ഇന്ത്യൻ ക്രിക്കറ്റ് ടീം സീനിയർ സെലക്ഷൻ കമ്മിറ്റിയിലുണ്ടായ ഒഴിവിലേക്ക് മുൻ ഇന്ത്യൻ ഓപ്പണർ വസീം ജാഫർ അപേക്ഷ നൽകി. ബിസിസിഐയുടെ മാനദണ്ഡങ്ങൾ പ്രകാരം ഒക്ടോബർ 14 ആയിരുന്നു അപേക്ഷ സമർപ്പിക്കാനുള്ള അവസാന തീയതി.
നിലവിൽ അജിത് അഗാർക്കർ നാല് വർഷത്തെ സേവനത്തിന് ശേഷം സ്ഥാനമൊഴിഞ്ഞ സാഹചര്യത്തിലാണ് ഈ ഒഴിവ് വന്നത്. സെലക്ഷൻ കമ്മിറ്റിയിലേക്ക് വസീം ജാഫർ തിരഞ്ഞെടുക്കപ്പെടുകയാണെങ്കിൽ, നിലവിലെ അഞ്ചംഗ പാനലിൽ ഏറ്റവും കൂടുതൽ ടെസ്റ്റ് മത്സരങ്ങൾ കളിച്ച വ്യക്തിയെന്ന നിലയിൽ അദ്ദേഹം ചീഫ് സെലക്ടർ പദവിയിൽ എത്തിയേക്കും.
ഇന്ത്യയ്ക്കായി 31 ടെസ്റ്റ് മത്സരങ്ങളിൽ നിന്ന് 1,944 റൺസ് നേടിയ താരമാണ് വസീം ജാഫർ. ഇതിൽ 5 സെഞ്ചുറികളും ഉൾപ്പെടുന്നു.
ആഭ്യന്തര ക്രിക്കറ്റിലെ ഇതിഹാസ താരമായ അദ്ദേഹം 260 ഫസ്റ്റ് ക്ലാസ് മത്സരങ്ങളിൽ നിന്നായി 57 സെഞ്ചുറികൾ ഉൾപ്പെടെ 19,410 റൺസ് സ്വന്തമാക്കിയിട്ടുണ്ട്. അതേസമയം, നിലവിൽ താൽക്കാലിക ചീഫ് സെലക്ടറായി പ്രവർത്തിക്കുന്നത് 24 ടെസ്റ്റ് മത്സരങ്ങൾ കളിച്ച സ്പിന്നർ പ്രഗ്യാൻ ഓജയാണ്.
അജിത് അഗാർക്കർ ഒഴിഞ്ഞ സ്ഥാനത്തേക്ക് പ്രഗ്യാൻ ഓജയെ തന്നെ ചീഫ് സെലക്ടറായി നിയമിക്കാനാണ് ബിസിസിഐയുടെ താൽപര്യമെന്നാണ് സൂചനകൾ. നിലവിലെ പാനലിലെ മറ്റ് അംഗങ്ങളായ ശിവ് സുന്ദർ ദാസ്, അജയ് രത്ര, ആർ.പി.
സിംഗ് എന്നിവർക്കൊപ്പം പുതിയതായി ചുമതലയേൽക്കുന്ന വ്യക്തിയെ ബിസിസിഐയുടെ ക്രിക്കറ്റ് അഡ്വൈസറി കമ്മിറ്റി തീരുമാനിക്കും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
