സ്ത്രീകളുടെ പൊതുരംഗ പ്രവേശനം: കാന്തപുരം അബൂബക്കർ മുസ്ലിയാരുടെ നിലപാടിനെ പിന്തുണച്ച് കേരള മുസ്ലിം ജമാഅത്ത്

സ്ത്രീകളുടെ പൊതുരംഗ പ്രവേശനവുമായി ബന്ധപ്പെട്ട് സമസ്‌ത കേരള ജംഇയ്യത്തുൽ ഉലമാ ജനറൽ സെക്രട്ടറി കാന്തപുരം അബൂബക്കർ മുസ്ലിയാർ നടത്തിയ പ്രസ്താവനയ്ക്ക് പൂർണ്ണ പിന്തുണയുമായി കേരള മുസ്ലിം ജമാഅത്ത് രംഗത്തെത്തി. കോഴിക്കോട് ചേർന്ന യോഗത്തിന് ശേഷം സംഘടന ഔദ്യോഗികമായി പുറത്തിറക്കിയ പ്രസ്താവനയിലാണ് ഇക്കാര്യം വ്യക്തമാക്കിയത്.

ഇസ്‌ലാമിക പ്രമാണങ്ങളിൽ അധിഷ്ഠിതമായ മതപരമായ മാർഗനിർദ്ദേശങ്ങൾ മാത്രമാണ് കാന്തപുരം എ.പി. അബൂബക്കർ മുസ്ലിയാർ നൽകിയിട്ടുള്ളതെന്ന് കേരള മുസ്‌ലിം ജമാഅത്ത് സംസ്ഥാന കമ്മിറ്റി അറിയിച്ചു.

ഇസ്‌ലാമിക മൂല്യങ്ങൾ പിന്തുടർന്ന് ജീവിതം മുന്നോട്ട് കൊണ്ടുപോകാൻ ആഗ്രഹിക്കുന്ന വിശ്വാസി സമൂഹത്തെ അഭിസംബോധന ചെയ്തുകൊണ്ടുള്ള ഈ നിലപാടിനെ ബോധപൂർവ്വം തെറ്റിദ്ധരിപ്പിച്ച് വിവാദങ്ങൾ സൃഷ്ടിക്കാൻ ശ്രമിക്കുന്നത് തീർത്തും ദൗർഭാഗ്യകരമാണെന്നും പ്രസ്താവനയിൽ ചൂണ്ടിക്കാണിക്കുന്നു. കാലികമായ ജനപ്രീതിക്കോ അനാവശ്യ വിമർശനങ്ങൾക്കോ വേണ്ടി ശരീഅത്ത് നിയമങ്ങളിൽ യാതൊരുവിധ മാറ്റവും വരുത്താൻ സാധിക്കില്ല.

രാജ്യത്തെ ഭരണഘടന പൗരന്മാർക്ക് ഉറപ്പുനൽകുന്ന വിശ്വാസ സ്വാതന്ത്ര്യവും മതനിയമങ്ങൾ അനുസരിച്ച് ജീവിക്കാനുള്ള മൗലികാവകാശവും ആരുടെയും മുമ്പിൽ അടിയറവുവെക്കാനാകില്ല. കേവലമായ സമത്വവാദത്തേക്കാൾ ഉപരിയായി ഇസ്‌ലാം പ്രാധാന്യം കൽപ്പിക്കുന്നത് ലിംഗനീതിക്കാണ്.

സ്ത്രീക്കും പുരുഷനും ശാരീരികവും മാനസികവുമായ പ്രകൃതിസഹജമായ സവിശേഷതകൾ മുൻനിർത്തി വ്യത്യസ്ത ഉത്തരവാദിത്തങ്ങളാണ് മതം നൽകിയിട്ടുള്ളത്. ഇത് യഥാർത്ഥത്തിൽ പ്രകൃതിപരമായ നീതി നടപ്പിലാക്കലാണ്.

ഈ നിലപാടുകൾ പൊതുസമൂഹത്തിലെ മറ്റുള്ളവരുടെ മേൽ അടിച്ചേൽപ്പിക്കാനുള്ളതല്ല. മറിച്ച്, ഇസ്‌ലാമിക വിശ്വാസപ്രകാരം ജീവിക്കാൻ ആഗ്രഹിക്കുന്ന ഒരു സമുദായത്തോടുള്ള മതപരമായ ഉപദേശവും മാർഗ്ഗനിർദ്ദേശവുമാണിത്.

