പിഎം സൂര്യഘർ പദ്ധതിയിൽ ചരിത്രക്കുതിപ്പ്; ഓരോ 6 ദിവസത്തിലും ഒരുലക്ഷം പുതിയ കുടുംബങ്ങൾ ഭാഗമാകുന്നു

രാജ്യത്ത് നരേന്ദ്ര മോദി സർക്കാർ നടപ്പിലാക്കി വരുന്ന പുരപ്പുറ സോളർ സബ്സിഡി പദ്ധതിയായ ‘പിഎം സൂര്യഘർ മുഫ്ത് ബിജ്‍ലി’ യോജന വൻ ജനപ്രീതി നേടി മുന്നേറുന്നു. ലഭ്യമായ ഏറ്റവും പുതിയ ഔദ്യോഗിക കണക്കുകൾ പ്രകാരം, കേവലം ഓരോ 6 ദിവസത്തിലൊരിക്കൽ ഒരുലക്ഷം പുതിയ കുടുംബങ്ങളാണ് ഈ പദ്ധതിയിലേക്ക് കടന്നുവരുന്നത്.

ഇതുവരെ രാജ്യത്താകെ 49.44 ലക്ഷം വീടുകൾ ഈ പദ്ധതിയുടെ ഭാഗമായിക്കഴിഞ്ഞു. ആസൂത്രിത ലക്ഷ്യങ്ങളുടെ ഭാഗമായി, 2026ന്റെ അവസാനത്തോടെ 75 ലക്ഷം വീടുകളിൽ സോളർ സംവിധാനം എത്തിക്കാനാണ് കേന്ദ്രസർക്കാർ ലക്ഷ്യമിടുന്നത്.

കേരളത്തിൽ ഉൾപ്പെടെ അത്യധികം സ്വീകാര്യത കൈവരിച്ച ഈ പദ്ധതിക്കായി ആകെ 75,021 കോടി രൂപയാണ് കേന്ദ്രസർക്കാർ വകയിരുത്തിയിട്ടുള്ളത്. ഇതിൽ ഇതുവരെ 27,855.99 കോടി രൂപ സബ്സിഡി ഇനത്തിൽ മാത്രം ഉപഭോക്താക്കളുടെ അക്കൗണ്ടുകളിലേക്ക് നേരിട്ട് കൈമാറിയിട്ടുണ്ട്.

2024ൽ തുടക്കം കുറിച്ച ഈ പദ്ധതിയുടെ ആദ്യ ഒരുലക്ഷം ഗുണഭോക്താക്കളെ കണ്ടെത്താൻ 118 ദിവസങ്ങൾ വേണ്ടിവന്നിരുന്നു. എന്നാൽ പദ്ധതിയിലേക്ക് ആളുകൾ ഒഴുകിയെത്തിയതോടെ വേഗത വർദ്ധിച്ചു.

ഉപഭോക്താക്കളുടെ എണ്ണം 20 ലക്ഷത്തിലേക്ക് അടുവേ ഓരോ ലക്ഷം പേരെയും ചേർത്തുവെക്കാൻ 19 ദിവസങ്ങൾ മതിയെന്നായി. ഈ വളർച്ചയാണ് നിലവിൽ വെറും 6 ദിവസമായി ചുരുങ്ങിയിരിക്കുന്നത്.

രാജ്യമാകെ ഇതുവരെ 14,653.23 മെഗാവാട്ട് ഉൽപാദന ശേഷിയുള്ള പുരപ്പുറ സോളറുകളാണ് സ്ഥാപിക്കപ്പെട്ടിട്ടുള്ളത്. കേരളത്തിന്റെ കണക്കുകൾ പരിശോധിക്കുമ്പോൾ, സംസ്ഥാനത്ത് ഇതുവരെ 4,21,734 അപേക്ഷകളാണ് ലഭിച്ചിട്ടുള്ളത്.

