ശ്രീലങ്കയിൽ കരുത്തുപകർന്ന് മുത്തൂറ്റ് ഫിനാൻസ് ഉപകമ്പനി; റൈറ്റ്സ് ഇഷ്യു വഴി 150 കോടി രൂപ സമാഹരിച്ചു

പ്രമുഖ ധനകാര്യ സ്ഥാപനമായ മുത്തൂറ്റ് ഫിനാൻസ് ലിമിറ്റഡിന്റെ ഉപകമ്പനിയായ ഏഷ്യ അസറ്റ് ഫിനാൻസ് പിഎൽസി തങ്ങളുടെ 2026-ലെ റൈറ്റ്സ് ഇഷ്യു വിജയകരമായി പൂർത്തിയാക്കി. നടപടികളുടെ ഭാഗമായി ശ്രീലങ്കൻ കറൻസിയിൽ 150 കോടി രൂപയാണ് കമ്പനി സമാഹരിച്ചിരിക്കുന്നത്.

നിക്ഷേപകരുടെയും ഓഹരിയുടമകളുടെയും ഭാഗത്തുനിന്നും മികച്ച പിന്തുണയാണ് ഇതിനു ലഭിച്ചത്. ഇഷ്യൂവിന് 1.3 മടങ്ങ് അധിക അപേക്ഷകൾ ലഭിച്ചതായി കമ്പനി വ്യക്തമാക്കി.

ശ്രീലങ്കയിലെ ബിസിനസ്സ് പ്രവർത്തനങ്ങൾ വിപുലീകരിക്കുന്നതിനും കൂടുതൽ മൂലധനം ഉറപ്പാക്കുന്നതിനും ഈ സാമ്പത്തിക നേട്ടം ഏറെ സഹായകരമാകും. ഈ പദ്ധതിയുടെ ഭാഗമായി ആകെ 45,162,012 സാധാരണ വോട്ടിങ് ഓഹരികൾ ആണ് വിപണിയിൽ ഇറക്കിയത്.

ഇതിലൂടെ ആകെ 150.39 കോടി ശ്രീലങ്കൻ രൂപയാണ് സമാഹരിക്കാൻ സാധിച്ചത്. പുതിയ ഓഹരികൾ 2026 സെപ്റ്റംബർ 14ന് കൊളംബോ സ്റ്റോക്ക് എക്സ്ചേഞ്ചിൽ ഔദ്യോഗികമായി ലിസ്റ്റ് ചെയ്യുകയും ചെയ്തു.

നടപ്പ് സാമ്പത്തിക വർഷത്തിന്റെ ആദ്യ പാദത്തിൽ കമ്പനിയുടെ സാമ്പത്തിക വളർച്ചയിൽ വലിയ കുതിപ്പാണ് രേഖപ്പെടുത്തിയത്. വായ്പാ പോർട്ട്‌ഫോളിയോ 51 ശതമാനം വാർഷിക വളർച്ചയോടെ 5,270 കോടി ശ്രീലങ്കൻ രൂപയായി ഉയർന്നു.

മുൻവർഷം ഇത് 3,492 കോടി ശ്രീലങ്കൻ രൂപയായിരുന്നു. അതോടൊപ്പം, കമ്പനിയുടെ മൊത്തം വരുമാനം 72 ശതമാനം വർധിച്ച് 357 കോടി ശ്രീലങ്കൻ രൂപയിലെത്തി.

മുൻവർഷം ഇത് 207 കോടി ശ്രീലങ്കൻ രൂപയായിരുന്നു. അറ്റാദായമാകട്ടെ 137 ശതമാനം വർധിച്ച് 43 കോടി ശ്രീലങ്കൻ രൂപയായും ഉയർന്നു.

മുൻവർഷം ഇതേ കാലയളവിൽ അറ്റാദായം 18 കോടി ശ്രീലങ്കൻ രൂപ മാത്രമായിരുന്നു. റൈറ്റ്സ് ഇഷ്യു വഴി ലഭ്യമായ തുക കമ്പനിയുടെ മൂലധന അടിത്തറ കൂടുതൽ ഭദ്രമാക്കാനും ബിസിനസ്സ് വ്യാപിപ്പിക്കാനും ഉപയോഗിക്കുമെന്ന് മാനേജ്മെന്റ് അറിയിച്ചു.

പ്രവർത്തനങ്ങളിൽ കൈവരിച്ച ഈ സ്ഥിരതയാർന്ന വളർച്ചയാണ് പുതിയ ഫണ്ട് സമാഹരണത്തിന് അടിത്തറയായത്. “റൈറ്റ്സ് ഇഷ്യൂവിന് 1.3 മടങ്ങ് അധിക അപേക്ഷകൾ ലഭിച്ചത് വലിയൊരു നാഴികക്കല്ലാണെന്നും, കമ്പനിയുടെ വളർച്ചയിൽ ഓഹരിയുടമകൾക്കുള്ള വിശ്വാസമാണ് ഇത് കാണിക്കുന്നത്,” എന്ന് മുത്തൂറ്റ് ഫിനാൻസ് മാനേജിങ് ഡയറക്ടർ ജോർജ് അലക്സാണ്ടർ മുത്തൂറ്റ് അഭിപ്രായപ്പെട്ടു.

സമാഹരിച്ച മൂലധനം ബിസിനസ് വിപുലീകരിക്കാൻ സഹായിക്കും. ശ്രീലങ്കൻ സാമ്പത്തിക സേവന രംഗത്ത് കൂടുതൽ ശക്തമായ സാന്നിധ്യമാകാൻ ഏഷ്യ അസറ്റ് ഫിനാൻസിന് ഇത് കരുത്തുനൽകും.

ഉപഭോക്താക്കൾക്കും ഓഹരിയുടമകൾക്കും മികച്ച മൂല്യം നൽകാനും ഏഷ്യ അസറ്റ് ഫിനാൻസിന്റെ ദീർഘകാല വളർച്ചയ്ക്കും മുത്തൂറ്റ് ഫിനാൻസ് പൂർണ്ണ പിന്തുണ നൽകുമെന്നും അദ്ദേഹം കൂട്ടിച്ചേർത്തു. ശ്രീലങ്കയിലുടനീളം ശക്തമായ സാന്നിധ്യമുള്ള ഏഷ്യ അസറ്റ് ഫിനാൻസ്, സ്വർണ്ണപ്പണയം, ലീസിംഗ്, മോർട്ട്ഗേജ് വായ്പകൾ, ഗ്രൂപ്പ് വായ്പകൾ, വ്യക്തിഗത വായ്പകൾ, ബിസിനസ് വായ്പകൾ, കോർപ്പറേറ്റ് വായ്പകൾ, മൈക്രോ വായ്പകൾ, പബ്ലിക് ഡെപ്പോസിറ്റുകൾ തുടങ്ങി നിരവധി വൈവിധ്യമാർന്ന സാമ്പത്തിക സേവനങ്ങളാണ് ഉപഭോക്താക്കൾക്കായി നൽകിവരുന്നത്.