കൊച്ചിയിൽ വിദേശത്ത് ജോലി ചെയ്യുന്നതിന് ജാമ്യ വ്യവസ്ഥയിൽ ഇളവ് തേടിയ മുൻ ഡിജിപി ടോമിൻ ജെ. തച്ചങ്കരിക്ക് എതിരെ വീണ്ടും ഹൈക്കോടതിയുടെ രൂക്ഷ വിമർശനം.
കേസിൽ ശിക്ഷിച്ചിട്ടും തച്ചങ്കരി ഒരു ദിവസം പോലും ജയിലിൽ കിടന്നിട്ടില്ലെന്നും ആശുപത്രിയിൽ പോയി സുഖമായി കിടക്കുകയാണെന്നും കോടതി വ്യക്തമാക്കി. തച്ചങ്കരിയുടെ ശിക്ഷാ സമയത്തെ മെഡിക്കൽ റിപ്പോർട്ട് കോടതി നിർദേശ പ്രകാരം ജയിൽ സൂപ്രണ്ട് ഇന്ന് സമർപ്പിച്ചിരുന്നു.
ഹൃദയ സംബന്ധമായ അസുഖങ്ങളും ബൈപാസ് ശസ്ത്രക്രിയ നടത്തിയതും അടക്കമുള്ള വിവരങ്ങൾ ഈ റിപ്പോർട്ടിലുണ്ട്. മെഡിക്കൽ രേഖകൾ ചൂണ്ടിക്കാട്ടി, ഇത്രയും ഗുരുതര അസുഖങ്ങളുള്ള ആൾ എങ്ങനെയാണ് വിദേശത്ത് ജോലിക്കു പോകുന്നതെന്ന് ജസ്റ്റിസ് എ.
ബദറുദീൻ വാക്കാൽ ആരാഞ്ഞു. തുടർന്നാണ് കോടതി തച്ചങ്കരിയുടെ ജയിൽ വാസത്തെക്കുറിച്ച് വിമർശനം ഉന്നയിച്ചത്.
ജയിലിൽ ചെന്നാൽ അവിടെ കിടക്കാതിരിക്കാൻ വേണ്ടി ആശുപത്രിയിൽ കിടക്കും. ജയിലിൽനിന്ന് ഇറങ്ങിയാൽ പൂർണ ആരോഗ്യവാനാണ്.
ഇത് അനുവദിക്കാനാകില്ല. അഡ്മിഷൻ തീയതി മുതൽ റിലീസ് തീയതി വരെ അദ്ദേഹം ആശുപത്രിയിൽ അഡ്മിറ്റ് ആയിരുന്നു.
ഒരു ദിവസം പോലും ജയിലിൽ കിടന്നിട്ടില്ല. ആശുപത്രിയിൽ പോയി സുഖമായി കിടക്കും.
അവിടെ ചെന്നാൽ രോഗം, ഇവിടെ വരുമ്പോൾ ഒരു രോഗവുമില്ല. ദുബായിൽ പോകണം, ജോലി ചെയ്യണം.
കോടതിക്ക് മുമ്പിൽ നുണകൾ ആവർത്തിക്കരുത്. ഇത്തരത്തിലുള്ള രീതികൾ ഗൗരവമായി എടുക്കുമെന്നും ഇതാണ് നിലപാടെങ്കിൽ ജാമ്യം റദ്ദാക്കാനുള്ള നടപടികളിലേക്കു പോകേണ്ടി വരുമെന്നും കോടതി മുന്നറിയിപ്പ് നൽകി.
മെഡിക്കൽ രേഖകൾ പരിശോധിച്ചതിനു ശേഷം വിശദമായി വാദം കേൾക്കാമെന്ന് കോടതി അറിയിച്ചു. കേസ് വീണ്ടും ഈ മാസം 12ന് പരിഗണിക്കും.
2003 മുതൽ 2007 വരെയുള്ള കാലത്ത് ഔദ്യോഗിക പദവിയിലിരിക്കെ അനധികൃത സ്വത്ത് സമ്പാദിച്ചു എന്ന കേസിൽ കോട്ടയം വിജിലൻസ് കോടതി തച്ചങ്കരിക്ക് 4 വർഷം കഠിന തടവും 30.84 ലക്ഷം രൂപ പിഴയും വിധിച്ചിരുന്നു. പിന്നീട് ഹൈക്കോടതി ശിക്ഷ മരവിപ്പിച്ച് തച്ചങ്കരിക്ക് ജാമ്യം അനുവദിക്കുകയാണുണ്ടായത്.
ഇതിനിടയിലാണ്, താൻ ഒരു ജ്വല്ലറി ഗ്രൂപ്പിൽ ജോലി ചെയ്യുന്നുണ്ടെന്നും ഇതിനായി ദുബായിലേക്ക് പോകാൻ ജാമ്യ വ്യവസ്ഥയിൽ ഇളവ് വേണമെന്നും ആവശ്യപ്പെട്ട് തച്ചങ്കരി ഹൈക്കോടതിയെ സമീപിച്ചത്. ജയിലിൽ പോകുമ്പോൾ ഗുരുതര രോഗവും പുറത്തിറങ്ങിയാൽ സുഖവാസവുമാണ് പലരുടെയും രീതിയെന്ന് കോടതി നേരത്തേ കേസ് പരിഗണിച്ചപ്പോഴും വിമർശിച്ചിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
