യുഡിഎഫ് സർക്കാരിന്റെ നൂറു ദിവസങ്ങൾ: അനുഭവങ്ങളും വിലയിരുത്തലുകളുമായി കെ.ഫിജിൽ

ആകെ 1826 ദിവസങ്ങളുള്ള ഭരണകാലയളവിൽ 100 ദിവസങ്ങൾ മാത്രമാണ് പിന്നിട്ടിരിക്കുന്നത്. ഇനിയും സമയം ഏറെ ബാക്കിയുണ്ടെന്ന നിലപാടിലാണ് യുവതലമുറ.

യുഡിഎഫ് സർക്കാർ അധികാരമേറ്റ് 100 ദിവസങ്ങൾ പൂർത്തിയാക്കുന്ന വേളയിൽ, ഭരണനേട്ടങ്ങളെയും തിരഞ്ഞെടുപ്പ് വാഗ്ദാനങ്ങളെയും പുതിയ കാലം എങ്ങനെ നോക്കിക്കാണുന്നു എന്ന് വ്യക്തമാക്കുകയാണ് തിരഞ്ഞെടുപ്പ് കാലത്ത് വാഹന മോഡിഫിക്കേഷനുമായി ബന്ധപ്പെട്ട് മുഖ്യമന്ത്രിയോട് ചോദ്യമുന്നയിച്ച് ശ്രദ്ധേയനായ മലപ്പുറം എടക്കര സ്വദേശി കെ.ഫിജിൽ. രൂപമാറ്റം സംബന്ധിച്ച ഫിജിലിന്റെ ചോദ്യത്തിന് മറുപടിയായുള്ള മുഖ്യമന്ത്രിയുടെ പ്രതികരണം ഏറെ തരംഗം സൃഷ്ടിച്ചിരുന്നു.

തിരഞ്ഞെടുപ്പ് സമയത്ത് ഏറെ ചർച്ച ചെയ്യപ്പെട്ട ഒന്നായിരുന്നു വാഹന മോഡിഫിക്കേഷൻ നിയമങ്ങളിൽ ഇളവ് വരുത്തുമെന്ന വാഗ്ദാനം.

വാഹനം രൂപമാറ്റം വരുത്തുന്നത് കേന്ദ്ര മോട്ടർ വാഹന നിയമത്തിന്റെ പരിധിയിൽ വരുന്നതാണെങ്കിലും, വിഷയത്തിൽ വ്യക്തമായ ധാരണയില്ലാതെയാണോ സർക്കാർ ഇത്തരമൊരു വാഗ്ദാനം നൽകിയത് എന്ന ചോദ്യത്തിന് ഫിജിൽ മറുപടി നൽകുന്നു. ഒരു മുഖ്യമന്ത്രി ഇതേക്കുറിച്ച് പഠിക്കാതെ വാക്ക് തരുമെന്ന് കരുതുന്നില്ലെന്നും, അപകടകരമല്ലാത്ത വിധത്തിലുള്ള മോഡിഫിക്കേഷനുകൾ അനുവദിക്കുമെന്നാണ് മുഖ്യമന്ത്രി പറഞ്ഞതെന്നും അദ്ദേഹം വ്യക്തമാക്കി.

പൂർണമായ മോഡിഫിക്കേഷൻ അനുവദിച്ചാൽ ഉണ്ടാകുന്ന അപകടങ്ങളെക്കുറിച്ച് തനിക്കും ബോധ്യമുണ്ടെന്ന് ഫിജിൽ പറയുന്നു. ഗ്ലാസുകൾ അമിതമായി ഡാർക്ക് ചെയ്താൽ കുട്ടികളെ തട്ടിക്കൊണ്ടുപോകൽ അടക്കമുള്ള കുറ്റകൃത്യങ്ങൾ കൂടുമെന്നും, വാഹനത്തിന്റെ രൂപം പൂർണമായി മാറിയാൽ കുറ്റകൃത്യം നടത്തുന്ന വണ്ടി ഏതാണെന്ന് തിരിച്ചറിയാൻ പോലും കഴിയില്ലെന്നും അദ്ദേഹം ചൂണ്ടിക്കാട്ടുന്നു.

