കോഴിക്കോട് ജില്ലയിൽ നിപ വൈറസ് ബാധ സ്ഥിരീകരിച്ച സാഹചര്യത്തിൽ, രോഗി സഞ്ചരിച്ച സ്ഥലങ്ങളുടെ റൂട്ട് മാപ്പ് ആരോഗ്യവകുപ്പ് ഔദ്യോഗികമായി പുറത്തിറക്കി. മെയ് 30 മുതൽ ജൂൺ 10 വരെയുള്ള കാലയളവിലെ വിവരങ്ങളാണ് അധികൃതർ പ്രസിദ്ധീകരിച്ചത്.
രോഗി ജൂൺ 2-ന് കോഴിക്കോട്ടെ ഒരു സ്വകാര്യ ആശുപത്രിയിൽ സന്ദർശനം നടത്തിയിരുന്നു. തുടർന്ന് ജൂൺ 3, 4, 5, 6 തീയതികളിൽ ഫറോക്ക് കോളജ് പോസ്റ്റ് ഓഫീസിലും, ജൂൺ 7, 8, 9 തീയതികളിൽ രണ്ട് സ്വകാര്യ ആശുപത്രികളിലും ഇദ്ദേഹം സന്ദർശനം നടത്തി.
ഒടുവിൽ ജൂൺ 10-ന് കോഴിക്കോട് മെഡിക്കൽ കോളജ് ആശുപത്രിയിൽ എത്തി ചികിത്സ തേടുകയായിരുന്നു. നിലവിൽ 77 പേരാണ് നിപ ബാധിതന്റെ സമ്പർക്കപ്പട്ടികയിലുള്ളത്.
ഇതിൽ 58 പേർ ആരോഗ്യപ്രവർത്തകരും 14 പേർ രോഗിയുടെ ബന്ധുക്കളുമാണെന്ന് ആരോഗ്യമന്ത്രി കെ മുരളീധരൻ വ്യക്തമാക്കിയിട്ടുണ്ട്. ഫറോക്ക് കോളജ് സ്വദേശിയായ 43 വയസ്സുകാരനാണ് ഇപ്പോൾ കോഴിക്കോട് മെഡിക്കൽ കോളജ് ആശുപത്രിയിലെ ഐസൊലേഷൻ വാർഡിൽ അതീവ ഗുരുതരാവസ്ഥയിൽ ചികിത്സയിലുള്ളത്.
പുണെ വൈറോളജി ലാബിൽ നടത്തിയ സ്രവ പരിശോധനയിൽ ഇദ്ദേഹത്തിന് വൈറസ് ബാധ സ്ഥിരീകരിച്ചിരുന്നു. തന്റെ ഉടമസ്ഥതയിലുള്ള ഗോഡൗൺ വൃത്തിയാക്കിയ ശേഷമാണ് ഇദ്ദേഹത്തിന് പനി അനുഭവപ്പെട്ടതെന്ന് വിവരം ലഭിച്ചിട്ടുണ്ട്.
ഗോഡൗൺ വൃത്തിയാക്കുന്നതിനിടെ വവ്വാലുകളുടെ അവശിഷ്ടങ്ങളുമായി സമ്പർക്കമുണ്ടായതാണ് രോഗപ്പകർച്ചയ്ക്ക് കാരണമെന്നാണ് പ്രാഥമിക നിഗമനം. ജില്ലയിൽ ആരോഗ്യവകുപ്പ് പ്രതിരോധ നടപടികൾ ശക്തമാക്കിയിട്ടുണ്ട്.
രോഗിയുമായി സമ്പർക്കത്തിൽ ഏർപ്പെട്ടവരോട് കർശനമായി ക്വാറന്റൈനിൽ പ്രവേശിക്കാൻ നിർദ്ദേശം നൽകിയിട്ടുണ്ട്. എന്നാൽ, നിലവിൽ കണ്ടെയ്ൻമെന്റ് സോണായി പ്രഖ്യാപിക്കേണ്ട
സാഹചര്യമില്ലെന്ന് ജില്ലാ കളക്ടർ എം എസ് മാധവിക്കുട്ടി അറിയിച്ചു. അതേസമയം, നിപ ചികിത്സയ്ക്കുള്ള റെംഡെസിവർ മരുന്ന് സ്റ്റോക്കില്ലാത്തതിനാൽ അത് ലഭ്യമാക്കാൻ സർക്കാർ നടപടികൾ ആരംഭിച്ചു.
മരുന്ന് ലഭ്യമാക്കണമെന്ന് ആവശ്യപ്പെട്ട് സംസ്ഥാനം ICMR-നെ സമീപിച്ചിട്ടുണ്ട്. നിലവിലെ സാഹചര്യത്തിൽ റെംഡെസിവറിന് പകരമായി റിബവൈറിൻ ഉപയോഗിക്കാനാണ് ആരോഗ്യവകുപ്പിന്റെ തീരുമാനം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
