പത്തനംതിട്ട ജില്ലയിലെ ലൈഫ് മിഷൻ പദ്ധതി ഫണ്ട് തിരിമറിയുമായി ബന്ധപ്പെട്ട് പ്രതിയായ വില്ലേജ് എക്സ്റ്റൻഷൻ ഓഫീസർക്കെതിരെ കോന്നി പോലീസ് പുതിയ കേസ് രജിസ്റ്റർ ചെയ്തു.
ആരുവാപുലം പഞ്ചായത്ത് സെക്രട്ടറി നൽകിയ പരാതിയുടെ അടിസ്ഥാനത്തിലാണ് ഈ നടപടി. ലൈഫ് പദ്ധതിയുടെ മറവിൽ 20,64,946 രൂപയുടെ തിരിമറി നടത്തിയെന്നാണ് പുതിയ കേസിൽ ആരോപിക്കുന്നത്.
ഇതോടെ പ്രതി ഉൾപ്പെട്ട സാമ്പത്തിക തട്ടിപ്പിന്റെ ആകെ വ്യാപ്തി എഴുപത് ലക്ഷം രൂപ കവിഞ്ഞു.
മുൻപ് ഇവർ ഔദ്യോഗികമായി സേവനം അനുഷ്ഠിച്ച ആദ്യത്തെ പഞ്ചായത്താണ് ആരുവാപുലം. സീതത്തോട്, തണ്ണിത്തോട് പഞ്ചായത്തുകളിലും ഇവർ ജോലി ചെയ്തിട്ടുണ്ട്.
സീതത്തോട് പഞ്ചായത്തിൽ അൻപത് ലക്ഷത്തിലധികം രൂപയുടെ തട്ടിപ്പ് നടത്തിയെന്ന പരാതിയിൽ ചിറ്റാർ പോലീസ് രജിസ്റ്റർ ചെയ്ത കേസിൽ റാണി ലക്ഷ്മി നിലവിൽ റിമാൻഡിലാണ്. ഇതിനുപുറമെ, തണ്ണിത്തോട് പഞ്ചായത്തിൽ രണ്ട് ലക്ഷത്തിലധികം രൂപയുടെ തിരിമറി നടത്തിയെന്നാരോപിച്ച് തണ്ണിത്തോട് പോലീസും കേസെടുത്തിട്ടുണ്ട്.
ലൈഫ് ഗുണഭോക്തൃ പട്ടിക അട്ടിമറിക്കുകയും വ്യാജരേഖകൾ നിർമ്മിക്കുകയും ചെയ്തുകൊണ്ട് ബന്ധുക്കളെയും സുഹൃത്തുക്കളെയും പട്ടികയിൽ അനധികൃതമായി ഉൾപ്പെടുത്തിയെന്നാണ് പ്രധാന കണ്ടെത്തൽ. ഇവരുടെ ബാങ്ക് അക്കൗണ്ടുകളിലേക്ക് പദ്ധതി ഫണ്ട് നേരിട്ട് മാറ്റുകയായിരുന്നു.
അരക്കോടിയിലധികം രൂപയുടെ ക്രമക്കേട് നടന്ന സീതത്തോട് പഞ്ചായത്തിൽ പ്രാദേശിക രാഷ്ട്രീയ നേതൃത്വത്തിന്റെ പങ്ക് അന്വേഷണ സംഘം പരിശോധിക്കും. തണ്ണിത്തോട്ടും സമാനമായ രീതിയിൽ അനധികൃത ഇടപെടലുകൾ നടന്നിട്ടുണ്ടെന്നാണ് പ്രാഥമിക വിലയിരുത്തൽ.
ലൈഫ് പദ്ധതിയുടെ ഭാഗമായി വാസയോഗ്യമല്ലാത്ത ഭൂമി വാങ്ങി വൻ തോതിൽ തട്ടിപ്പ് നടത്തിയെന്ന ആക്ഷേപങ്ങൾ നേരത്തെയും ഉയർന്നുവന്ന പ്രദേശങ്ങളാണിത്. അർഹരായവരെ ഒഴിവാക്കി അനർഹരായ വ്യക്തികൾക്ക് പദ്ധതിയിലൂടെ വീടുകൾ അനുവദിച്ചുവെന്ന പരാതികളും അന്വേഷണ പരിധിയിലുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