കൂടാതെ വലിയ രീതിയിലുള്ള ശബ്ദമലിനീകരണവും ഒഴിവാക്കേണ്ടതാണ്. എന്നാൽ ഓഫ്‌റോഡ് വാഹനങ്ങളുടെ കാര്യത്തിൽ ഇളവുകൾ വേണമെന്നാണ് അദ്ദേഹത്തിന്റെ പക്ഷം.

നമ്മുടെ നാട്ടിൽ പ്രളയവും പ്രകൃതിദുരന്തങ്ങളും പതിവായതിനാൽ, ഇത്തരം അടിയന്തര ഘട്ടങ്ങളിൽ രക്ഷാപ്രവർത്തനങ്ങൾക്ക് ഓഫ്‌റോഡ് വാഹനങ്ങൾ അത്യന്താപേക്ഷിതമാണെന്നും അദ്ദേഹം കൂട്ടിച്ചേർത്തു. കേന്ദ്രനിയമത്തിന്റെ പരിമിതികൾക്കുള്ളിൽ നിന്നുകൊണ്ട് യുവതലമുറയ്ക്കായി സാധ്യമായ എല്ലാ കാര്യങ്ങളും ചെയ്യാൻ മുഖ്യമന്ത്രിയും സർക്കാരും നന്നായി ശ്രമിക്കുന്നുണ്ട് എന്നതിൽ താൻ തൃപ്തനാണെന്നും ഫിജിൽ വ്യക്തമാക്കുന്നു.

വിദ്യാഭ്യാസം, തൊഴിൽ, സ്റ്റാർട്ടപ്പുകൾ: യുവത്വത്തിന് മുൻഗണന നൽകുന്നുണ്ടോ? വാഹന മോഡിഫിക്കേഷന് പുറമെ യുവതലമുറയെ കേന്ദ്രീകരിച്ചുള്ള നിരവധിയായ പ്രഖ്യാപനങ്ങളാണ് കഴിഞ്ഞ ബജറ്റിൽ സർക്കാർ ഉൾപ്പെടുത്തിയത്. ജെൻസീ സ്റ്റാർട്ടപ്പുകൾക്കായി 50 കോടിയുടെ വകയിരുത്തലും, കണ്ടന്റ് ക്രിയേറ്റർമാർക്ക് തങ്ങളുടെ കഴിവുകൾ പ്രകടിപ്പിക്കാൻ പ്രദർശനവേദികൾ ഒരുക്കുമെന്ന പ്രഖ്യാപനവും ഇതിൽ എടുത്തുപറയേണ്ടതാണ്.

ഈ തീരുമാനങ്ങളിൽ 100 ശതമാനവും താൻ തൃപ്തനാണെന്ന് ഫിജിൽ പറയുന്നു. അഞ്ചു വർഷത്തെ ഭരണകാലയളവിൽ ആകെ 1826 ദിവസങ്ങളാണുള്ളത്.

അതിൽ വെറും 100 ദിവസങ്ങൾ മാത്രമാണ് ഇപ്പോൾ കഴിഞ്ഞിട്ടുള്ളത്. മുൻ സർക്കാരുകളുടെ ആദ്യ 100 ദിവസങ്ങളുമായി താരതമ്യം ചെയ്താൽ തന്നെ ഇത്രയും ചുരുങ്ങിയ സമയത്തിനുള്ളിൽ വലിയ കാര്യങ്ങളാണ് ഇവിടെ നടന്നിട്ടുള്ളത്.

പഴയ കാര്യങ്ങൾ വീണ്ടും കൊണ്ടുവരുന്നതിന് പകരം ഭാവിയിലേക്ക് ഉപകരിക്കുന്ന പുതിയ ആശയങ്ങൾ കൊണ്ടുവരാൻ ഈ സർക്കാരിന് സാധിക്കുന്നുണ്ടെന്നും അദ്ദേഹം വിലയിരുത്തുന്നു. സർക്കാരിന്റെ തുടക്കത്തിലെ നേട്ടങ്ങൾ എന്തൊക്കെയാണ്? സർക്കാരിന്റെ ഏറ്റവും വലിയ വിജയങ്ങളിൽ ഒന്ന് ലഹരിസംഘങ്ങൾക്കെതിരെ ആരംഭിച്ച ‘ഓപ്പറേഷൻ തൂഫാൻ’ എന്ന ദൗത്യമാണ്.

