച്ചുകൊണ്ടായിരുന്നു ഇത്. മറ്റു രാജ്യങ്ങളുമായുള്ള വ്യാപാരത്തിൽ അമേരിക്കയ്ക്കുള്ള കനത്ത വ്യാപാരക്കമ്മി കുറയ്ക്കുക, യുഎസിൽ ഫാക്ടറികൾ സ്ഥാപിക്കാനും ഉൽപാദനം നടത്താനും കമ്പനികളെ നിർബന്ധിതരാക്കുക, യുഎസ് ഉൽപന്നങ്ങൾക്കുമേൽ ഇന്ത്യ ഉൾപ്പെടെ ചുമത്തുന്ന കനത്ത ഇറക്കുമതി തീരുവ കുറയ്ക്കാൻ സമ്മർദം ചെലുത്തുക തുടങ്ങിയ ലക്ഷ്യങ്ങളോടെയായിരുന്നു ട്രംപിന്റെ തീരുവ പ്രഖ്യാപനങ്ങൾ.
യുഎസിലേക്കുള്ള എല്ലാ ഇറക്കുമതിക്കും 10% അടിസ്ഥാന തീരുവയ്ക്ക് പുറമെ ഓരോ രാജ്യത്തിനും പ്രത്യേകം തീരുവയുമാണ് ട്രംപ് പ്രഖ്യാപിച്ചത്.

ഇതിൽ 10% അടിസ്ഥാന തീരുവയും ചൈന, മെക്സിക്കോ, കാനഡ എന്നിവയ്ക്കുമേൽ പ്രഖ്യാപിച്ച പ്രത്യേക തീരുവയും (ട്രാഫിക്കിങ് താരിഫ്), മറ്റ് രാജ്യങ്ങൾക്കുമേൽ ചുമത്തിയ 50% വരെ തീരുവയുമാണ് അപ്പീൽ കോടതി നിയമവിരുദ്ധമാണെന്ന് വിധിച്ചത്.
ചൈന, മെക്സിക്കോ, കാനഡ എന്നിവയ്ക്കുമേൽ അനധികൃത കുടിയേറ്റം, മയക്കുമരുന്ന് കടത്ത് എന്നിവ ആരോപിച്ചായിരുന്നു ട്രംപ് കനത്ത തീരുവ പ്രഖ്യാപിച്ചത്. എന്നാൽ, ഇത്തരം പ്രശ്നങ്ങൾക്കെതിരെ തീരുവ ചുമത്തി നടപടിയെടുക്കാൻ പ്രസിഡന്റിന് അധികാരമില്ലെന്ന് അപ്പീൽ കോടതി വ്യക്തമാക്കി.
ട്രംപ് ഇനി എന്തു ചെയ്യും?
സുപ്രീം കോടതിയിലും തിരിച്ചടി നേരിട്ടാൽ ട്രംപ് ഭരണകൂടത്തിന് അതു വൻ ആഘാതമാകും.

ചൈന, ഇന്ത്യ, യൂറോപ്യൻ യൂണിയൻ, കാനഡ, യുകെ തുടങ്ങി പ്രധാന രാജ്യങ്ങളുമായി എല്ലാം ഇനിയും വ്യാപാരക്കരാർ ചർച്ചകൾ യുഎസിന് തുടരേണ്ടതുണ്ട്. കോടതി വിധി എതിരായാൽ ചർച്ചകളിൽ യുഎസിന് ഇപ്പോഴുള്ള മുൻതൂക്കവും കരുത്തും നഷ്ടമാകും.

ട്രംപിന്റെ സമ്മർദതന്ത്രങ്ങളുടെ മുനയൊടിയും.
∙ ഇറക്കുമതി തീരുവ പ്രഖ്യാപിക്കാൻ പ്രസിഡന്റിന് അധികാരമുണ്ടെന്ന് ട്രംപ് ഭരണകൂടം ചൂണ്ടിക്കാട്ടുന്നുണ്ട്. എന്നാൽ, 1974ലെ ട്രേഡ് ആക്ട് പ്രകാരം പരമാവധി 15% തീരുവ ചുമത്താനേ പ്രസിഡന്റിന് അധികരമുള്ളൂ; അതും 150 ദിവസത്തേക്കു മാത്രം. 
∙ അതായത്, സുപ്രീം കോടതിയിലും തിരിച്ചടിയുണ്ടായാൽ താരിഫ് നിരക്കുകൾ വെറും 15 ശതമാനത്തിലേക്ക് താഴ്ത്താൻ ട്രംപ് നിർബന്ധിതനാകും.

നിലവിൽ 50% തീരുവ ഉൾപ്പെടെ നേരിടുന്ന ഇന്ത്യയ്ക്കുൾപ്പെടെ അത് വൻ നേട്ടമാകും.
∙ അപ്പീൽ കോടതി വിധിക്കെതിരെ ട്രംപ് കടുത്ത ഭാഷയിൽ പ്രതികരിച്ചിരുന്നു. വിധി നടപ്പായാൽ അത് അമേരിക്കൻ സമ്പദ്‍വ്യവസ്ഥയ്ക്ക് ദുരന്തമാകുമെന്നാണ് അദ്ദേഹം സാമൂഹിക മാധ്യമത്തിൽ കുറിച്ചത്.
∙ ജൂലൈ വരെ മാത്രം ട്രംപിന്റെ താരിഫ് നയംവഴി യുഎസ് ട്രഷറിയിലേക്ക് 159 ബില്യൻ ഡോളറിന്റെ വരുമാനം എത്തിയിരുന്നു.

ഏകദേശം 14 ലക്ഷം കോടി രൂപ.
∙ അതേസമയം ട്രംപ് സ്റ്റീൽ, അലുമിനിയം, ചെമ്പ്, വാഹനം എന്നിവയ്ക്കുമേൽ പ്രഖ്യാപിച്ച 25-50% തീരുവയ്ക്ക് അപ്പീൽ കോടതി വിധി ബാധകമല്ല.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
…