ശാസ്താംകോട്ടയിൽ ഓണദിനത്തിൽ വീട്ടുയമുറ്റത്ത് അപ്രതീക്ഷിതമായി ഗർത്തം രൂപപ്പെട്ടു; ആശങ്കയിൽ കുടുംബം

ശാസ്താംകോട്ടയിൽ ഓണദിനത്തിൽ വീട്ടുമുറ്റത്ത് അപ്രതീക്ഷിതമായി വലിയൊരു ഗർത്തം രൂപപ്പെട്ടത് കുടുംബാംഗങ്ങളിൽ ആശങ്ക പരത്തി. മൈനാഗപ്പള്ളി ഇടവനശേരി പ്ലാമൂട്ടിൽ ചന്തയ്ക്ക് സമീപം കൃഷ്ണവിലാസത്തിൽ പുഷ്പലതയുടെ വീട്ടിലാണ് സംഭവം നടന്നത്.

ഉത്രാട ദിനത്തിൽ രാവിലെ അടുക്കള ഭാഗത്തുള്ള മുറ്റത്ത് ചെറിയൊരു കുഴി രൂപപ്പെട്ടത് ശ്രദ്ധയിൽപ്പെട്ടതിനെ തുടർന്ന് വീട്ടുകാർ നടത്തിയ പരിശോധനയിലാണ് സംഭവം പുറത്തറിയുന്നത്.

കുഴിയുടെ ഉള്ളിലേക്ക് നോക്കിയപ്പോൾ താഴേക്ക് ആഴത്തിൽ നീണ്ടുപോകുന്ന ഗർത്തവും മരങ്ങളുടെ വേരുകളും കാണാൻ സാധിച്ചു. ഈ ഗർത്തം വീടിന്റെ അടിത്തറയെയും ബലത്തെയും ബാധിക്കുമോ എന്ന ആശങ്കയിലാണ് ഇപ്പോൾ കുടുംബം കഴിയുന്നത്.

സംഭവമറിഞ്ഞ ഉടൻ തന്നെ വീട്ടുകാർ പഞ്ചായത്ത് അധികൃതരെ വിവരമറിയിക്കുകയായിരുന്നു. തുടർന്ന് ജില്ലാ ഭരണകൂടത്തിന്റെ അടിയന്തര ഇടപെടലിനെ തുടർന്ന് ജിയോളജി വകുപ്പ് ഉദ്യോഗസ്ഥർ സ്ഥലത്തെത്തി പ്രാഥമിക പരിശോധനകൾ നടത്തി.

ഈ സംഭവവുമായി ബന്ധപ്പെട്ട് ജിയോളജി വകുപ്പ് ഉടൻ തന്നെ പഞ്ചായത്തിന് ഔദ്യോഗിക റിപ്പോർട്ട് സമർപ്പിക്കുമെന്നാണ് അധികൃതർ വ്യക്തമാക്കിയിട്ടുള്ളത്. ഗർത്തം രൂപപ്പെടാനുള്ള യഥാർത്ഥ കാരണം എന്താണെന്നും, വീടിന് എന്തെങ്കിലും തരത്തിലുള്ള അപകടസാധ്യത നിലനിൽക്കുന്നുണ്ടോ എന്നും ഈ റിപ്പോർട്ടിലൂടെ വ്യക്തത ലഭിക്കുമെന്നാണ് പ്രതീക്ഷിക്കുന്നത്.

അതേസമയം, നിലവിലുള്ള അപകടസാധ്യത ഒഴിവാക്കുന്നതിന്റെ ഭാഗമായി താൽക്കാലിക മുൻകരുതൽ എന്ന നിലയിൽ ഗർത്തത്തിന് മുകളിൽ പ്ലാസ്റ്റിക് വീപ്പ സ്ഥാപിച്ച് സുരക്ഷിതമായി മൂടിയിരിക്കുകയാണ്. പ്രദേശത്ത് കൂടുതൽ വിശദമായ പരിശോധനകളും അടിയന്തര സുരക്ഷാ നടപടികളും സ്വീകരിക്കണമെന്നാണ് വീട്ടുകാരുടെ പ്രധാന ആവശ്യം.