രജത് പടിദാറിനെ ഇന്ത്യൻ ടീമിൽ ഉൾപ്പെടുത്താത്തതിൽ വിശദീകരണവുമായി അജിത് അഗാർക്കർ

ഐപിഎല്ലിൽ റോയൽ ചലഞ്ചേഴ്സ് ബംഗളൂരുവിനെ തുടർച്ചയായ രണ്ട് കിരീട വിജയങ്ങളിലേക്ക് നയിച്ചിട്ടും, വരാനിരിക്കുന്ന അയർലൻഡ്, ഇംഗ്ലണ്ട് പര്യടനങ്ങൾക്കും ഏഷ്യൻ ഗെയിംസിനുമുള്ള ഇന്ത്യൻ ടി20 ടീമിൽ രജത് പടിദാറിനെ പരിഗണിക്കാത്തതിൽ പ്രതികരണവുമായി ചീഫ് സെലക്ടർ അജിത് അഗാർക്കർ രംഗത്ത്.

ടീം സെലക്ഷനെക്കുറിച്ച് സംസാരിക്കവേ അഗാർക്കർ വ്യക്തമാക്കിയത് ഇപ്രകാരമാണ്: “ഇന്ത്യയിൽ പ്രതിഭയുള്ള നിരവധി കളിക്കാരുണ്ട്. ടീമിലേക്ക് നേരിട്ട് നടന്നു കയറാൻ യോഗ്യതയുള്ള നിരവധി പേർ പുറത്തുണ്ട്.

എന്നാൽ 15 പേരെ മാത്രമല്ലേ തിരഞ്ഞെടുക്കാൻ സാധിക്കൂ. നിലവിൽ കളിക്കുന്നവരും അവരുടെ പരമാവധി നന്നായി ചെയ്യുന്നുണ്ട്.

എപ്പോഴും ചില കളിക്കാർക്ക് അവസരം നഷ്ടമാകും, അതിൽ വിഷമമുണ്ട്. എന്നാൽ നിലവിലെ സ്ക്വാഡിൽ ഞങ്ങൾ സംതൃപ്തരാണ്.” ഐപിഎൽ സീസണിൽ ഉജ്ജ്വലമായ ഫോമിലായിരുന്നു രജത് പടിദാർ.

192.69 എന്ന മികച്ച സ്ട്രൈക്ക് റേറ്റിൽ 501 റൺസാണ് താരം അടിച്ചുകൂട്ടിയത്. 30 ഫോറുകളും 42 സിക്സറുകളും അടങ്ങുന്നതായിരുന്നു അദ്ദേഹത്തിന്റെ ഇന്നിംഗ്സ്.

ഡെത്ത് ഓവറുകളിലെ ബാറ്റിംഗ് മികവ് കണക്കിലെടുക്കുമ്പോൾ, 12 മുതൽ 16 വരെയുള്ള ഓവറുകളിൽ 216.67 സ്ട്രൈക്ക് റേറ്റിലും, അവസാന 4 ഓവറുകളിൽ 278.57 സ്ട്രൈക്ക് റേറ്റിലുമാണ് താരം സ്കോർ ചെയ്തത്. എന്നിരുന്നാലും, സമാനമായ മികവ് കാഴ്ചവെക്കാൻ സാധിക്കാത്ത തിലക് വർമ്മ, ശിവം ദുബെ എന്നിവർക്ക് ടീമിൽ ഇടം നൽകിയതും, തിലക് വർമ്മയെ വൈസ് ക്യാപ്റ്റനായി നിയമിച്ചതും വലിയ ചർച്ചകൾക്ക് വഴിവെച്ചിട്ടുണ്ട്.

ഇന്ത്യൻ ടി20 ടീം അംഗങ്ങൾ:
ശ്രേയസ് അയ്യർ (ക്യാപ്റ്റൻ), അഭിഷേക് ശർമ്മ, സഞ്ജു സാംസൺ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), ശിവം ദുബെ, തിലക് വർമ്മ (വൈസ് ക്യാപ്റ്റൻ), നിതീഷ് കുമാർ റെഡ്ഡി, അക്സർ പട്ടേൽ, വാഷിംഗ്ടൺ സുന്ദർ, വരുൺ ചക്രവർത്തി, മുഹമ്മദ് സിറാജ്, അർഷ്ദീപ് സിംഗ്, പ്രിൻസ് യാദവ്, വൈഭവ് സൂര്യവംശി, ഹർഷിത് റാണ, രവി ബിഷ്ണോയ്.