തിരുവനന്തപുരം നഗരത്തിലെ സർക്കാർ ഉടമസ്ഥതയിലുള്ള തിയേറ്ററുകളിൽ സിനിമയുടെ ദൃശ്യങ്ങൾ അനധികൃതമായി പകർന്നു പ്രചരിച്ച സംഭവത്തിൽ സംസ്ഥാന മനുഷ്യാവകാശ കമ്മീഷൻ ഔദ്യോഗികമായി ഇടപെട്ടു. വിഷയത്തിൽ സമഗ്രമായ അന്വേഷണം നടത്തി എത്രയും പെട്ടെന്ന് റിപ്പോർട്ട് സമർപ്പിക്കണമെന്ന് ജില്ലാ പൊലീസ് മേധാവിക്ക് കമ്മീഷൻ നിർദ്ദേശം നൽകി.
സംഭവത്തിന്റെ ഗൗരവം കണക്കിലെടുത്ത് മുതിർന്ന ഒരു ഉദ്യോഗസ്ഥനെക്കൊണ്ട് അന്വേഷണം നടത്തിക്കാനാണ് നിർദ്ദേശിച്ചിട്ടുള്ളത്. ആവശ്യമെങ്കിൽ അന്വേഷണത്തിനായി കേരള പൊലീസിന്റെ ഹൈടെക് സെല്ലിന്റെ സാങ്കേതിക സഹായം തേടാവുന്നതാണെന്നും കമ്മീഷൻ വ്യക്തമാക്കിയിട്ടുണ്ട്.
കുറ്റക്കാരായ വ്യക്തികളെ എത്രയും വേഗം നിയമത്തിന് മുന്നിൽ കൊണ്ടുവരണമെന്നും അന്വേഷണം ഊർജിതമാക്കണമെന്നും ഉത്തരവിലുണ്ട്. സംസ്ഥാന സർക്കാരിന്റെ ഉടമസ്ഥതയിലുള്ള തിരുവനന്തപുരത്തെ പ്രമുഖ ചലച്ചിത്ര കേന്ദ്രങ്ങളായ കൈരളി, നിള തിയേറ്ററുകളിൽ നിന്നാണ് ചിത്രത്തിന്റെ ദൃശ്യങ്ങൾ സമൂഹമാധ്യമങ്ങളിലൂടെയും മറ്റും വ്യാപകമായി പ്രചരിച്ചത്.
ഇത്തരം സംഭവങ്ങൾ ആവർത്തിക്കാതിരിക്കാൻ കർശന മുൻകരുതലുകൾ സ്വീകരിക്കണമെന്നും കമ്മീഷൻ ഓർമ്മിപ്പിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
