മഴക്കാല അവധികളും ജില്ലാ കലക്ടർമാരുടെ അധികാരങ്ങളും: അറിയേണ്ടതെല്ലാം

പ്രകൃതിക്ഷോഭ വേളകളിൽ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിക്കുന്നതുമായി ബന്ധപ്പെട്ട് ജില്ലാ കലക്ടർമാർക്കുള്ള നിയമപരമായ അധികാരങ്ങളെക്കുറിച്ചുള്ള വിവരങ്ങൾ താഴെ പറയുന്നവയാണ്. ദേശീയ ദുരന്ത നിവാരണ നിയമം 2005ലെ ദേശീയ ദുരന്ത നിവാരണ നിയമം പ്രാബല്യത്തിൽ വന്ന ശേഷമാണ് കലക്ടർമാർക്ക് അവധി പ്രഖ്യാപിക്കാനുള്ള നിയമപരമായ അധികാരം ലഭിച്ചത്.

മുൻകാലങ്ങളിൽ അതത് പ്രദേശങ്ങളിലെ സാഹചര്യങ്ങൾ വിലയിരുത്തി വിദ്യാഭ്യാസ വകുപ്പ് ഉദ്യോഗസ്ഥരോ തഹസിൽദാർമാരോ ആയിരുന്നു ഇത്തരം തീരുമാനങ്ങൾ എടുത്തിരുന്നത്. 2018 ലെ മഹാപ്രളയത്തിനു ശേഷമാണ് കേന്ദ്ര കാലാവസ്ഥാ വകുപ്പിന്റെ റെഡ്, ഓറഞ്ച് അലർട്ടുകൾ കൃത്യമായി വിലയിരുത്തി കലക്ടർമാർ നേരിട്ട് അവധി പ്രഖ്യാപിക്കുന്ന രീതി കൂടുതൽ കർശനവും വ്യവസ്ഥാപിതമായി മാറിയത്.

ഓരോ ജില്ലയിലെയും ജില്ലാ ദുരന്ത നിവാരണ അതോറിറ്റിയുടെ ചെയർമാൻ അതത് ജില്ലാ കലക്ടറാണ്. പ്രകൃതിക്ഷോഭങ്ങളോ അപകടങ്ങളോ ഉണ്ടാകാൻ സാധ്യതയുള്ളപ്പോൾ ജനങ്ങളുടെ ജീവനു സംരക്ഷണം നൽകാൻ ആവശ്യമായ അടിയന്തര നടപടികൾ സ്വീകരിക്കാൻ ഈ നിയമം കലക്ടർക്ക് പൂർണ അധികാരം നൽകുന്നു.

ദുരന്ത നിവാരണ നിയമത്തിലെ സെക്‌ഷൻ 30, 34 എന്നിവ പ്രകാരം കലക്ടർ പുറപ്പെടുവിക്കുന്ന അവധി ഉത്തരവ് ജില്ലയിലെ എല്ലാ സർക്കാർ, എയ്ഡഡ്, അൺ എയ്ഡഡ്, സിബിഎസ്ഇ, ഐസിഎസ്ഇ വിദ്യാലയങ്ങൾക്കും പ്രഫഷനൽ കോളജുകൾക്കും ബാധകമാണ്. സ്കൂളുകളുടെ അധ്യയന ദിവസങ്ങളും അവധികളും നിശ്ചയിക്കുന്നത് കേരള വിദ്യാഭ്യാസ ചട്ടങ്ങൾ (കെഇആർ) അനുസരിച്ചാണ്.