സത്യം പറഞ്ഞാൽ ഓപ്പറേഷൻ തൂഫാൻ പോസിറ്റീവ് ആയ കാര്യമാണെന്നും, ഇതുവരെ കാണാത്ത തരത്തിലുള്ള അതിശക്തമായ ലഹരിവേട്ടയാണ് നടക്കുന്നതെന്നും ഫിജിൽ അഭിപ്രായപ്പെടുന്നു. ലഹരി വിൽക്കുന്നവരെയും ഉപയോഗിക്കുന്നവരെയും പിടികൂടുന്ന കാഴ്ചകൾ കാണുമ്പോൾ തന്നെ ഉള്ളിൽ ഒരു ആവേശം തോന്നുന്നുണ്ടെന്നും, ഇതിന് രമേശ് ചെന്നിത്തല സാറിന് ഒരു ബിഗ് സല്യൂട്ട് നൽകണമെന്നും അദ്ദേഹം പറഞ്ഞു.

കൂടാതെ കെഎസ്ആർടിസിയുമായി ബന്ധപ്പെട്ട് സ്ത്രീകൾക്കായി നടപ്പിലാക്കിയ പ്രിയദർശിനി പദ്ധതിയും എടുത്തുപറയേണ്ടതാണെന്ന് അദ്ദേഹം കൂട്ടിച്ചേർത്തു. സർക്കാരിന്റെ ഭാവി എങ്ങനെയാണ്, എന്താണ് വിലയിരുത്തൽ? രാഷ്ട്രീയക്കാരൻ എന്ന നിലയിലല്ല, ഒരു സാധാരണക്കാരനായി ചിന്തിക്കുമ്പോൾ തന്നെ ഈ 100 ദിവസം കൊണ്ട് വലിയ മാറ്റങ്ങൾ കൊണ്ടുവരാൻ സർക്കാരിന് കഴിഞ്ഞിട്ടുണ്ടെന്ന് ഫിജിൽ പറയുന്നു.

എന്നാൽ ഈ 100 ദിവസത്തെ നേട്ടങ്ങളിൽ മാത്രം സർക്കാർ ഒതുങ്ങിപ്പോകരുത്. അഞ്ചു വർഷത്തേക്ക് ജനങ്ങൾക്ക് വേണ്ടത് എന്തൊക്കെയാണോ, അത് ഇതിലും മികച്ച രീതിയിൽ ചെയ്തു തീർക്കാൻ സർക്കാരിന് സാധിക്കണം.

ഓണക്കാലത്ത് വിപണിയിൽ ഉൽപന്നങ്ങൾ എത്തിക്കുന്നതിലും ക്ഷേമ ആനുകൂല്യങ്ങളുടെ വിതരണത്തിലും സർക്കാർ കാണിച്ച അതിവേഗ ഇടപെടലുകൾ ജനങ്ങൾക്ക് നേരിട്ട് അനുഭവപ്പെടാനായി. എന്നാൽ, പല ജില്ലകളും പ്രളയത്തിൽ മുങ്ങിയപ്പോൾ ഈ ആസൂത്രണവും വേഗവും മുന്നൊരുക്കത്തിൽ പ്രതിഫലിച്ചോ എന്ന സംശയം ബാക്കിയാണെന്ന് അദ്ദേഹം ചൂണ്ടിക്കാട്ടുന്നു.

ദുരന്തം വിതച്ച ശേഷമുള്ള ഇടപെടലുകളേക്കാൾ പ്രധാനം മുൻകരുതലുകളായിരുന്നു എന്ന വിമർശനം ശക്തമാണ്. അതേസമയം, മുഖ്യമന്ത്രിയെയും മന്ത്രിമാരെയും എപ്പോഴും നേരിൽക്കണ്ട് പരാതി അറിയിക്കാം എന്നതാണ് ഈ സർക്കാരിൽ ജനങ്ങൾ കാണുന്ന പ്രധാന മാറ്റമെന്നും ഫിജിൽ കൂട്ടിച്ചേർത്തു.