പുതിയ കാർ വാങ്ങുമ്പോൾ ശ്രദ്ധിക്കണം; വാഹനത്തിന്റെ യഥാർത്ഥ നിർമ്മാണ തീയതി എങ്ങനെ തിരിച്ചറിയാം?

പുതിയ വാഹനം സ്വന്തമാക്കുമ്പോൾ ഉപഭോക്താക്കൾ വലിയ ആവേശത്തിലായിരിക്കും. എന്നാൽ ഷോറൂമിൽ നിന്ന് വാങ്ങുന്ന വാഹനം യഥാർത്ഥത്തിൽ എത്രത്തോളം പുതിയതാണെന്ന കാര്യത്തിൽ പലപ്പോഴും വ്യക്തത ഉണ്ടാകാറില്ല.

വാഹനത്തിന്റെ നിർമ്മാണ തീയതിയും വിൽപ്പന തീയതിയും തമ്മിൽ മാസങ്ങളുടെയോ ചിലപ്പോൾ ഒരു വർഷത്തിലധികമോ വ്യത്യാസമുണ്ടാകാൻ സാധ്യതയുണ്ട്. ഇത്തരത്തിലുള്ള സാഹചര്യങ്ങളിൽ വാഹനം വാങ്ങി ചുരുങ്ങിയ കാലയളവിനുള്ളിൽ തന്നെ സാങ്കേതിക തകരാറുകളും പ്രവർത്തനക്ഷമതയിൽ കുറവും അനുഭവപ്പെടാറുണ്ട്.

കൂടാതെ, വാഹനത്തിന്റെ പഴക്കം അതിന്റെ വാറന്റി കാലാവധി, ഇൻഷുറൻസ് പരിരക്ഷ, ഭാവിയിലുള്ള പുനർവിൽപ്പന മൂല്യം (Resale Value) എന്നിവയെ പ്രതികൂലമായി ബാധിച്ചേക്കാം. അതിനാൽ വാഹനം വാങ്ങുന്നതിന് മുൻപ് അതിന്റെ നിർമ്മാണ കാലയളവ് കൃത്യമായി പരിശോധിക്കേണ്ടത് അത്യാവശ്യമാണ്.

വാഹനത്തിന്റെ പഴക്കം നിർണ്ണയിക്കാൻ VIN പരിശോധിക്കാം വാഹനത്തിന്റെ VIN (Vehicle Identification Number) അഥവാ ഷാസി നമ്പർ പരിശോധിക്കുന്നതിലൂടെ അതിന്റെ നിർമ്മാണ വർഷം എളുപ്പത്തിൽ കണ്ടെത്താൻ സാധിക്കും. ഓരോ വാഹനത്തെയും തിരിച്ചറിയുന്നതിനായി നൽകുന്ന 17 അക്കങ്ങളുള്ള സവിശേഷ നമ്പറാണിത്.

സാധാരണയായി ഡാഷ്‌ബോർഡിലോ, ഡ്രൈവറുടെ വശത്തുള്ള ഡോറിലോ, എഞ്ചിൻ ഭാഗത്തോ ഈ നമ്പർ പതിപ്പിച്ചിട്ടുണ്ടാകും. VIN നമ്പറിലെ പത്താമത്തെ അക്ഷരം അല്ലെങ്കിൽ അക്കം നിർമ്മാണ വർഷത്തെ സൂചിപ്പിക്കുന്നു.

ഇതിനുപുറമെ, വാഹനത്തിൽ ഘടിപ്പിച്ചിട്ടുള്ള മാനുഫാക്ചറിങ് പ്ലേറ്റിൽ നിർമ്മാണ മാസവും വർഷവും കൃത്യമായി രേഖപ്പെടുത്തിയിരിക്കും. വാഹനം നിർമ്മിച്ച് ആറ് മാസത്തിലധികം പിന്നിട്ടിട്ടുണ്ടെങ്കിൽ ഇക്കാര്യം ഡീലറുമായി സംസാരിച്ച് വ്യക്തത വരുത്തേണ്ടതാണ്.

ടയറുകളും ബാറ്ററിയും പരിശോധിക്കുക വാഹനത്തിന്റെ പഴക്കം തിരിച്ചറിയാനുള്ള മറ്റൊരു മാർഗ്ഗം ടയറുകളിലെ കോഡ് പരിശോധിക്കുക എന്നതാണ്. ടയറിലെ നാലക്ക കോഡിൽ ആദ്യത്തെ രണ്ട് അക്കങ്ങൾ ആഴ്ചയെയും അവസാനത്തെ രണ്ട് അക്കങ്ങൾ വർഷത്തെയും സൂചിപ്പിക്കുന്നു.

ഉദാഹരണത്തിന്, ‘2322’ എന്ന കോഡ് ഉണ്ടെങ്കിൽ അത് 2022-ലെ 23-ാം ആഴ്ചയിലാണ് ടയർ നിർമ്മിക്കപ്പെട്ടതെന്ന് അർത്ഥമാക്കുന്നു. ടയറുകൾ അമിതമായി പഴകിയതാണെങ്കിൽ വാഹനം ദീർഘകാലം സ്റ്റോക്ക്‌യാർഡിൽ കിടന്നതാകാൻ സാധ്യതയുണ്ട്.

ഇതോടൊപ്പം ബാറ്ററിയുടെ നിർമ്മാണ തീയതിയും പരിശോധിക്കാൻ മറക്കരുത്. ദീർഘകാലം വാഹനം ഉപയോഗിക്കാതെ കിടക്കുന്നത് ബാറ്ററിയുടെ ശേഷിയെ ബാധിക്കാം.

വാഹനത്തിന്റെ ഓഡോമീറ്റർ റീഡിംഗും പരിശോധിക്കേണ്ടതുണ്ട്; സാധാരണയായി ഒരു പുതിയ കാറിന് 10 മുതൽ 50 കിലോമീറ്റർ വരെയാണ് റീഡിംഗ് ഉണ്ടാകേണ്ടത്. വാഹനം വാങ്ങിയ ശേഷം അത് പഴയതാണെന്ന് ബോധ്യപ്പെട്ടാൽ പരിഭ്രാന്തരാകേണ്ടതില്ല.

മൂന്ന് മുതൽ നാല് മാസം വരെ പഴക്കമുള്ള കാറുകൾ വാങ്ങുന്നതിൽ അസ്വാഭാവികതയില്ല. എന്നാൽ, ഇതിലും കൂടുതൽ പഴക്കമുള്ള വാഹനമാണെങ്കിൽ ഡീലറിൽ നിന്ന് പ്രത്യേക കിഴിവ് ആവശ്യപ്പെടാനോ അല്ലെങ്കിൽ പുതിയ വാഹനം നൽകാൻ ആവശ്യപ്പെടാനോ ഉപഭോക്താക്കൾക്ക് അവകാശമുണ്ട്.