സോഷ്യൽ മീഡിയയിൽ കുട്ടികളെ ഉപയോഗിച്ചുള്ള ചൂഷണം: ചൈനയിൽ കർശന നിയന്ത്രണങ്ങളുമായി സർക്കാർ

സോഷ്യൽ മീഡിയ പ്ലാറ്റ്‌ഫോമുകളിൽ ലൈക്കുകളും വ്യൂസും വർധിപ്പിച്ച് പണം സമ്പാദിക്കാൻ സ്വന്തം കുട്ടികളെ ദുരുപയോഗം ചെയ്യുന്ന പ്രവണതയ്ക്കെതിരെ ചൈനീസ് സർക്കാർ നടപടികൾ കർശനമാക്കി. ‘ചൈൽഡ് ഇൻഫ്ലുവൻസർമാർ’ എന്ന പേരിൽ കുട്ടികളുടെ ശാരീരികവും മാനസികവുമായ ആരോഗ്യത്തെ ബാധിക്കുന്ന ദൃശ്യങ്ങൾ പ്രചരിക്കുന്നത് വ്യാപകമായതോടെയാണ് ഭരണകൂടം ഇടപെടലുമായി രംഗത്തെത്തിയത്.

വരുമാനമുണ്ടാക്കാനുള്ള ഉപാധിയായി കുട്ടികളെ മാറ്റുന്ന നടപടികൾ അപകടകരമായ തലത്തിലെത്തിയെന്ന് വിലയിരുത്തപ്പെടുന്നു. ഇതിന്റെ അടിസ്ഥാനത്തിൽ, പ്രായപൂർത്തിയാകാത്തവരെ ദോഷകരമായി ബാധിക്കുന്ന ഓൺലൈൻ ഉള്ളടക്കങ്ങൾ നിയന്ത്രിക്കുന്നതിനായി പുതിയ ചട്ടങ്ങൾ നിലവിൽ വന്നു.

സോഷ്യൽ മീഡിയയിലെ ഞെട്ടിക്കുന്ന സംഭവങ്ങൾ ചൈനീസ് സോഷ്യൽ മീഡിയയിൽ വലിയ വിവാദങ്ങൾക്ക് വഴിവെച്ച ചില സംഭവങ്ങൾ താഴെ പറയുന്നവയാണ്: – അമിതഭക്ഷണം കഴിപ്പിക്കൽ: കൂടുതൽ കാഴ്ചക്കാരെ നേടുന്നതിനായി മൂന്ന് വയസ്സ് മാത്രം പ്രായമുള്ള പെൺകുട്ടിയെ ലൈവ് സ്ട്രീമിങ്ങിലൂടെ മാതാപിതാക്കൾ അമിതമായി ഭക്ഷണം കഴിക്കാൻ നിർബന്ധിച്ചു. ഇതിന്റെ ഫലമായി വെറും മൂന്ന് വയസ്സിൽ കുട്ടിയുടെ ശരീരഭാരം 35 കിലോഗ്രാമിലെത്തി.

– അനുചിതമായ പെരുമാറ്റം: പ്രായപൂർത്തിയാകാത്ത ആൺകുട്ടിയെയും പെൺകുട്ടിയെയും പ്രണയജോഡികളായി അവതരിപ്പിച്ച് മുതിർന്നവരെപ്പോലെ അടുത്തിടപഴകാൻ പ്രേരിപ്പിക്കുന്ന ദൃശ്യങ്ങൾ പ്രചരിപ്പിച്ചു. കൂടാതെ, ഒരു കൊച്ചുകുട്ടിയെ ജീവനുള്ള വിരകളെയും ഒച്ചുകളെയും കഴിപ്പിക്കുന്ന വീഡിയോയും വലിയ പ്രതിഷേധത്തിന് കാരണമായി.

– സ്വകാര്യതാലംഘനം: സ്ത്രീകളുടെ വസ്ത്രം മാറുന്ന മുറിയിലേക്ക് കയറാൻ ചെറിയ ആൺകുട്ടിയെ മുതിർന്നയാൾ പ്രേരിപ്പിക്കുന്ന വീഡിയോ പുറത്തുവന്നു. “നീ കുട്ടിയായതിനാൽ നിയമപരമായ ഉത്തരവാദിത്വമില്ല, പെൺകുട്ടികളെ ഉപദ്രവിച്ചാലും കുറ്റകരമല്ല” എന്ന് മുതിർന്നയാൾ കുട്ടിയോട് പറയുന്ന ഓഡിയോയും ഇതിൽ ഉൾപ്പെടുന്നു.

മറ്റൊരു വീഡിയോയിൽ സ്ത്രീകളുടെ ശൗചാലയത്തിൽ ഒളിഞ്ഞുനോക്കി പിടിയിലായ ബാലൻ, താൻ കുട്ടിയായതിനാൽ നിയമം ലംഘിച്ചിട്ടില്ലെന്ന് സ്വയം ന്യായീകരിക്കുന്നതും കാണാം. ഈ ദൃശ്യങ്ങൾ ശ്രദ്ധയിൽപ്പെട്ടതിനെ തുടർന്ന് അധികൃതർ ഇവ അടിയന്തരമായി നീക്കം ചെയ്തു.

