ഓഹരി വിപണിയിലേക്ക് ജിയോ പ്ലാറ്റ്‌ഫോംസ്: വമ്പൻ ഐപിഒയ്ക്കുള്ള നീക്കങ്ങൾ തുടങ്ങി

ഇറാൻ – യുഎസ് സംഘർഷാവസ്ഥയിൽ അയവു വന്നതോടെ ഇന്ത്യൻ ഓഹരി വിപണിയിൽ വീണ്ടും ഊർജസ്വലത തിരിച്ചെത്തുന്നു. നാഷണൽ സ്റ്റോക്ക് എക്സ്ചേഞ്ച് (എൻഎസ്ഇ) ഇതിനകം ഐപിഒ നടപടികളിലേക്ക് കടന്നതിന് പിന്നാലെ, റിലയൻസ് ഇൻഡസ്ട്രീസിന്റെ ഡിജിറ്റൽ സേവന വിഭാഗമായ ജിയോ പ്ലാറ്റ്‌ഫോംസ് ഓഹരി വിപണിയിലേക്ക് പ്രവേശിക്കാൻ ഔദ്യോഗികമായി അപേക്ഷ സമർപ്പിച്ചു.

റിലയൻസ് ഇൻഡസ്ട്രീസ് ലിമിറ്റഡിന്റെ 49-ാമത് വാർഷിക പൊതുയോഗത്തിൽ കമ്പനി ചെയർമാനും മാനേജിങ് ഡയറക്ടറുമായ മുകേഷ് അംബാനി ആണ് ഇതുസംബന്ധിച്ച നിർണായക പ്രഖ്യാപനം നടത്തിയത്. “ജിയോ പ്ലാറ്റ്‌ഫോംസിന്റെ ബോർഡ് ഇന്ന് രാവിലെ ഐപിഒയുടെ കരടു രേഖയ്ക്ക് അംഗീകാരം നൽകിയിട്ടുണ്ട്.

ഇത് ഇന്ന് തന്നെ സെബിയുടെ മുൻപാകെ സമർപ്പിക്കും,” എന്ന് അദ്ദേഹം വ്യക്തമാക്കിയിരുന്നു. ഇതിനു പിന്നാലെ വൈകുന്നേരത്തോടെ ഡിആർഎച്ച്പി (DRHP) സമർപ്പിക്കുകയും ചെയ്തു.

സാമ്പത്തിക കണക്കുകൾ
ഏകദേശം 1.2 ലക്ഷം കോടി രൂപ മുതൽ 1.6 ലക്ഷം കോടി രൂപ വരെ മൂല്യം പ്രതീക്ഷിക്കുന്ന ഈ ഐപിഒ ഇന്ത്യൻ വിപണിയിലെ ഇതുവരെയുള്ളതിൽ വെച്ച് ഏറ്റവും വലിയതായിരിക്കും. കഴിഞ്ഞ വർഷം 27,870 കോടി രൂപയുടെ ഐപിഒയുമായി എത്തിയ ഹ്യൂണ്ടായ് മോട്ടോറിന്റെ റെക്കോർഡ് ഇതോടെ പഴങ്കഥയാകും.

ഏകദേശം 37,000 കോടി രൂപയോളം സമാഹരിക്കാനാണ് കമ്പനി ലക്ഷ്യമിടുന്നത്. ബോംബെ സ്റ്റോക്ക് എക്‌സ്‌ചേഞ്ചിന് നൽകിയ ഔദ്യോഗിക വിവരങ്ങൾ പ്രകാരം, 10 രൂപ മുഖവിലയുള്ള 27 കോടി ഇക്വിറ്റി ഓഹരികളാണ് വിപണിയിലിറക്കുന്നത്.

എന്നാൽ ഓഹരികളുടെ പ്രൈസ് ബാൻഡ് സംബന്ധിച്ച് നിലവിൽ തീരുമാനമായിട്ടില്ല. റിലയൻസ് ഇൻഡസ്ട്രീസിന് 66.43 ശതമാനം ഓഹരി പങ്കാളിത്തമുള്ള ജിയോയിൽ, ബാക്കിയുള്ള 33.57 ശതമാനത്തിൽ 17.71 ശതമാനം ഓഹരികൾ മെറ്റാ, ഗൂഗിൾ തുടങ്ങിയ ആഗോള സാങ്കേതിക ഭീമന്മാരുടെ കൈവശമാണുള്ളത്.

വിപണിയിലെ മറ്റ് ചലനങ്ങൾ
ആഗോളതലത്തിൽ ഓപ്പൺഎഐ, ആന്ത്രോപിക് തുടങ്ങിയ എഐ കമ്പനികളും ഇലോൺ മസ്കിന്റെ സ്പേസ് എക്സും സമാനമായ രീതിയിൽ ഐപിഒ നടപടികളുമായി മുന്നോട്ട് പോകുന്ന സാഹചര്യമാണുള്ളത്. നേരത്തെ ഈ വർഷം പകുതിയോടെ ഐപിഒ നടത്താനാണ് ലക്ഷ്യമിട്ടിരുന്നതെങ്കിലും, പശ്ചിമേഷ്യയിലെ യുദ്ധസാഹചര്യം വിപണിയിൽ സൃഷ്ടിച്ച അനിശ്ചിതത്വം കാരണം തീയതി മാറ്റിവെക്കുകയായിരുന്നു.

എന്നാൽ നിലവിൽ സ്ഥിതിഗതികൾ ശാന്തമായതോടെ എൻഎസ്ഇ, ജിയോ എന്നിവയ്ക്ക് പുറമെ ഫോൺപേ, സെപ്റ്റോ, എസ്ബിഐ മ്യൂച്വൽ ഫണ്ട്, ഫ്ളിപ്കാർട്ട്, ഓയോ തുടങ്ങിയ പ്രമുഖ കമ്പനികളും വരും മാസങ്ങളിൽ ഐപിഒയുമായി രംഗത്തെത്തുമെന്നാണ് കരുതപ്പെടുന്നത്.