സ്വർണത്തിൽ ഉച്ചയ്ക്കും വൻ വീഴ്ച; പവൻ 95,000ന് താഴെയെത്തി, രാജ്യാന്തര വില ഉയരുന്നു

സ്വർണവില കേരളത്തിൽ ഇന്ന് ഉച്ചയ്ക്കും താഴ്ന്നു. ഗ്രാമിന് 60 രൂപ കുറഞ്ഞ് വില 11,865 രൂപയായി.

480 രൂപ താഴ്ന്ന് 94,920 രൂപയാണ് പവൻവില. രാവിലെ പവന് 240 രൂപയും ഗ്രാമിന് 30 രൂപയും കുറഞ്ഞിരുന്നു.

രാജ്യാന്തര വിപണിയിൽ വില കുറഞ്ഞതും ഡോളറിനെതിരെ രൂപയുടെ മൂല്യം അൽപം മെച്ചപ്പെട്ടതുമാണ് കേരളത്തിൽ ഉച്ചയ്ക്കും സ്വർണവില താഴാൻ വഴിയൊരുക്കിയത്. 
എന്നാൽ, രാജ്യാന്തര വില വീണ്ടും കരകയറ്റം തുടങ്ങിയിട്ടുണ്ട്. ഔൺസിന് രാവിലെ വില 4,200 ഡോളറിന് താഴെയായിരുന്നു.

ഇപ്പോൾ 20 ഡോളർ മെച്ചപ്പെട്ട് 4,208 ഡോളറിലേക്ക് തിരിച്ചുകയറിയിട്ടുണ്ട്. ഇതേ ട്രെൻഡാണ് തുടരുന്നതെങ്കിൽ‌ കേരളത്തിലും വില തിരിച്ചുകയറിയേക്കാം.
പലിശയും സ്വർണവും
യുഎസിൽ അടിസ്ഥാന പലിശനിരക്ക് കുറയുമെന്നത് സംബന്ധിച്ച പ്രതീക്ഷകൾക്ക് മങ്ങലേറ്റതായിരുന്നു നേരത്തേ രാജ്യാന്തരവിലയെ താഴേക്കുനയിച്ചത്.

എന്നാലിപ്പോൾ, വില വീണ്ടും കൂടുന്ന ട്രെൻഡാണ് കാണുന്നത്. നേരത്തേ വിലകുറഞ്ഞത് മുതലെടുത്തുള്ള വാങ്ങൽതാൽപര്യം ഉയർന്നതും സ്വർണത്തെ മുന്നോട്ടുനയിച്ചു.
യുഎസ് കേന്ദ്രബാങ്കായ ഫെഡറൽ റിസർവ് നാളെ പ്രഖ്യാപിക്കുന്ന പണനയത്തിൽ അടിസ്ഥാന പലിശനിരക്ക് കാൽ ശതമാനം (0.25%) കുറച്ചേക്കും.

പലിശനിരക്ക് കുറയുന്നത് പൊതുവേ സ്വർണത്തിന് നേട്ടമാകും. കാരണം, പലിശ താഴുന്നതിന് ആനുപാതികമായി യുഎസിലെ ബാങ്ക് പലിശനിരക്ക്, ട്രഷറി യീൽഡ് എന്നിവ കുറയുകയും ഡോളർ ദുർബലമാകുകയും ചെയ്യും.

ഇതു ഫലത്തിൽ സ്വർണത്തിനാണ് നേട്ടമാവുക.
18 കാരറ്റും വെള്ളിയും
കേരളത്തിൽ 18 കാരറ്റ് സ്വർ‌ണവില ഗ്രാമിന് ഉച്ചയ്ക്ക് 50 രൂപ താഴ്ന്ന് 9,815 രൂപയായി. വെള്ളിക്ക് ഉച്ചയ്ക്കും വില മാറ്റമില്ല; ഗ്രാമിന് 192 രൂപ.

ചില ജ്വല്ലറികൾ 18 കാരറ്റ് സ്വർണത്തിന് നൽകിയ വില ഗ്രാമിന് 45 രൂപ കുറച്ച് 9,760 രൂപയാണ്. വെള്ളിക്ക് വില മാറ്റിയില്ല.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
… FacebookTwitterWhatsAppTelegram