പലിശ ആശങ്കകൾക്കിടെ പശ്ചിമേഷ്യൻ സംഘർഷം രൂക്ഷമാകുന്നു; വിപണിയിൽ ആശങ്കയുടെ നിഴൽ

രാജ്യാന്തര വിപണിയിൽ പലിശ നിരക്ക് വർധിക്കുമെന്ന ആശങ്കകൾക്കിടയിൽ ഇറാൻ-യുഎസ് സംഘർഷം കൂടുതൽ മേഖലകളിലേക്ക് വ്യാപിക്കുന്നത് ആഗോള സമ്പദ്‌വ്യവസ്ഥയ്ക്ക് കനത്ത വെല്ലുവിളിയാകുന്നു. ഹോർമുസ് കടലിടുക്കിൽ കപ്പലുകൾക്ക് നേരെ തുടരുന്ന ആക്രമണങ്ങൾ രാജ്യാന്തര വ്യാപാരത്തെ സാരമായി ബാധിച്ചിട്ടുണ്ട്.

ഇറാൻ ആക്രമണത്തിൽ എണ്ണക്കപ്പൽ തകർന്നു. മുന്നറിയിപ്പ് അവഗണിച്ചെത്തിയ സൂപ്പർ ടാങ്കർ കടൽ മൈനിൽ തട്ടിയാണ് തകർന്നതെന്ന് ഇറാൻ വ്യക്തമാക്കി.

ഇതിനിടെ, സൗദി അറേബ്യയിൽ ഹൂതികൾ നടത്തിയ ആക്രമണത്തിന് പിന്നാലെ ആഗോള വിപണിയിൽ എണ്ണവില കുതിച്ചുയർന്നു. ബ്രെന്റ് ക്രൂഡോയിൽ ബാരലിന് 107 ഡോളറിലെത്തി.

ഡബ്ല്യൂടിഐ ബാരലിന് 103 ഡോളറിലും യുഎഇയുടെ മർബൻ ക്രൂഡ് 127 ഡോളറിലുമാണ് വ്യാപാരം നടക്കുന്നത്. വെനസ്വേലൻ മാതൃകയിൽ ഇറാനിലെ എണ്ണയുടെ നിയന്ത്രണം ഏറ്റെടുക്കാൻ യുഎസ് ശ്രമിക്കുമെന്ന് യുഎസ് പ്രസിഡന്റ് ഡോണൾഡ് ട്രംപ് ഇന്നലെ വ്യക്തമാക്കിയിരുന്നു.

യുദ്ധം അവസാനിപ്പിച്ച് സമാധാന കരാറിലെത്താൻ ഇറാൻ നിരന്തരം ശ്രമിക്കുകയാണെന്നും യുഎസിന് വലിയ താൽപര്യമില്ലെന്നും അദ്ദേഹം കൂട്ടിച്ചേർത്തു. ഇറാന് സാമ്പത്തിക സഹായം നൽകുന്ന രാജ്യങ്ങൾക്കെതിരെ കർശന നടപടിയുണ്ടാകുമെന്ന് യുഎസ് ട്രഷറി സെക്രട്ടറി സ്കോട്ട് ബെസന്റും മുന്നറിയിപ്പ് നൽകി.

അതേസമയം, ഹോർമുസ് കടലിടുക്കിൽ അമേരിക്കയുടെ അത്യാധുനിക ഡ്രോൺ തകർത്തതായി ഇറാൻ സൈന്യം അവകാശപ്പെട്ടു. പശ്ചിമേഷ്യയിലെ സംഘർഷം തുടരുന്നതിനിടയിൽ ചെങ്കടലിലെ രണ്ട് നിർണായക ദ്വീപുകൾ പിടിച്ചെടുത്തതായി ഹൂതികളും അറിയിച്ചു.

