നീലക്കുറിഞ്ഞി സീസൺ; ഗൂഡല്ലൂരിൽ വനത്തിനുള്ളിലേക്ക് സഞ്ചാരികൾക്ക് കർശന നിയന്ത്രണവുമായി വനംവകുപ്പ്

ഗൂഡല്ലൂർ ∙ നീലക്കുറിഞ്ഞി പൂക്കൾ കാണാൻ വിനോദസഞ്ചാരികളുടെ വലിയ ഒഴുക്ക് ആരംഭിച്ച പശ്ചാത്തലത്തിൽ, വനത്തിനുള്ളിലേക്കുള്ള അനധികൃത പ്രവേശനം തടയാൻ കർശന നടപടികളുമായി വനംവകുപ്പ് രംഗത്ത്. റിസർവ് വനമേഖലയിലെ കുറിഞ്ഞിവസന്തം ആസ്വദിക്കാൻ എത്തുന്നവർ വനത്തിലേക്ക് അതിക്രമിച്ചു കയറുന്നത് പതിവായതിനെ തുടർന്നാണ് അധികൃതർ പ്രതിരോധ നടപടികൾ ശക്തമാക്കിയിരിക്കുന്നത്.

എങ്കിലും, റിസർവ് വനത്തിന് പുറത്തുള്ള പ്രദേശങ്ങളിൽ വിരിഞ്ഞിരിക്കുന്ന പൂക്കൾ കാണുന്നതിനും ചിത്രങ്ങൾ പകർത്തുന്നതിനും സഞ്ചാരികൾക്ക് തടസ്സമില്ല. ഇതിനായി സൂചിമല, പാണ്ഡ്യാർ മലനിരകൾ, ചന്ദനമല തുടങ്ങിയ പ്രദേശങ്ങളിൽ പ്രവേശനം അനുവദിച്ചിട്ടുണ്ട്.

ഈ മേഖലകളിൽ ഇത്രയധികം കുറിഞ്ഞിപ്പൂക്കൾ വിരിയുന്നത് ഇതാദ്യമായാണ്. വനത്തിനുള്ളിലേക്ക് ആളുകൾ പ്രവേശിക്കുന്നത് ഫലപ്രദമായി തടയുന്നതിനായി വിവിധയിടങ്ങളിൽ വനംവകുപ്പ് ഉദ്യോഗസ്ഥരെയും ജീവനക്കാരെയും വിന്യസിച്ചിട്ടുണ്ട്.

വനത്തോട് ചേർന്നുകിടക്കുന്ന പ്രദേശങ്ങളിൽ സന്ദർശകർ എത്തുമ്പോൾ വന്യജീവികളിൽ നിന്നുള്ള ആക്രമണത്തിന് സാധ്യതയേറെയാണെന്ന് അധികൃതർ മുന്നറിയിപ്പ് നൽകുന്നു. വംശനാശഭീഷണി നേരിടുന്ന സസ്യവിഭാഗമായതിനാൽ നീലക്കുറിഞ്ഞി ചെടികൾ പറിക്കുന്നത് നിയമപ്രകാരം കുറ്റകരമാണ്.

നിലവിൽ മലനിരകളിലും താഴ്‌വാരങ്ങളിലുമായി വ്യാപകമായി നീലക്കുറിഞ്ഞി പൂത്തുനിൽക്കുന്നുണ്ട്.