വസ്ത്രധാരണത്തിലും പരസ്പരമുള്ള ഇടപഴകലുകളിലും സ്വകാര്യതയും നൈതികതയും കാത്തുസൂക്ഷിക്കുന്നത് ഓരോ വ്യക്തിയുടെയും ആത്മീയവും ധാർമ്മികവുമായ അവകാശമാണ്. ബഹുസ്വരത നിലനിൽക്കുന്ന സമൂഹത്തിൽ ഓരോ സമുദായത്തിനും സ്വന്തം ആചാരാനുഷ്ഠാനങ്ങളും വസ്ത്രധാരണ രീതികളും പിന്തുടരാനുള്ള സ്വാതന്ത്ര്യമുണ്ട്.

മറ്റുള്ളവരുടെ സ്വാതന്ത്ര്യത്തിൽ കടന്നുകയറാനോ സ്വന്തം അഭിപ്രായങ്ങൾ മറ്റുള്ളവരുടെ മേൽ അടിച്ചേൽപ്പിക്കാനോ സമസ്ത ഒരിക്കലും ശ്രമിച്ചിട്ടില്ലെന്നും നേതാക്കൾ വ്യക്തമാക്കി. സ്ത്രീകളുടെ വിദ്യാഭ്യാസത്തിന് ഇസ്‌ലാം ഒരിക്കലും എതിരല്ലെന്നും മറിച്ച് അത് ശക്തമായി പ്രോത്സാഹിപ്പിക്കുന്നുണ്ടെന്നും പ്രസ്താവനയിലുണ്ട്.

സ്ത്രീകൾ അധ്യാപനം, വൈദ്യശാസ്ത്രം തുടങ്ങിയ വിവിധ സാമൂഹിക സേവന മേഖലകളിൽ പ്രവർത്തിക്കുന്നതിനോ ഉന്നത വിദ്യാഭ്യാസം നേടുന്നതിനോ യാതൊരുവിധ എതിർപ്പുമില്ല. എന്നാൽ, പഠനവും തൊഴിലും ധാർമ്മികമായ അതിരുകൾ ലംഘിക്കുന്നതിലേക്കോ, കുടുംബത്തിലെ സ്ത്രീ എന്ന നിലയിലുള്ള ഉത്തരവാദിത്തങ്ങൾ നിർവഹിക്കുന്നതിനോ തടസ്സമായി മാറരുത് എന്ന ജാഗ്രത മാത്രമാണ് ഇതിലൂടെ മുന്നോട്ടുവെക്കുന്നത്.

സ്ത്രീകളെ താഴ്ത്തിക്കെട്ടാനല്ല ഇത്, മറിച്ച് സമൂഹത്തിന്റെ അടിസ്ഥാന ഘടകമായ കുടുംബം തകരാതെ കാത്തുസൂക്ഷിക്കുക എന്നതാണ് പ്രധാനം. ഈ യാഥാർത്ഥ്യങ്ങൾ മനസ്സിലാക്കാൻ തയ്യാറാകാതെ ഇതിനുപിന്നിൽ രാഷ്ട്രീയ ലക്ഷ്യങ്ങൾ ആരോപിച്ച് നടത്തുന്ന അടിസ്ഥാനരഹിതമായ വിമർശനങ്ങളിൽ നിന്നും ബന്ധപ്പെട്ട

മുഴുവൻ ആളുകളും പിന്തിരിയണമെന്ന് കേരള മുസ്‌ലിം ജമാഅത്ത് ആവശ്യപ്പെട്ടു. സംഘടനയുടെ യോഗത്തിൽ സി.

മുഹമ്മദ് ഫൈസി അധ്യക്ഷത വഹിച്ചു. പേരോട് അബ്ദുറഹ്മാൻ സഖാഫി, മാരായമംഗലം അബ്ദുറഹ്മാൻ ഫൈസി, വണ്ടൂർ അബ്ദുറഹ്മാൻ ഫൈസി, സയ്യിദ് താഹാ സഖാഫി, ബി.എസ്.

അബ്ദുള്ള കുഞ്ഞി ഫൈസി, എൻ. അലി അബ്ദുല്ല, മജീദ് കക്കാട്, മാളിയേക്കൽ സുലൈമാൻ സഖാഫി, സി.പി.

സൈതലവി മാസ്റ്റർ, മുസ്തഫ കോഡൂർ, എം.കെ. ഹാമിദ് മാസ്റ്റർ തുടങ്ങിയ പ്രമുഖർ ചർച്ചകളിൽ പങ്കെടുത്തു.