തൂത്തുക്കുടിയിൽ 38,000 കോടിയുടെ കപ്പൽ നിർമ്മാണ ശാല: പദ്ധതിക്ക് പച്ചക്കൊടി കാട്ടി തമിഴ്നാട് സർക്കാർ

തൂത്തുക്കുടി കേന്ദ്രീകരിച്ച് വൻകിട കപ്പൽ നിർമ്മാണ ശാല സ്ഥാപിക്കുന്നതിനായുള്ള നടപടികൾക്ക് തമിഴ്നാട് സർക്കാർ ഔദ്യോഗികമായി തുടക്കം കുറിച്ചു.

എച്ച് ഡി ഹ്യുണ്ടായ് കമ്പനി മുന്നോട്ടുവെച്ച 38,000 കോടി രൂപയുടെ ബൃഹത്തായ പദ്ധതിക്ക് മുഖ്യമന്ത്രി സി ജോസഫ് വിജയ് പൂർണ്ണ പിന്തുണ പ്രഖ്യാപിച്ചു. പദ്ധതി യാഥാർത്ഥ്യമാകുന്നതോടെ പ്രദേശത്ത് 15,000 പേർക്ക് നേരിട്ട് തൊഴിലവസരങ്ങൾ ലഭ്യമാകുമെന്നാണ് സർക്കാർ കണക്കുകൂട്ടുന്നത്.

ചെന്നൈയിൽ വെച്ച് നടന്ന കൂടിക്കാഴ്ചയിൽ എച്ച്.ഡി കൊറിയ ഷിപ്പ് ബിൽഡിംഗ് ആൻഡ് ഓഫ്‌ഷോർ എഞ്ചിനീയറിംഗിന്റെ ഉന്നതതല പ്രതിനിധി സംഘം മുഖ്യമന്ത്രിയുമായി പദ്ധതിയുടെ പുരോഗതി ചർച്ച ചെയ്തു. ഇരുഭാഗങ്ങളും തമ്മിൽ നേരത്തെ തന്നെ ധാരണാപത്രം ഒപ്പുവെച്ചിരുന്നു.

പദ്ധതിയുടെ സുഗമമായ നടത്തിപ്പിനായി തമിഴ്‌നാട് ഇൻഡസ്ട്രിയൽ പ്രൊമോഷൻ കോർപ്പറേഷനും വി ഒ ചിദംബരനാർ പോർട്ട് അതോറിറ്റിയും ചേർന്ന് നാഷണൽ ഷിപ്പ് ബിൽഡിംഗ് ആൻഡ് ഹെവി ഇൻഡസ്ട്രീസ് പാർക്ക് തമിഴ്‌നാട് ലിമിറ്റഡ് എന്ന പ്രത്യേക കമ്പനിക്ക് രൂപം നൽകിയിട്ടുണ്ട്. കൂടാതെ, ഡയറക്ടറേറ്റ് ജനറൽ ഓഫ് ഷിപ്പിംഗിന്റെ പ്രാഥമിക അനുമതിയും പദ്ധതി ഇതിനകം കരസ്ഥമാക്കിയിട്ടുണ്ട്.

എച്ച്.ഡി കെ.എസ്.ഒ.ഇ ഗ്ലോബൽ ബിസിനസ് ഡയറക്ടർ യങ് ഹൂൺ ക്വോണിന്റെ നേതൃത്വത്തിലുള്ള സംഘമാണ് മുഖ്യമന്ത്രിയെ സന്ദർശിച്ചത്. നിർമ്മാണ പ്രവർത്തനങ്ങൾ വേഗത്തിലാക്കാൻ കമ്പനി സന്നദ്ധത അറിയിച്ചു.

നിശ്ചിത സമയപരിധിക്കുള്ളിൽ പദ്ധതി പൂർത്തിയാക്കാൻ സർക്കാർ എല്ലാ സഹായങ്ങളും ഉറപ്പുനൽകിയതായി സി ജോസഫ് വിജയ് വ്യക്തമാക്കി. ഈ കൂടിക്കാഴ്ചയിൽ വ്യവസായ വകുപ്പ് മന്ത്രി സെൽവി എസ്.

കീർത്തന, ചീഫ് സെക്രട്ടറി എം. സായ്കുമാർ, വ്യവസായ വകുപ്പ് അഡീഷണൽ ചീഫ് സെക്രട്ടറി എസ്.

വിജയകുമാർ, സിപ്കോട്ട് മാനേജിംഗ് ഡയറക്ടർ എസ്.എ. രാമൻ, ഗൈഡൻസ് തമിഴ്‌നാട് മാനേജിംഗ് ഡയറക്ടർ ദീപക് ജേക്കബ് തുടങ്ങിയ പ്രമുഖ ഉദ്യോഗസ്ഥരും സന്നിഹിതരായിരുന്നു.

എച്ച്.ഡി കെ.എസ്.ഒ.ഇ പ്രതിനിധികളായ സൺജൂൺ ഹോങ്, ഹോങ്ചിയോൾ കിം എന്നിവരും സംഘത്തിലുണ്ടായിരുന്നു. തൂത്തുക്കുടിയെ ആഗോളതലത്തിൽ ശ്രദ്ധേയമായ ഒരു കപ്പൽ നിർമ്മാണ ഹബ്ബാക്കി മാറ്റുന്നതിനൊപ്പം, ദക്ഷിണ തമിഴ്‌നാടിന്റെ സാമ്പത്തിക മേഖലയ്ക്ക് വലിയ ഉണർവ് നൽകാൻ ഈ മെഗാ പ്രൊജക്റ്റിന് സാധിക്കുമെന്നാണ് വിലയിരുത്തൽ.