തെന്മലയിലെ വിവാദ റേഷനരി ഒരുവകയ്ക്കും കൊള്ളില്ലെന്ന് സപ്ലൈകോ ക്വാളിറ്റി കൺട്രോൾ വിഭാഗത്തിന്റെ പുതിയ റിപ്പോർട്ട്

തിരുവനന്തപുരം ∙ റിപ്പോർട്ടുകളിലെ വൈരുദ്ധ്യങ്ങളിലൂടെ വിവാദമായ 7166 കിലോഗ്രാം റേഷനരിയുടെ കാര്യത്തിൽ ഒടുവിൽ ഔദ്യോഗിക തീരുമാനം പുറത്തുവന്നു. പുനലൂർ തെന്മല അച്ചൻകോവിലിലെ രണ്ട് റേഷൻ കടകളിലെ കേടായ അരി പൂർണ്ണമായും ഉപയോഗശൂന്യമാണെന്നാണ് സപ്ലൈകോയുടെ ക്വാളിറ്റി കൺട്രോൾ വിഭാഗം ജില്ലാ സപ്ലൈ ഓഫിസർക്ക് സമർപ്പിച്ച പുതിയ റിപ്പോർട്ടിൽ വ്യക്തമാക്കിയിരിക്കുന്നത്.

അരിയുടെ പരിശോധനാഫലത്തിലെ അപാകതകൾ നേരത്തെ മാധ്യമങ്ങളിൽ പുറത്തുവന്നിരുന്നു. തുടക്കത്തിൽ, ഈ 7166 കിലോ അരി കാലിത്തീറ്റയ്ക്കു മാത്രമെ ഉപയോഗിക്കാൻ കഴിയൂ എന്നായിരുന്നു ജൂലൈ 13 ലെ ആദ്യ റിപ്പോർട്ടിൽ ചൂണ്ടിക്കാണിച്ചിരുന്നത്.

എന്നാൽ പിന്നീട് നിലപാട് മാറ്റിയ ഇതേ ക്വാളിറ്റി കൺട്രോൾ വിഭാഗം, ഇതിൽ മോശമായ 4850 കിലോ അരി മില്ലിൽ യന്ത്രസഹായത്തോടെ വൃത്തിയാക്കിയാൽ (മിൽ ക്ലീനിങ്) റേഷൻ കാർഡ് ഉടമകൾക്ക് വിതരണം ചെയ്യാമെന്ന് ഓഗസ്റ്റ് 10 നു മറ്റൊരു റിപ്പോർട്ടും നൽകി. വൃത്തിയാക്കാനായി കൊണ്ടുപോയ ഇത്രയും വലിയ അളവിലുള്ള അരി തിരിച്ചെത്തിയപ്പോൾ വെറും 2750 കിലോയായി ചുരുങ്ങി.

മാത്രമല്ല, കൊണ്ടുപോയ പച്ചരിയും പുഴുക്കലരിയും കുത്തരിയും പരസ്പരം കൂട്ടിക്കലർത്തിയ നിലയിലാണ് തിരിച്ചെത്തിയതെന്നും പുതിയ റിപ്പോർട്ടിൽ വ്യക്തമാക്കുന്നുണ്ട്. തിരുവല്ല കുന്നന്താനത്തെ മില്ലിൽ നിന്നും തിരികെയെത്തിക്കുന്ന അരി കർശന പരിശോധനയ്ക്ക് ശേഷമേ വിതരണം ചെയ്യാവൂ എന്നായിരുന്നു നിർദ്ദേശം നൽകിയിരുന്നത്.

ഈ അരി ബന്ധപ്പെട്ട റേഷൻ കടകളിൽ ഇറക്കാൻ ശ്രമം നടന്നുവെങ്കിലും പ്രദേശവാസികൾ ശക്തമായ എതിർപ്പുമായി രംഗത്തുവന്നു.

തുടർന്ന് അരി സപ്ലൈകോയുടെ ഗോഡൗണിൽ എത്തിച്ച് വീണ്ടും വിശദമായ പരിശോധന നടത്തിയപ്പോഴാണ് ഇത് ഒരു ആവശ്യത്തിനും കൊള്ളില്ലെന്ന് ബോധ്യപ്പെട്ടത്. ഈ സംഭവുമായി ബന്ധപ്പെട്ട് രണ്ട് റേഷൻ കടകളുടെയും ലൈസൻസ് സസ്പെൻഡ് ചെയ്തതായി മന്ത്രി അനൂപ് ജേക്കബ് നേരത്തേ അറിയിച്ചിരുന്നു.

കൂടാതെ, തുടർച്ചയായി റിപ്പോർട്ടുകൾ മാറിമറിഞ്ഞ സംഭവത്തെക്കുറിച്ച് സമഗ്രമായ അന്വേഷണത്തിനും മന്ത്രി ഉത്തരവിട്ടിട്ടുണ്ട്.