എന്നാൽ, അപ്രതീക്ഷിതമായി ഉണ്ടാകുന്ന വെള്ളപ്പൊക്കം, കനത്ത മഴ, മണ്ണിടിച്ചിൽ തുടങ്ങിയ അടിയന്തര സാഹചര്യങ്ങളിൽ കുട്ടികളുടെ യാത്രാസുരക്ഷ മുൻനിർത്തി സ്കൂളുകൾക്ക് അവധി നൽകാൻ ദുരന്ത നിവാരണ നിയമം വഴി കലക്ടർക്ക് പ്രത്യേക അധികാരമുണ്ട്. നിയമലംഘനം നടത്തിയാൽ ലഭിക്കുന്ന ശിക്ഷകൾ ജില്ലാ കലക്ടർ പ്രഖ്യാപിക്കുന്ന മഴ അവധി ലംഘിച്ച് വിദ്യാഭ്യാസ സ്ഥാപനങ്ങൾ പ്രവർത്തിച്ചാൽ 2005 ലെ ദേശീയ ദുരന്തനിവാരണ നിയമത്തിലെ സെക്‌ഷൻ 51 പ്രകാരം ശിക്ഷാനടപടികൾ സ്വീകരിക്കാം.

ഔദ്യോഗിക നിർദേശം ലംഘിക്കുകയോ തടസ്സപ്പെടുത്തുകയോ ചെയ്യുന്ന സ്ഥാപന മേധാവികൾക്കോ ഉത്തരവാദികളായവർക്കോ ഒരു വർഷം വരെ തടവ് ശിക്ഷ ലഭിക്കാം. നിയമലംഘനം മൂലം എന്തെങ്കിലും തരത്തിലുള്ള ജീവഹാനിയോ വലിയ അപകടങ്ങളോ സംഭവിച്ചാൽ ശിക്ഷയുടെ കാലാവധി രണ്ട് വർഷം വരെ ആയി ഉയർത്താം.

കോടതി നിശ്ചയിക്കുന്ന തുക പിഴയായോ, അല്ലെങ്കിൽ തടവും പിഴയും ഒന്നിച്ചോ ശിക്ഷയായി ലഭിക്കാം. നിർദേശം ലംഘിക്കുന്ന സ്വാശ്രയ / അൺഎയ്ഡഡ് സ്കൂളുകളുടെയും മറ്റ് സ്വകാര്യ വിദ്യാഭ്യാസ സ്ഥാപനങ്ങളുടെയും അംഗീകാരവും ലൈസൻസും റദ്ദാക്കാൻ കലക്ടർക്ക് വിദ്യാഭ്യാസ വകുപ്പിനോട് ശുപാർശ ചെയ്യാം.

സാധാരണയായി കലക്ടർമാർ അവധി പ്രഖ്യാപിക്കുമ്പോൾ മുൻകൂട്ടി നിശ്ചയിച്ച പൊതുപരീക്ഷകൾക്കും സർവകലാശാല പരീക്ഷകൾക്കും ഈ അവധി ബാധകമായിരിക്കില്ല എന്ന് പ്രത്യേകമായി ഉത്തരവിൽ പറയാറുണ്ട്. എന്നാൽ അതീവ ഗുരുതരമായ സാഹചര്യങ്ങളിൽ പരീക്ഷകൾ മാറ്റിവയ്ക്കാൻ സർവകലാശാലകളോട് കലക്ടർമാർക്ക് നിർദേശിക്കാനാകും.

ദുരന്തനിവാരണ നിയമപ്രകാരം കലക്ടർ നൽകുന്ന അവധി കാരണം വിദ്യാർഥികൾക്ക് നഷ്ടപ്പെടുന്ന അധ്യയന ദിനങ്ങൾ പിന്നീട് ശനിയാഴ്ചകളിലോ മറ്റ് അവധി ദിവസങ്ങളിലോ ക്ലാസുകൾ നടത്തി നികത്തണമെന്ന് വിദ്യാഭ്യാസ വകുപ്പ് പ്രത്യേകം ചട്ടങ്ങൾ പുറപ്പെടുവിച്ചിട്ടുണ്ട്. വിദ്യാർഥികൾക്ക് അവധിയായിരിക്കുമെങ്കിലും ദുരിതാശ്വാസ ക്യാംപുകൾ പ്രവർത്തിക്കുന്ന വിദ്യാലയങ്ങളിലെ അധ്യാപകരോടും ജീവനക്കാരോടും റവന്യു അധികൃതരെ സഹായിക്കാൻ ഹാജരാകാൻ കലക്ടർമാർക്ക് നിർദേശിക്കാം.