ഹൂതികൾക്കെതിരെ യെമൻ സൈന്യവും സൗദി സേനയും ശക്തമായ തിരിച്ചടി നൽകിവരികയാണെന്നാണ് റിപ്പോർട്ടുകൾ സൂചിപ്പിക്കുന്നത്. കെവിൻ വാർഷിന്റെ മുന്നിലുള്ള അഗ്നിപരീക്ഷ യുഎസ് ഫെഡറൽ റിസർവിന്റെ അതിനിർണായക പണനയ യോഗം ആരംഭിക്കുമ്പോൾ എല്ലാ കണ്ണുകളും പുതിയ ചെയർമാൻ കെവിൻ വാർഷിലേക്കാണ്.

അധ്യക്ഷ പദവിയിലെത്തിയ ശേഷം അദ്ദേഹം നേരിടുന്ന പ്രധാന വെല്ലുവിളിയാണിത്. യുഎസ് പ്രസിഡന്റ് ഡോണൾഡ് ട്രംപിന്റെ അനുയായിയായ കെവിൻ വാർഷ് ഈ യോഗത്തിൽ എന്തു നിലപാട് സ്വീകരിക്കുമെന്നാണ് സാമ്പത്തിക ലോകം ഉറ്റുനോക്കുന്നത്.

അമേരിക്കയിലെ പണപ്പെരുപ്പ നിരക്ക് ഫെഡ് റിസർവിന്റെ സഹന പരിധിയായ 2 ശതമാനത്തിനു മുകളിലാണ്. ക്രൂഡോയിൽ വില ഉയർന്നുനിൽക്കുന്നത് പണപ്പെരുപ്പം വീണ്ടും വർധിക്കാൻ കാരണമായേക്കാം.

ഇത് പ്രതിരോധിക്കാൻ അടിസ്ഥാന പലിശ നിരക്ക് ഉയർത്തുകയല്ലാതെ മറ്റ് പോംവഴികളില്ല. അടുത്തിടെ പുറത്തുവന്ന തൊഴിൽ, ഉൽപാദന കണക്കുകളും ഈ നിഗമനത്തെ ശരിവെക്കുന്നതാണ്.

നിലവിലെ സാഹചര്യത്തിൽ 0.25 ശതമാനമെങ്കിലും പലിശ നിരക്ക് വർധിപ്പിക്കാൻ 90 ശതമാനത്തിനു മുകളിൽ സാധ്യതയുണ്ടെന്നാണ് വിപണിയുടെ വിലയിരുത്തൽ. ഡിസംബറിൽ വീണ്ടും നിരക്ക് ഉയർത്താൻ 75 ശതമാനം സാധ്യതയുണ്ടെന്നും വിപണി കണക്കുകൂട്ടുന്നു.

എന്നിരുന്നാലും, പണപ്പെരുപ്പ കണക്കുകൾ എന്തായാലും അമേരിക്കയിൽ ലോകത്തിലെ ഏറ്റവും കുറഞ്ഞ പലിശ നിരക്ക് തുടരണമെന്ന ട്രംപിന്റെ നിലപാടാണ് വാർഷിന് മുൻപിലെ പ്രധാന പ്രതിബന്ധം. ഈ വിഷയത്തിൽ ഫെഡ് റിസർവിലെ 12 അംഗങ്ങൾ സ്വീകരിക്കുന്ന നിലപാട് നിർണായകമാകും.

പലിശ നിരക്ക് കൂട്ടണമെന്ന അഭിപ്രായമാണ് കെവിൻ വാർഷിനുള്ളതെന്നാണ് വിപണിയുടെ പൊതുവായ വിലയിരുത്തൽ. സമീപകാലത്ത് അദ്ദേഹം നടത്തിയ ചില പ്രസ്താവനകൾ ഇതിന് വ്യക്തമായ സൂചന നൽകുന്നുണ്ട്.

പലിശ നിരക്ക് ഉയർത്തിയാൽ വിപണിയിൽ എന്ത് സംഭവിക്കും? ഇന്ന് ആരംഭിക്കുന്ന ഫെഡ് യോഗത്തിന്റെ അന്തിമ തീരുമാനം അടുത്ത ദിവസങ്ങളിൽ കെവിൻ വാർഷ് പ്രഖ്യാപിക്കും. ഇതിനോടൊപ്പം വരുംകാല സാമ്പത്തിക ഗതിയെക്കുറിച്ചുള്ള വിലയിരുത്തലുകളും അദ്ദേഹം പങ്കുവെക്കും.

