സാംസങ് ഗാലക്സി ഇസഡ് ഫോൾഡ് 8 വൈഡ് വരുന്നു: സ്പൈഡർമാൻ ചിത്രങ്ങളിലൂടെ സൂചന നൽകി കമ്പനി

പുതിയ ഫോൾഡബിൾ സ്മാർട്ട്ഫോൺ വിപണിയിലേക്ക് എത്തിക്കാൻ ഒരുങ്ങുകയാണ് ദക്ഷിണ കൊറിയൻ ഭീമനായ സാംസങ്. സാംസങ് ഗാലക്സി ഇസഡ് ഫോൾഡ് 8 വൈഡ് (Samsung Galaxy Z Fold 8 Wide) എന്ന പുതിയ മോഡലിന്റെ വരവ് ഔദ്യോഗികമായി സൂചിപ്പിക്കുന്ന പോസ്റ്ററുകൾ കമ്പനി പുറത്തുവിട്ടു.

പ്രശസ്ത സൂപ്പർഹീറോ കഥാപാത്രമായ സ്പൈഡർമാൻ ഈ ഫോൺ ഉപയോഗിക്കുന്ന രീതിയിലുള്ള ചിത്രങ്ങളാണ് എക്സ് (X) പ്ലാറ്റ്‌ഫോമിലൂടെ സാംസങ് പങ്കുവെച്ചിരിക്കുന്നത്. ജൂലൈ 31-ന് പുറത്തിറങ്ങുന്ന സ്പൈഡർമാൻ: ബ്രാൻഡ് ന്യൂ ഡേ എന്ന ചിത്രത്തിന്റെ പ്രൊമോഷന്റെ ഭാഗമായാണ് ഈ പരസ്യം.

“The drop of the summer is almost within reach” എന്ന കുറിപ്പോടെയാണ് കമ്പനി പുതിയ ഫോണിനെ പരിചയപ്പെടുത്തുന്നത്. ജൂലൈ 22-ന് രാവിലെ 9 മണിക്ക് (EDT) നടക്കുന്ന ‘ഗാലക്സി അൺപാക്ക്ഡ്’ (Galaxy Unpacked) ഇവന്റിൽ ഈ ഉപകരണം സംബന്ധിച്ച കൂടുതൽ വിവരങ്ങൾ ലഭ്യമാകും.

കമ്പനിയുടെ ഔദ്യോഗിക വെബ്സൈറ്റ് വഴി ഇപ്പോൾ ഉപയോക്താക്കൾക്ക് ഈ ഫോണിനായി റിസർവേഷൻ നടത്താം. മുൻകൂട്ടി ബുക്ക് ചെയ്യുന്നവർക്ക് 30 ഡോളർ ക്രെഡിറ്റും 500 ഡോളറിന്റെ ഗിഫ്റ്റ് കാർഡുകൾ നേടാനുള്ള അവസരവും ലഭിക്കും.

“[a] new shape unfolds” എന്ന വാചകത്തിലൂടെ ഫോൾഡബിൾ ഡിസൈനിലെ വലിയ മാറ്റമാണ് കമ്പനി വാഗ്ദാനം ചെയ്യുന്നത്. ഫോണിന്റെ സാങ്കേതിക സവിശേഷതകളെക്കുറിച്ച് പുറത്തുവരുന്ന പ്രധാന വിവരങ്ങൾ താഴെ പറയുന്നവയാണ്: പ്രധാന സവിശേഷതകൾ:
– ഫോൺ അൺഫോൾഡ് ചെയ്യുമ്പോൾ 123.9 × 161.4 × 4.9 മില്ലിമീറ്ററും ഫോൾഡ് ചെയ്യുമ്പോൾ 123.9 × 82.2 × 9.8 മില്ലിമീറ്ററുമായിരിക്കും വലിപ്പം.
– 5.4 ഇഞ്ച് കവർ ഡിസ്പ്ലേ.
– സ്നാപ്ഡ്രാഗൺ 8 എലൈറ്റ് ജെൻ 5 ചിപ്സെറ്റ്.
– 200 എംപി പ്രൈമറി ക്യാമറയും 12 എംപി അല്ലെങ്കിൽ 50 എംപി അൾട്രാ വൈഡ് ക്യാമറയും.
– 5,000 mAh ബാറ്ററി, 45W ഫാസ്റ്റ് ചാർജിങ് പിന്തുണ.

നിലവിലെ മുൻനിര സ്മാർട്ട്ഫോണുകൾക്ക് സമാനമായ കരുത്തും മികവും പുതിയ ഫോൾഡബിൾ മോഡലിന് ഉണ്ടാകുമെന്ന പ്രതീക്ഷയിലാണ് സാങ്കേതിക ലോകം.