മുട്ടയിൽ നിന്നു വിരിഞ്ഞ പ്രായത്തിലുള്ള പക്ഷിക്കുഞ്ഞുങ്ങളുടെ ആവാസകേന്ദ്രമായിരുന്ന മരം കടയോടെ വെട്ടിമാറ്റിയ നിലയിൽ. സംഭവത്തിൽ നാല് കുഞ്ഞുങ്ങൾ ചൊവ്വാഴ്ച ചത്തൊടുങ്ങുകയും 28 പക്ഷികൾക്ക് നിലത്തുവീണ് ഗുരുതരമായി പരുക്കേൽക്കുകയും ചെയ്തു.
പാതിരാക്കൊക്കുകളും ചാരമുണ്ടികളുമടക്കം വന്യജീവി സംരക്ഷണ പട്ടികയിലെ ഷെഡ്യൂൾ രണ്ടിൽപ്പെട്ട പക്ഷികളാണ് ഇവ.
പരുക്കേറ്റ പക്ഷികളെ വനംവകുപ്പ് സംഘം വേഗത്തിൽ തന്നെ പുത്തൂർ സുവോളജിക്കൽ പാർക്കിൽ എത്തിച്ച് വിദഗ്ധ ചികിത്സ ലഭ്യമാക്കി. ഇതിൽ ഏഴെണ്ണത്തിന്റെ നില അതീവ ഗുരുതരമാണെന്ന് അധികൃതർ വ്യക്തമാക്കിയിട്ടുണ്ട്.
കെഎസ്ആർടിസി ബസ് സ്റ്റാൻഡ് പരിസരത്തു നിന്നു കൊക്കാലെയിലേക്കുള്ള റോഡിൽ വ്യാപാരസ്ഥാപനം പ്രവർത്തിക്കുന്ന കെട്ടിടത്തിന്റെ വളപ്പിനുള്ളിലാണ് ഈ ക്രൂരത അരങ്ങേറിയത്. പ്രകൃതിസ്നേഹികൾ നൽകിയ വിവരത്തിന്റെ അടിസ്ഥാനത്തിലാണ് വനംവകുപ്പ് ഉദ്യോഗസ്ഥർ സ്ഥലത്തെത്തിയത്.
വനം ഉദ്യോഗസ്ഥരെത്തുമ്പോൾ പക്ഷിക്കുഞ്ഞുങ്ങൾ നിലത്തു ചിതറിക്കിടക്കുന്ന ദയനീയ കാഴ്ചയാണ് കണ്ടത്. തള്ളപ്പക്ഷികൾ ഇരതേടിപ്പോയ സമയത്തായിരുന്നു ഈ അതിക്രമം.
സംഭവസ്ഥലത്ത് പക്ഷികൾ പാർക്കുന്ന മറ്റു മരങ്ങളും വെട്ടാനുള്ള ശ്രമം ഉദ്യോഗസ്ഥർ ഇടപെട്ട് തടഞ്ഞു. ഈ മരങ്ങളിലെല്ലാം നിറയെ കൂടുകളും അവയിൽ പക്ഷിക്കുഞ്ഞുങ്ങളും ഉണ്ടെന്ന് അധികൃതർ അറിയിച്ചു.
തള്ളപ്പക്ഷി കൊക്കിൽ വച്ചുകൊടുത്താൽ മാത്രം ഭക്ഷണം കഴിക്കുന്ന പ്രായത്തിലുള്ളവയാണ് ഈ കുഞ്ഞുങ്ങൾ. അതുകൊണ്ടുതന്നെ ഇവയുടെ അതിജീവനം ഉറപ്പാക്കുക എളുപ്പമല്ലെന്ന് അധികൃതർ ആശങ്ക പ്രകടിപ്പിച്ചു.
സംഭവവുമായി ബന്ധപ്പെട്ട് മരംവെട്ടിയവരടക്കം നാലുപേർക്കെതിരെ വന്യജീവി സംരക്ഷണ നിയമപ്രകാരം വനംവകുപ്പ് കർശന നടപടി സ്വീകരിച്ചു കേസെടുത്തു. ഡപ്യൂട്ടി റേഞ്ച് ഓഫിസർ എം.
ഷാജഹാൻ, സെക്‌ഷൻ ഓഫിസർമാരായ പി.ആർ. അരുൺ, ടി.യു.
രാജ്കുമാർ, ബീറ്റ് ഫോറസ്റ്റ് ഓഫിസർ ധന്യ എന്നിവരടങ്ങിയ സംഘമാണ് ഈ നടപടികൾക്ക് നേതൃത്വം നൽകിയത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
