ഡിജിറ്റൽ കുറിപ്പുകൾക്കായി വൺനോട്ട് വേണോ സാംസങ് നോട്ട്സ് വേണോ? ഒരു മാസത്തെ ഉപയോഗത്തിന് ശേഷമുള്ള അനുഭവം

സ്മാർട്ട്ഫോൺ ഉപയോക്താക്കൾക്കിടയിൽ ഏറെ ചർച്ച ചെയ്യപ്പെടുന്ന വിഷയമാണ് മികച്ച നോട്ട് ടേക്കിംഗ് ആപ്പുകൾ ഏതെന്നുള്ളത്. വൺനോട്ട് (OneNote), സാംസങ് നോട്ട്സ് (Samsung Notes) എന്നിവ ഒരു മാസം ഒരേസമയം ഉപയോഗിച്ചുള്ള പരീക്ഷണത്തിലൂടെ ഇവയുടെ പ്രവർത്തനക്ഷമത വിലയിരുത്തുകയാണ്.

ഉപയോഗക്ഷമതയും വേഗതയും
ദൈനംദിന ഉപയോഗത്തിൽ കൂടുതൽ വേഗതയും വ്യക്തതയും അനുഭവപ്പെടുന്നത് സാംസങ് നോട്ട്സിനാണ്. ലളിതമായ ഇന്റർഫേസും എളുപ്പത്തിൽ കൈകാര്യം ചെയ്യാവുന്ന മെനുകളും ഇതിന്റെ പ്രത്യേകതയാണ്.

ആപ്പ് തുറന്ന ഉടൻ തന്നെ കുറിപ്പുകൾ എഴുതാനും ചിത്രം ചേർക്കാനും സാധിക്കുന്നു എന്നത് ഇതിനെ മികച്ചതാക്കുന്നു. എന്നാൽ സാംസങ് ഗാലക്സി എസ് 25 അൾട്രാ പോലുള്ള ഫോണുകളിൽ പോലും വൺനോട്ട് അല്പം ഭാരമേറിയ അനുഭവമാണ് നൽകുന്നത്.

സംവിധാനവും സുരക്ഷയും
കൂടുതൽ സങ്കീർണ്ണമായ ആവശ്യങ്ങൾക്ക് വൺനോട്ടാണ് കൂടുതൽ അനുയോജ്യം. നോട്ട്ബുക്കുകൾ, സെക്ഷനുകൾ, പേജുകൾ എന്നിങ്ങനെ കുറിപ്പുകളെ ചിട്ടയായി അടുക്കി വെക്കാൻ വൺനോട്ട് സഹായിക്കുന്നു.

സ്വകാര്യതയുടെ കാര്യത്തിൽ വൺനോട്ടിന്റെ സുരക്ഷാ ക്രമീകരണങ്ങൾ കൂടുതൽ ശക്തമാണ്. ഒരു വിഭാഗം മൊത്തത്തിൽ പാസ്‌വേഡ് ഉപയോഗിച്ച് സുരക്ഷിതമാക്കാൻ വൺനോട്ടിൽ സാധിക്കും.

സാംസങ് നോട്ട്സിൽ ഓരോ കുറിപ്പുകൾക്കും പ്രത്യേകമായി ലോക്ക് ഇടേണ്ടി വരുന്നത് വലിയ ഡാറ്റകൾ കൈകാര്യം ചെയ്യുമ്പോൾ അൽപ്പം പ്രയാസകരമാണ്. പിഡിഎഫ് കൈകാര്യം ചെയ്യലും എഴുത്തും
പിഡിഎഫ് ഡോക്യുമെന്റുകൾ എഡിറ്റ് ചെയ്യുന്നതിനും അതിൽ കുറിപ്പുകൾ രേഖപ്പെടുത്തുന്നതിനും സാംസങ് നോട്ട്സ് ഏറെ മുന്നിലാണ്.

എസ് പെൻ (S Pen) ഉപയോഗിക്കുമ്പോൾ ലഭിക്കുന്ന കൃത്യതയും വേഗതയും സാംസങ് നോട്ട്സിൽ മികച്ചതാണ്. വൺനോട്ടിലും ഈ സൗകര്യം ഉണ്ടെങ്കിലും സാംസങ്ങിന്റെ തനത് ആപ്പിൽ അത് കൂടുതൽ സ്വാഭാവികമായി അനുഭവപ്പെടുന്നു.

മറ്റ് പ്രത്യേകതകൾ
ക്രോസ് പ്ലാറ്റ്‌ഫോം ലഭ്യതയിൽ വൺനോട്ട് തന്നെയാണ് കേമൻ. ആൻഡ്രോയിഡ്, ഐഫോൺ, വിൻഡോസ്, മാക്, വെബ് തുടങ്ങി ഏത് പ്ലാറ്റ്‌ഫോമിലും വൺനോട്ട് സുഗമമായി പ്രവർത്തിക്കും.

എന്നാൽ സാംസങ് നോട്ട്സ് പ്രധാനമായും സാംസങ് ഉപകരണങ്ങളിലാണ് മികച്ച രീതിയിൽ പ്രവർത്തിക്കുന്നത്. അതേസമയം, ഫോൺ അൺലോക്ക് ചെയ്യാതെ തന്നെ പെട്ടെന്ന് കുറിപ്പുകൾ എഴുതാൻ സഹായിക്കുന്ന ‘സ്ക്രീൻ ഓഫ് മെമോ’, ജെമിനി (Gemini) ഇന്റഗ്രേഷൻ എന്നിവ സാംസങ് നോട്ട്സിന്റെ കരുത്താണ്.

അന്തിമ നിഗമനം
ക്രോസ് പ്ലാറ്റ്‌ഫോം ലഭ്യതയും മികച്ച സംഘടനാ സംവിധാനവുമാണ് വേണ്ടതെങ്കിൽ വൺനോട്ട് തിരഞ്ഞെടുക്കാം. എന്നാൽ സാംസങ് ഉപകരണങ്ങൾ മാത്രം ഉപയോഗിക്കുന്നവരും മികച്ച ഹാൻഡ്‌റൈറ്റിംഗ് അനുഭവവും വേഗത്തിലുള്ള പ്രവർത്തനവും ആഗ്രഹിക്കുന്നവരും സാംസങ് നോട്ട്സിന് മുൻഗണന നൽകുന്നതാണ് ഉചിതം.