പലിശ നിരക്ക് ഉയർത്താൻ തീരുമാനിച്ചാൽ അത് ഓഹരി വിപണി, സ്വർണവില, ഇഎംഐ തുടങ്ങിയ മേഖലകളെ സാരമായി ബാധിക്കും: ∙ ഇന്ത്യ പോലുള്ള വളർന്നുവരുന്ന വിപണികളിൽ നിന്ന് വിദേശ നിക്ഷേപകർ കൂട്ടത്തോടെ പിൻവാങ്ങും. ഉയർന്ന നേട്ടം ലഭിക്കുന്ന അമേരിക്കൻ കടപത്രങ്ങളിൽ നിക്ഷേപിക്കാനായിരിക്കും നിക്ഷേപകർക്ക് താൽപര്യം കൂടുതൽ.

ഇത് ഓഹരി വിപണിയെ ഇടിവിലേക്ക് നയിക്കും.
∙ സ്വർണ വിപണിയിലും സമാനമായ തിരിച്ചടി ഉണ്ടാകും. സ്ഥിരമായ പലിശ വരുമാനം ലഭിക്കാത്ത സ്വർണത്തിൽ നിന്ന് നിക്ഷേപകർ പിന്മാറുന്നത് ഡിമാൻഡ് കുറയാനും വില ഇടിയാനും കാരണമാകും.
∙ യുഎസ് ഫെഡിന്റെ പലിശ തീരുമാനം ഇന്ത്യ അടക്കമുള്ള രാജ്യങ്ങളെയും സ്വന്തം രാജ്യത്തെ നിരക്കുകൾ ഉയർത്താൻ പ്രേരിപ്പിക്കും.

ഇത് ഭവന, വാഹന വായ്പകളുടെ പ്രതിമാസ തിരിച്ചടവ് (ഇഎംഐ) വർധിപ്പിക്കും.
∙ യുഎസ് കടപത്രങ്ങളിലേക്കുള്ള നിക്ഷേപ പ്രവാഹം ഡോളറിന്റെ വിനിമയ നിരക്ക് ഉയർത്തുകയും ഇന്ത്യൻ രൂപയുടെ മൂല്യത്തെ പ്രതികൂലമായി ബാധിക്കുകയും ചെയ്യും. വിദേശ നിക്ഷേപകരുടെ പിന്മാറ്റവും രൂപയ്ക്ക് തിരിച്ചടിയാകും.

എങ്കിലും, എഫ്സിഎൻആർ(ബി) നിക്ഷേപങ്ങളുടെ കരുത്തിൽ ഇന്ത്യൻ വിദേശനാണ്യ ശേഖരം ശക്തമായി തുടരുന്നതിനാൽ രൂപ വലിയ തകർച്ചയെ അഭിമുഖീകരിക്കില്ലെന്നാണ് വിദഗ്ധരുടെ വിലയിരുത്തൽ. പലിശ കൂട്ടാൻ സാധ്യതയേറ്റി വിലക്കയറ്റ കണക്കുകൾ അമേരിക്കൻ ഫെഡറൽ റിസർവിന്റെ തീരുമാനത്തിന് പിന്നാലെ ഇന്ത്യയിലും പലിശ നിരക്കുകൾ വർധിക്കാനുള്ള സാധ്യത ശക്തമാക്കി ഓഗസ്റ്റ് മാസത്തെ പണപ്പെരുപ്പ കണക്കുകൾ പുറത്തുവന്നു.

രാജ്യത്തെ ചില്ലറ വിലക്കയറ്റം ജൂലൈയിലെ 4.45 ശതമാനത്തിൽ നിന്ന് ഓഗസ്റ്റിൽ 4.82 ശതമാനമായി ഉയർന്നു. ഉള്ളിയടക്കമുള്ള ഭക്ഷ്യവസ്തുക്കളുടെ വിലക്കയറ്റമാണ് ഈ വർധനവിന് പ്രധാന കാരണം.