പുതിയ നിയന്ത്രണങ്ങൾ കുട്ടികളുടെ അവകാശങ്ങളും ആരോഗ്യവും സംരക്ഷിക്കുന്നതിനായി ചൈനയുടെ സൈബർസ്‌പേസ് അഡ്മിനിസ്‌ട്രേഷൻ, വിദ്യാഭ്യാസ മന്ത്രാലയം, പൊതുസുരക്ഷാ മന്ത്രാലയം എന്നിവയുൾപ്പെടെ എട്ട് സർക്കാർ ഏജൻസികൾ സംയുക്തമായാണ് പുതിയ ചട്ടങ്ങൾക്ക് രൂപം നൽകിയത്. അനുചിതമായ ഓൺലൈൻ ഉള്ളടക്കങ്ങളെ പ്രധാനമായും നാല് വിഭാഗങ്ങളായാണ് ഈ ചട്ടം തരംതിരിക്കുന്നത്: 1.

അപകടകരമായ അനുകരണങ്ങൾ: സ്‌കൂൾ മുടക്കാനും പരീക്ഷയിൽ കോപ്പിയടിക്കാനും പ്രോത്സാഹിപ്പിക്കുന്ന സന്ദേശങ്ങൾ, ലൈംഗിക സൂചനകളുള്ള ദൃശ്യങ്ങൾ, പുകവലി, മദ്യപാനം, ടാറ്റൂ ചെയ്യൽ, അപകടകരമായി വാഹനമോടിക്കൽ തുടങ്ങിയ മുതിർന്നവരുടെ ജീവിതശൈലി കുട്ടികളെക്കൊണ്ട് അനുകരിപ്പിക്കൽ. 2.

തെറ്റായ മൂല്യബോധം: അമിതമായി പണം പ്രദർശിപ്പിക്കൽ, പഠനത്തിന് പ്രാധാന്യമില്ലെന്ന ആശയം പ്രചരിപ്പിക്കൽ എന്നിവ വഴി കുട്ടികളുടെ ചിന്താഗതിയെ ദോഷകരമായി സ്വാധീനിക്കൽ. 3.

സ്വകാര്യതാലംഘനം: കുട്ടികളുടെ ചിത്രങ്ങളും വീഡിയോകളും അവരുടെ അനുമതിയില്ലാതെ ദുരുപയോഗം ചെയ്യലും സ്വകാര്യതയിലേക്കുള്ള കടന്നുകയറ്റവും. നിയമം ലംഘിക്കുന്ന കണ്ടന്റ് ക്രിയേറ്റർമാർക്ക് പുറമെ, അത് പ്രചരിപ്പിക്കുന്ന പ്ലാറ്റ്‌ഫോമുകൾക്കെതിരെയും ശക്തമായ നടപടിയുണ്ടാകും.

ഗുരുതരമായ ലംഘനങ്ങൾക്ക് പ്ലാറ്റ്‌ഫോമുകൾക്ക് 10 ലക്ഷം യുവാൻ (ഏകദേശം 1.5 ലക്ഷം യുഎസ് ഡോളർ) വരെ പിഴ ചുമത്താൻ ചട്ടത്തിൽ വ്യവസ്ഥയുണ്ട്. നേരത്തെയും ഇത്തരം വിവാദങ്ങൾ ചൈനയിൽ ഉണ്ടായിട്ടുണ്ട്.

2021-ൽ അഞ്ച് വയസ്സുകാരിയായ പെൺകുട്ടി ‘ഏറ്റവും പ്രായം കുറഞ്ഞ ബ്യൂട്ടി ബ്ലോഗർ’ എന്ന പേരിൽ ശ്രദ്ധ നേടിയിരുന്നു. ഇതിലൂടെ മാതാപിതാക്കൾ പ്രതിമാസം 1.5 ലക്ഷം യുവാൻ വരെ സമ്പാദിച്ചിരുന്നുവെങ്കിലും വിമർശനം കടുത്തതോടെ അക്കൗണ്ട് പൂട്ടേണ്ടി വന്നു.

കൂടാതെ, കഴിഞ്ഞ ജൂണിൽ ഹുവാങ് യിമിംഗ് എന്ന ഇൻഫ്ലുവൻസറെ, തന്റെ മൂന്ന് വയസ്സുള്ള മകളെ ഉപയോഗിച്ച് വസ്ത്രങ്ങൾ വിൽക്കുന്ന പരസ്യങ്ങൾ നടത്തിയതിന് സോഷ്യൽ മീഡിയയിൽ നിന്ന് വിലക്കിയിരുന്നു.