ഇത് ലംഘിക്കുന്നതും ഔദ്യോഗിക കൃത്യനിർവഹണം തടസപ്പെടുത്തുന്നതിന്റെ പരിധിയിൽ വരും. അവധി തീരുമാനിക്കുന്നതിനുള്ള മാനദണ്ഡങ്ങൾ കേന്ദ്ര കാലാവസ്ഥാ വകുപ്പ് നൽകുന്ന കാലാവസ്ഥാ പ്രവചനങ്ങളും ഉപഗ്രഹ ചിത്രങ്ങളും ദുരന്തനിവാരണ അതോറിറ്റി നിരന്തരമായി വിലയിരുത്തും.

സംസ്ഥാന തലത്തിൽ നിന്നുള്ള അടിയന്തര നിർദേശങ്ങളും ജാഗ്രതാ നിർദേശങ്ങളും കലക്ടർമാർക്ക് ലഭിക്കാറുണ്ട്. ജില്ലയിലെ ഡപ്യൂട്ടി ഡയറക്ടർ ഓഫ് എഡ്യൂക്കേഷൻ (ഡിഡിഇ), ജില്ലാ വിദ്യാഭ്യാസ ഓഫിസർമാർ (ഡിഇഒ) എന്നിവരുമായി ബന്ധപ്പെട്ട് വിദ്യാലയങ്ങളുടെ സാഹചര്യം വിലയിരുത്തും.

ജില്ലയിലെ വിവിധ താലൂക്കുകളിലെയും വില്ലേജുകളിലെയും കൃത്യമായ വിവരങ്ങൾ തഹസിൽദാർമാർ വഴി കലക്ടർ ശേഖരിക്കും. ഗതാഗത തടസ്സങ്ങളോ അപകടങ്ങളോ നിലവിലുണ്ടോ എന്ന് ഈ വകുപ്പുകളിൽ നിന്ന് അറിയുന്നു.

കുട്ടികൾക്ക് സ്കൂളുകളിലേക്ക് സുരക്ഷിതമായി എത്തിച്ചേരാൻ സാധിക്കുമോ, റോഡുകളിലോ സ്കൂൾ പരിസരങ്ങളിലോ വെള്ളം കയറിയിട്ടുണ്ടോ, ജില്ലയിലെ ഏതെങ്കിലും സ്കൂളുകൾ നിലവിൽ ദുരിതാശ്വാസ ക്യാംപുകളായി പ്രവർത്തിക്കുന്നുണ്ടോ, രാത്രി മുഴുവൻ പെയ്ത മഴ രാവിലെയും ശക്തമായി തുടരുമോ എന്നീ കാര്യങ്ങളാണ് പ്രധാനമായും പരിഗണിക്കുന്നത്. പുലർച്ചെയുള്ള കാലാവസ്ഥാ മാറ്റങ്ങളും, തഹസിൽദാർമാരിൽ നിന്നുള്ള പ്രാദേശിക വിവരങ്ങൾ ലഭിക്കാൻ എടുക്കുന്ന സമയവുമാണ് പലപ്പോഴും രാവിലെ 6 മണിക്കോ 7 മണിക്കോ ഒക്കെ അവധി പ്രഖ്യാപിക്കാൻ കാരണമാകുന്നത്.

ഇത് വിദ്യാർഥികൾക്കും രക്ഷിതാക്കൾക്കും ബുദ്ധിമുട്ട് ഉണ്ടാക്കാറുള്ളതിനാൽ, തലേദിവസം രാത്രി തന്നെ കൂടിയാലോചനകൾ നടത്തി കഴിവതും രാത്രി ഒൻപത് മണിയോടെ അവധി പ്രഖ്യാപിക്കണമെന്ന് കലക്ടർമാർക്ക് നിർദേശമുണ്ട്.