ഇതിനുപുറമേ, മൊത്തവിപണിയിലെ (ഡബ്ല്യുപിഐ) വിലക്കയറ്റ നിരക്ക് 9.78 ശതമാനമായി രേഖപ്പെടുത്തി. ചെറുകിട

വിപണിയിലെ വിലക്കയറ്റ തോത് കണക്കാക്കുന്ന പുതിയ രീതി ഈ വർഷം ജനുവരിയിൽ നിലവിൽ വന്നതിനു ശേഷമുള്ള ഏറ്റവും ഉയർന്ന നിരക്കാണിത്. ഈ സാഹചര്യങ്ങൾ അടുത്ത റിസർവ് ബാങ്ക് പണനയ യോഗത്തിൽ റിപ്പോ നിരക്ക് വർധിപ്പിക്കാനുള്ള സാധ്യത വർധിപ്പിക്കുന്നുണ്ട്.

ഇന്ത്യൻ വിപണിയുടെ ഇന്നത്തെ അവസ്ഥ ∙ മൂന്നു ദിവസത്തെ ദീർഘമായ അവധിക്ക് ശേഷം ഇന്ത്യൻ ഓഹരി വിപണി വീണ്ടും വ്യാപാരത്തിലേക്ക് കടക്കുകയാണ്. തുടർച്ചയായ അഞ്ച് ആഴ്ചകളിലും നഷ്ടം രേഖപ്പെടുത്തിയ വിപണി ഇന്നും കനത്ത സമ്മർദ്ദത്തിലാകാനാണ് സാധ്യത.

ഈ വർഷം ഇതാദ്യമായാണ് വിപണി തുടർച്ചയായി ഇത്രയും കാലം നഷ്ടം നേരിടുന്നത്.
∙ ക്രൂഡോയിൽ വിലക്കയറ്റം പണപ്പെരുപ്പ ഭീഷണി ഇരട്ടിയാക്കുന്നത് വിപണിക്ക് തിരിച്ചടിയാകുന്നു. പശ്ചിമേഷ്യയിലെ സംഘർഷങ്ങൾ തുടരുന്നതും യുഎസ് ഫെഡ് റിസർവ് യോഗതീരുമാനങ്ങളും നിക്ഷേപകരുടെ തീരുമാനങ്ങളെ സ്വാധീനിക്കും.
∙ ഗിഫ്റ്റ് നിഫ്റ്റി ചെറിയ നേട്ടത്തിലാണ് വ്യാപാരം സൂചിപ്പിക്കുന്നത്.

അതിനാൽ ഇന്ത്യൻ ഓഹരി വിപണി കാര്യമായ നേട്ടങ്ങളില്ലാതെയോ അല്ലെങ്കിൽ ചെറിയ പോസിറ്റീവ് സ്വഭാവത്തിലോ വ്യാപാരം ആരംഭിക്കാനാണ് സാധ്യത.
∙ 2000 രൂപ വരെയുള്ള യുപിഐ ഇടപാടുകൾക്ക് ചാർജ് ഈടാക്കാൻ പാടില്ലെന്ന കേന്ദ്ര സർക്കാർ ഉത്തരവ് വരാനിരിക്കുന്ന കർശന നടപടികളുടെ സൂചനയാണ് നൽകുന്നത്. വൻകിട

ഇടപാടുകൾക്ക് വ്യാപാരികളിൽ നിന്ന് ഫീസ് ഈടാക്കാനുള്ള സാധ്യത വർധിച്ചിട്ടുള്ളത് ഈ മേഖലയിലെ ഓഹരികളെ നിക്ഷേപകരുടെ ശ്രദ്ധാകേന്ദ്രമാക്കും. ആർട്ടിഫിഷ്യൽ ഇന്റലിജൻസ് ഭീതിയിൽ തകർന്ന് യുഎസ് വിപണി കഴിഞ്ഞ ദിവസം അമേരിക്കൻ ഓഹരി വിപണി കനത്ത തിരിച്ചടിയാണ് നേരിട്ടത്.

