ജനപ്രിയ ആപ്പുകളെ പിന്നിലാക്കി സ്മാർട്ട് ലോഞ്ചർ; ആൻഡ്രോയിഡ് ഉപയോക്താക്കൾ അറിഞ്ഞിരിക്കേണ്ട പ്രത്യേകതകൾ

ആൻഡ്രോയിഡ് ഫോണുകളിൽ മികച്ച ദൃശ്യനുഭവവും കാര്യക്ഷമതയും ഉറപ്പാക്കുന്നതിൽ ലോഞ്ചറുകൾക്ക് വലിയ പങ്കുണ്ട്. നോവ (Nova), നിയാഗറ (Niagara), ആക്ഷൻ (Action) തുടങ്ങിയ പരിചിതമായ പേരുകൾക്കിടയിൽ പലപ്പോഴും വേണ്ടത്ര ശ്രദ്ധിക്കപ്പെടാതെ പോകുന്ന ഒന്നാണ് സ്മാർട്ട് ലോഞ്ചർ (Smart Launcher).

മറ്റു പ്രമുഖ ലോഞ്ചറുകളെ അപേക്ഷിച്ച് ഒട്ടേറെ നൂതന സവിശേഷതകളാണ് ഈ ആപ്പ് ഉപയോക്താക്കൾക്കായി നൽകുന്നത്. പലരുടെയും പ്രധാന പരാതി ഫോണിലെ ആപ്പ് ഡ്രോയർ (App Drawer) കൈകാര്യം ചെയ്യുന്ന രീതിയെക്കുറിച്ചാണ്.

പരമ്പരാഗത ഗ്രീഡ് ശൈലിയോ അക്ഷരമാലാ ക്രമമോ വലിയ ആപ്പ് ശേഖരമുള്ളവർക്ക് പലപ്പോഴും ബുദ്ധിമുട്ട് സൃഷ്ടിക്കാറുണ്ട്. എന്നാൽ സ്മാർട്ട് ലോഞ്ചർ ഇതിനൊരു മികച്ച പരിഹാരം കാണുന്നു.

കമ്മ്യൂണിക്കേഷൻ, ഇന്റർനെറ്റ്, ഗെയിംസ്, മീഡിയ, യൂട്ടിലിറ്റീസ് തുടങ്ങി വിവിധ വിഭാഗങ്ങളായി ആപ്പുകളെ സ്വയം തരംതിരിക്കാൻ ഇതിന് സാധിക്കുന്നു. ഇതിലൂടെ ഉപയോക്താക്കൾക്ക് സമയം നഷ്ടപ്പെടുത്താതെ ആപ്പുകൾ കണ്ടെത്താനാകും.

ആവശ്യമെങ്കിൽ പുതിയ വിഭാഗങ്ങൾ നിർമ്മിക്കാനും ആപ്പുകൾ മാറ്റാനും സാധിക്കും. സങ്കീർണ്ണമായ ക്രമീകരണങ്ങളില്ലാതെ മികച്ച കസ്റ്റമൈസേഷൻ നൽകുന്നു എന്നതാണ് മറ്റൊരു പ്രധാന സവിശേഷത.

മിനിമലിസ്റ്റ് ശൈലിയിലോ വിവരങ്ങൾ നിറഞ്ഞ ഹോം സ്ക്രീനോ ഇഷ്ടപ്പെടുന്നവർക്ക് അനുയോജ്യമായ രീതിയിൽ ഇത് മാറ്റിയെടുക്കാം. പ്രോസ്റ്റഡ് ഗ്ലാസ് ഇഫക്ട് (Frosted glass effect), ജെസ്ചർ അധിഷ്ഠിത വിഡ്ജെറ്റുകൾ എന്നിവ ഇതിന്റെ ഉപയോഗം കൂടുതൽ എളുപ്പമാക്കുന്നു.

ഫോണിന്റെ വാൾപേപ്പറിന് അനുസൃതമായി നിറങ്ങൾ സ്വയം ക്രമീകരിക്കുന്ന ആംബിയന്റ് തീം (Ambient Theme) എഞ്ചിൻ ഇതിന്റെ പ്രധാന ആകർഷണമാണ്. കൂടാതെ കസ്റ്റം ഫോണ്ടുകൾ, ഐക്കൺ പായ്ക്കുകൾ, സുതാര്യത (Transparency) എന്നിവ തിരഞ്ഞെടുക്കാനുള്ള സ്വാതന്ത്ര്യവുമുണ്ട്.

മെറ്റീരിയൽ യൂ (Material You) മാതൃകയിലുള്ള ഡിസൈനുകൾ ഇതിൽ പരീക്ഷിക്കാവുന്നതാണ്. ആൻഡ്രോയിഡ് ഹോം സ്ക്രീനിൽ വിഡ്ജെറ്റുകൾക്ക് വലിയ പ്രാധാന്യമാണുള്ളത്.

കാലാവസ്ഥ, കലണ്ടർ, സംഗീത നിയന്ത്രണങ്ങൾ, ബാറ്ററി സൂചകങ്ങൾ തുടങ്ങി നിരവധി സ്വന്തം വിഡ്ജെറ്റുകൾ സ്മാർട്ട് ലോഞ്ചർ നൽകുന്നു. ഒരേ സ്ഥലത്ത് ഒന്നിലധികം വിഡ്ജെറ്റുകൾ സ്റ്റാക്ക് ചെയ്ത് ഉപയോഗിക്കാനുള്ള സൗകര്യവും ഇതിലുണ്ട്.

കോൺടാക്റ്റുകൾ, ഫയലുകൾ, വെബ് തിരച്ചിലുകൾ എന്നിവയ്‌ക്കൊപ്പം പെട്ടെന്ന് കണക്കുകൂട്ടലുകൾ നടത്താനും സഹായിക്കുന്ന സ്മാർട്ട് സെർച്ച് (Smart Search) സംവിധാനവും ഇതിൽ ഉൾപ്പെടുത്തിയിരിക്കുന്നു. പരിചിതമായ പേരുകൾക്കപ്പുറം ആൻഡ്രോയിഡ് ഫോണുകൾക്ക് പുതിയൊരു മുഖം നൽകാൻ ആഗ്രഹിക്കുന്നവർക്ക് സ്മാർട്ട് ലോഞ്ചർ മികച്ചൊരു ബദലായി മാറിയിരിക്കുകയാണ്.