ബ്രിട്ടനില് നിന്ന് ഇറക്കുമതി ചെയ്യുന്ന സ്കോച്ച് വിസ്കി, ജിന്, ചോക്ലേറ്റ്, ബിസ്ക്കറ്റ്, കാറുകള്, സൗന്ദര്യവര്ദ്ധക വസ്തുക്കള് എന്നിവയുടെ വിലയില് വരുംദിവസങ്ങളില് ഗണ്യമായ കുറവുണ്ടാകും. ഇന്ത്യ-യുകെ സമഗ്ര സാമ്പത്തിക വ്യാപാര കരാര് നാളെ മുതല് പ്രാബല്യത്തില് വരുന്നതോടെയാണിത്.
നീണ്ട ചര്ച്ചകള്ക്കൊടുവില് 2025 ജൂലൈ 24-നാണ് ഇന്ത്യയും യുകെയും ഈ ചരിത്രപരമായ കരാറില് ഒപ്പുവെച്ചത്.
ഇറക്കുമതി തീരുവയിലെ മാറ്റങ്ങള്
കരാറിന്റെ ഭാഗമായി ബ്രിട്ടീഷ് സ്കോച്ച് വിസ്കിയുടെയും ജിന്നിന്റെയും ഇറക്കുമതി തീരുവ 150 ശതമാനത്തില് നിന്ന് 75 ശതമാനമായി ഒറ്റയടിക്ക് കുറയ്ക്കും. പത്ത് വര്ഷത്തിനുള്ളില് ഇത് 40 ശതമാനത്തിലേക്ക് എത്തിക്കാനാണ് ലക്ഷ്യമിടുന്നത്.
ആഡംബര വാഹനങ്ങളുടെ കാര്യത്തിലും വലിയ മാറ്റങ്ങളുണ്ടാകും. നിലവില് 110 ശതമാനം വരെ ഇറക്കുമതി തീരുവയുള്ള ബ്രിട്ടീഷ് കാറുകളുടെ നികുതി പത്ത് വര്ഷത്തിനുള്ളില് 10 ശതമാനമായി കുറയും.
അതേസമയം, ഇന്ത്യയിലെ ഇലക്ട്രിക് വാഹന വിപണിയുടെ സുരക്ഷ കണക്കിലെടുത്ത് ഹൈബ്രിഡ് വാഹനങ്ങളുടെ ഇറക്കുമതിക്ക് കര്ശന നിയന്ത്രണങ്ങള് ഏര്പ്പെടുത്തിയിട്ടുണ്ട്. ചോക്ലേറ്റുകള്, ബിസ്ക്കറ്റുകള്, ശീതളപാനീയങ്ങള് എന്നിവയുടെ നികുതിയിലും ഇളവുകള് ലഭ്യമാകും.
ഇന്ത്യന് കയറ്റുമതി മേഖലയ്ക്ക് പുത്തനുണര്വ്
ഇന്ത്യന് ഉല്പ്പന്നങ്ങള്ക്ക് ബ്രിട്ടീഷ് വിപണിയില് പ്രവേശനം എളുപ്പമാകുന്നതാണ് കരാറിന്റെ മറ്റൊരു സവിശേഷത. ഇന്ത്യയില് നിന്നുള്ള 99 ശതമാനം ഉല്പ്പന്നങ്ങളും നികുതിരഹിതമായി ബ്രിട്ടനിലേക്ക് കയറ്റി അയക്കാം.
തുണിത്തരങ്ങള്, സമുദ്രോല്പ്പന്നങ്ങള്, തുകല്, ചെരുപ്പുകള്, കായിക ഉപകരണങ്ങള്, കളിപ്പാട്ടങ്ങള്, ആഭരണങ്ങള്, എന്ജിനീയറിങ് ഉല്പ്പന്നങ്ങള് എന്നിവയ്ക്ക് പുതിയ വിപണി സാധ്യതകള് തുറന്നുകിട്ടും. പ്രവാസികള്ക്ക് ആശ്വാസം
യുകെയില് ജോലി ചെയ്യുന്ന ഇന്ത്യന് പ്രൊഫഷണലുകള്ക്ക്, പ്രത്യേകിച്ച് ഐടി മേഖലയിലുള്ളവര്ക്ക് വലിയ സാമ്പത്തിക ലാഭമുണ്ടാക്കുന്നതാണ് പുതിയ തീരുമാനം.
ജൂലൈ 15 മുതല് പ്രാബല്യത്തില് വരുന്ന ‘ഡബിള് കോണ്ട്രിബ്യൂഷന് കണ്വെന്ഷന്’ പ്രകാരം, ബ്രിട്ടനിലെ സോഷ്യല് സെക്യൂരിറ്റിയിലേക്ക് ഇന്ത്യക്കാര് നല്കേണ്ട തുക ഒഴിവാക്കപ്പെടും.
ഇതിനുപകരമായി ആ തുക ഇന്ത്യയിലെ പിഎഫ് അക്കൗണ്ടിലേക്ക് മാറ്റാന് സാധിക്കും. ഇത് പ്രവാസികളുടെ ശമ്പളത്തിന്റെ 25 ശതമാനത്തോളം ലാഭിക്കാന് സഹായിക്കും.
കര്ഷകരുടെ താല്പ്പര്യങ്ങള് സംരക്ഷിക്കും
ഇന്ത്യന് കര്ഷകരെയും ചെറുകിട ക്ഷീരകര്ഷകരെയും ദോഷകരമായി ബാധിക്കാതിരിക്കാന് പാല് ഉല്പ്പന്നങ്ങള്, ആപ്പിള്, ചീസ്, പഞ്ചസാര, അരി, പോര്ക്ക്, കോഴിയിറച്ചി, മുട്ട
തുടങ്ങിയവയെ ഈ ഇറക്കുമതി തീരുവ ഇളവുകളില് നിന്ന് പൂര്ണ്ണമായും ഒഴിവാക്കിയിട്ടുണ്ട്. വ്യാപാര വളര്ച്ച ലക്ഷ്യമിട്ട്
2025-26 സാമ്പത്തിക വര്ഷത്തിലെ കണക്കുപ്രകാരം ഇന്ത്യ-യുകെ വ്യാപാരം 25.13 ബില്യണ് ഡോളറായി വര്ധിച്ചിട്ടുണ്ട്.
ഇതില് 13.44 ബില്യണ് ഡോളര് ഇന്ത്യയുടെ കയറ്റുമതിയും 11.68 ബില്യണ് ഡോളര് ഇറക്കുമതിയുമാണ്. ഈ കരാറിലൂടെ പത്ത് വര്ഷത്തിനുള്ളില് യുകെയില് നിന്നുള്ള കയറ്റുമതിക്കാര്ക്ക് പ്രതിവര്ഷം 900 ദശലക്ഷം പൗണ്ടിന്റെയും, ഇന്ത്യയില് നിന്നുള്ള ഇറക്കുമതിക്കാര്ക്ക് 220 ദശലക്ഷം പൗണ്ടിന്റെയും നികുതി ലാഭമാണ് പ്രതീക്ഷിക്കുന്നത്.
2040 ആകുമ്പോഴേക്കും ഉഭയകക്ഷി വ്യാപാരത്തില് വലിയ മുന്നേറ്റമുണ്ടാകുമെന്നാണ് കണക്കാക്കപ്പെടുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