ആർട്ടിഫിഷ്യൽ ഇന്റലിജൻസ് മേഖലയിലെ അതിവേഗ ഗവേഷണങ്ങളെക്കുറിച്ചുള്ള ആശങ്കകൾ സജീവമായതാണ് പ്രധാന കാരണങ്ങളിലൊന്ന്. എഐ രംഗത്തെ പ്രമുഖ കമ്പനികളുടെ ഓഹരികളെല്ലാം കുത്തനെ ഇടിഞ്ഞു.

എഐ മുന്നേറ്റത്തിൽ മുൻപന്തിയിലുണ്ടായിരുന്ന എൻവിഡിയ ഓഹരികൾ നാല് ശതമാനത്തിലേറെ നഷ്ടം നേരിട്ടു. ബ്രോഡ്കോം, ആഡ്വാൻസ്ഡ് മൈക്രോ ഡിവൈസ്, ഇന്റൽ, മാർവൽ ടെക്നോളജീസ്, ആമസോൺ, ടെസ്‌ല തുടങ്ങിയ മുൻനിര കമ്പനികളും കനത്ത ഇടിവിലാണ് വ്യാപാരം അവസാനിപ്പിച്ചത്.

ആന്ത്രോപിക് സിഇഒ ഡാരിയോ അമോഡേയ് കഴിഞ്ഞ ദിവസങ്ങളിൽ നടത്തിയ പ്രസ്താവനയാണ് എഐ ആശങ്കകൾക്ക് ആക്കം കൂട്ടിയത്. മനുഷ്യരാശിക്ക് തന്നെ ഭീഷണിയാകുന്ന രീതിയിൽ എഐ വളരുമെന്നും ഈ രംഗത്തെ ഗവേഷണങ്ങളുടെ വേഗത കുറയ്ക്കണമെന്നുമായിരുന്നു അദ്ദേഹത്തിന്റെ ആവശ്യം.

ഇതിന് വിവിധ കമ്പനികളും ആഗോള നേതാക്കളും പിന്തുണ പ്രഖ്യാപിച്ചതോടെ നിക്ഷേപകർ സെമികണ്ടക്ടർ ഓഹരികൾ വിറ്റൊഴിക്കാൻ തുടങ്ങി. ഓപ്പൺ എഐ അടക്കമുള്ള പ്രമുഖ കമ്പനികൾ പ്രാരംഭ ഓഹരി വിൽപന (ഐപിഒ) വൈകിക്കുമെന്ന് പ്രഖ്യാപിച്ചതും ഈ മേഖലയിൽ ആശങ്കയ്ക്ക് കാരണമായി.

ഇതിനുപുറമെ ക്രൂഡോയിൽ വില ഉയർന്നതും അടിസ്ഥാന പലിശ നിരക്ക് ഉയരുമെന്ന ആശങ്ക വർധിച്ചതും വിപണിയെ നഷ്ടത്തിലേക്ക് നയിച്ചു. ഡൗ ജോൺസ് സൂചിക 0.29 ശതമാനം നഷ്ടത്തിലായപ്പോൾ, എസ് ആൻഡ് പി 0.48 ശതമാനവും നാസ്ഡാക് 0.56 ശതമാനവും ഇടിവ് രേഖപ്പെടുത്തി.

ഇന്നും അമേരിക്കൻ ഓഹരി ഫ്യൂച്ചറുകൾ ഇടിവിലാണ് തുടരുന്നത്. എണ്ണവിലയ്ക്കൊപ്പം ട്രഷറി യീൽഡ് ഉയർന്നതും നിക്ഷേപകരെ ആശങ്കയിലാക്കി.

10 വർഷ കാലാവധിയുള്ള അമേരിക്കൻ കടപത്രങ്ങളിൽ നിന്നുള്ള ആദായം 5% ആയി വർധിച്ചു. 2023 ഒക്ടോബറിന് ശേഷമുള്ള ഏറ്റവും ഉയർന്ന നിരക്കാണിത്.