ജർമ്മനിയിൽ നിന്നുള്ള വിദ്യാർത്ഥികളുടെയും അധ്യാപകരുടെയും സംഘം തിരുവനന്തപുരത്ത് എത്തിച്ചേർന്നു. തിരുവനന്തപുരം ക്രൈസ്റ്റ് നഗർ ഇന്റർനാഷണൽ സ്കൂളിൽ (CNIS) സംഘടിപ്പിച്ചിരിക്കുന്ന അന്താരാഷ്ട്ര സാംസ്കാരിക വിനിമയ പരിപാടിയുടെ ഭാഗമായാണ് ഈ സന്ദർശനം.
ജർമ്മനിയിലെ വെറ്റ്ഹൗസണിലുള്ള സെന്റ് തോമസ് ജിംനേഷ്യം (St. Thomas Gymnasium) സ്കൂളിൽ നിന്നുള്ള 21 വിദ്യാർത്ഥികളും മൂന്ന് അധ്യാപകരുമാണ് സംഘത്തിലുള്ളത്.
ഇരു വിദ്യാലയങ്ങളും തമ്മിലുള്ള പരസ്പര സൗഹൃദവും സാംസ്കാരിക ധാരണയും വളർത്തിയെടുക്കുക എന്ന ലക്ഷ്യത്തോടെയാണ് ഈ പരിപാടി ആസൂത്രണം ചെയ്തിരിക്കുന്നത്. ഇന്ത്യൻ, ജർമ്മൻ സംസ്കാരങ്ങളുടെ വിവിധ വശങ്ങൾ അടുത്തറിയുന്നതിനും പഠിക്കുന്നതിനുമായി ഇരു സ്കൂളുകളിലെയും വിദ്യാർത്ഥികൾ സംയുക്തമായി വിവിധ പ്രോജക്ടുകളിൽ പങ്കാളികളാകുന്നുണ്ട്.
ഈ സാംസ്കാരിക വിനിമയ പരിപാടിയുടെ ആദ്യഘട്ടം 2026 ഏപ്രിൽ മാസത്തിലാണ് നടന്നത്. ഏപ്രിൽ 17 മുതൽ 28 വരെ ക്രൈസ്റ്റ് നഗർ ഇന്റർനാഷണൽ സ്കൂളിലെ 22 വിദ്യാർത്ഥികൾ രണ്ട് അധ്യാപകരോടൊപ്പം ജർമ്മനിയിലെ പങ്കാളി സ്കൂൾ സന്ദർശിച്ചിരുന്നു.
ഇതിന്റെ രണ്ടാം ഘട്ടത്തിന്റെ ഭാഗമായാണ് ജർമ്മൻ സ്കൂളിലെ പ്രിൻസിപ്പലും രണ്ട് അധ്യാപകരും അടങ്ങുന്ന സംഘം 2026 നവംബർ 2 മുതൽ 12 വരെ തിരുവനന്തപുരത്ത് സന്ദർശനം നടത്തുന്നത്. വ്യത്യസ്ത സംസ്കാരങ്ങൾ നേരിട്ട് അനുഭവിച്ചറിയാനും പുതിയ ആചാരങ്ങളെയും പാരമ്പര്യങ്ങളെയും മനസ്സിലാക്കാനും ഭാഷാസാംസ്കാരിക വൈവിധ്യങ്ങളെ ആദരിക്കാനും വിദ്യാർത്ഥികൾക്ക് ഈ പരിപാടി മികച്ച അവസരമാണ് ഒരുക്കുന്നത്.
ജർമ്മനിയിൽ നിന്നെത്തിയ വിദ്യാർത്ഥികളെയും അധ്യാപകരെയും ക്രൈസ്റ്റ് നഗർ ഇന്റർനാഷണൽ സ്കൂൾ ഹൃദയപൂർവ്വം സ്വാഗതം ചെയ്തു. ഇരു വിദ്യാലയങ്ങളും തമ്മിലുള്ള സൗഹൃദബന്ധം കൂടുതൽ ദൃഢമാക്കുന്നതിനും വിദ്യാർത്ഥികൾക്ക് അവിസ്മരണീയവും വിജ്ഞാനപ്രദവുമായ അനുഭവങ്ങൾ സമ്മാനിക്കുന്നതിനും ഈ സാംസ്കാരിക വിനിമയ പരിപാടി സഹായകമാകുമെന്ന് സ്കൂൾ പ്രത്യാശിക്കുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