ഇതിൽ 3.17 ലക്ഷം വീടുകൾ ഇതിനോടകം പദ്ധതിയുടെ ഭാഗമായി മാറി. കേരളത്തിലെ സംയോജിത ഉൽപാദന ശേഷി 1203.02 മെഗാവാട്ടാണ്.

സംസ്ഥാനത്തെ ഉപഭോക്താക്കൾക്കായി ഇതുവരെ 2073.8 കോടി രൂപയാണ് സബ്സിഡിയായി അനുവദിച്ചിട്ടുള്ളത്. ഇതിൽ തന്നെ തൃശൂർ, കൊല്ലം, ആലപ്പുഴ ജില്ലകളാണ് രാജ്യത്ത് പുരപ്പുറ സോളർ വ്യാപനത്തിൽ മുൻനിരയിൽ നിൽക്കുന്നത്.

പദ്ധതിയുടെ വൻ വിജയത്തിന്റെ പശ്ചാത്തലത്തിൽ, ഇതിന്റെ രണ്ടാം ഘട്ടം (2.0) അവതരിപ്പിക്കാനുള്ള ആലോചനയിലാണ് കേന്ദ്രസർക്കാർ ഇപ്പോൾ ഉള്ളത്. പുതിയ ഘട്ടത്തിൽ ഉപഭോക്താക്കൾക്ക് കൂടുതൽ വായ്പാ സൗകര്യങ്ങൾ, ദീർഘകാല സർവീസ്, പുരപ്പുറം പങ്കുവെക്കൽ (റൂഫ്ടോപ് ഷെയറിങ്), മെച്ചപ്പെട്ട

ബാറ്ററി സ്റ്റോറേജ് തുടങ്ങിയ ആധുനിക സൗകര്യങ്ങൾ പ്രതീക്ഷിക്കാവുന്നതാണ്. സ്വന്തമായി അനുയോജ്യമായ മേൽക്കൂര ഇല്ലാത്ത വീടുകൾക്ക്, സമീപത്തെ മറ്റൊരു മേൽക്കൂരയിൽ സോളർ സ്ഥാപിച്ച് ആ വൈദ്യുതി ഉപയോഗപ്പെടുത്താനുള്ള പ്രത്യേക സൗകര്യവും രണ്ടാം ഘട്ടത്തിന്റെ പ്രധാന ആകർഷണമായിരിക്കും.

സബ്സിഡി ഘടന എങ്ങനെ? പിഎം സൂര്യ ഘർ മുഫ്ത് ബിജ്‍ലി യോജനയുടെ കീഴിൽ പ്രധാനമായും 3 വിഭാഗങ്ങളിലായാണ് ഉപഭോക്താക്കൾക്ക് സാമ്പത്തിക സഹായം ലഭിക്കുന്നത്. 1 കിലോവാട്ട് സോളർ സിസ്റ്റം സ്ഥാപിക്കുന്നവർക്ക് 30,000 രൂപവരെയും, 2 കിലോവാട്ടിന് 60,000 രൂപവരെയും സബ്സിഡി ലഭിക്കും.

അതേസമയം 3 കിലോവാട്ട് സിസ്റ്റത്തിന് പരമാവധി 78,000 രൂപയാണ് സബ്സിഡിയായി ലഭിക്കുക. വൈദ്യുതി ബിൽ എങ്ങനെ ലാഭിക്കാം? ഉദാഹരണത്തിന്, നിങ്ങൾ നിലവിൽ പ്രതിമാസം 300 യൂണിറ്റ് വൈദ്യുതി ഉപയോഗിക്കുകയും അതിനായി 2400 രൂപ ബിൽ അടയ്ക്കുകയും ചെയ്യുന്നുവെന്ന് കരുതുക.

ഈ സാഹചര്യത്തിൽ പരമാവധി സബ്സിഡി ലഭിക്കുന്ന 3 കിലോവാട്ടിന്റെ സോളർ സിസ്റ്റം മേൽക്കൂരയിൽ സ്ഥാപിച്ചാൽ 250 മുതൽ 350 യൂണിറ്റുവരെ വൈദ്യുതി ഉൽപാദിപ്പിക്കാൻ സാധിക്കും. അതായത്, നിങ്ങളുടെ പ്രതിമാസ വൈദ്യുതി ബിൽ ഏറക്കുറെ പൂജ്യമായി മാറുമെന്നർത്ഥം.

നിങ്ങൾ സ്ഥാപിക്കുന്നത് 1 കിലോവാട്ട് സിസ്റ്റം ആണെങ്കിൽ ഉൽപാദനം ഏകദേശം 90 മുതൽ 120 യൂണിറ്റുവരെയായിരിക്കും. 2 കിലോവാട്ട് സിസ്റ്റമാണെങ്കിൽ അത് 180 മുതൽ 250 യൂണിറ്റുവരെ ലഭിക്കും.

ഏത് രീതിയിൽ നോക്കിയാലും പ്രതിമാസ വൈദ്യുതി ബില്ലിൽ വലിയ കുറവ് വരുത്താൻ ഈ പദ്ധതിക്ക് സാധിക്കും. ചെലവും മുടക്കുമുതൽ തിരിച്ചുപിടിക്കലും ഒരു കിലോവാട്ട് സോളർ സിസ്റ്റം സ്ഥാപിക്കുന്നതിനായി പൊതുവെ 60,000 രൂപ മുതൽ 80,000 രൂപവരെ ചെലവ് വരാം.

ഇതിൽ സർക്കാർ നൽകുന്ന പരമാവധി സബ്സിഡി 30,000 രൂപയാണ്. അതിനാൽ ഉപഭോക്താവിന് യഥാർത്ഥത്തിൽ ചെലവാകുന്നത് 30,000 മുതൽ 50,000 രൂപവരെ മാത്രമാണ്.

വൈദ്യുതി ബില്ലിലുണ്ടാകുന്ന ലാഭം കൂടി കണക്കിലെടുത്താൽ ഏകദേശം 4 വർഷത്തിനകം മുടക്കിയ തുക തിരിച്ചുപിടിക്കാനാകും. വിപണിയിലെ കണക്കുകൾ പ്രകാരം 2 കിലോവാട്ട് സിസ്റ്റം സ്ഥാപിക്കാൻ 1.20 ലക്ഷം മുതൽ 1.60 ലക്ഷം രൂപവരെ ചെലവ് വന്നേക്കാം.

ഇതിൽ 60,000 രൂപവരെ സബ്സിഡി ലഭിക്കും. 5 വർഷത്തിനകം മുടക്കുമുതൽ പൂർണ്ണമായും തിരിച്ചുപിടിക്കാൻ സാധിക്കും.

3 കിലോവാട്ട് സിസ്റ്റത്തിന് 1.80 ലക്ഷം രൂപ മുതൽ 2.5 ലക്ഷം രൂപവരെയാണ് ചെലവ് പ്രതീക്ഷിക്കുന്നത്. ഇതിൽ 78,000 രൂപ സബ്സിഡി ലഭിക്കുന്നതിനാൽ 5-6 വർഷത്തിനുള്ളിൽ മുതൽമുടക്ക് തിരികെ ലഭിക്കുമെന്നാണ് കണക്കുകൾ വ്യക്തമാക്കുന്നത്.

സോളർ പ്ലാന്റിൽ ഉൽപാദിപ്പിക്കുന്ന അധിക വൈദ്യുതി കെഎസ്ഇബിയുടെ ഗ്രിഡിലേക്ക് നൽകുന്നതും ഉപഭോക്താക്കൾക്ക് വലിയ സാമ്പത്തിക ലാഭം സമ്മാനിക്കും. ചില ഉപഭോക്താക്കൾ ബാങ്ക് വായ്പയെടുത്താകും സോളർ സിസ്റ്റം സ്ഥാപിക്കുന്നത്.

അങ്ങനെയുള്ളവർക്ക് മുടക്കുമുതൽ തിരികെപ്പിടിക്കാൻ ഒന്നോ രണ്ടോ വർഷം കൂടി അധികമായി വേണ്ടിവന്നേക്കാം.