എൽഐസി ഓഹരി വിലയിൽ വൻ ഇടിവ്; യഥാർത്ഥ കാരണം ഇതാണ്

എൽഐസി (LIC) ഓഹരി വിലയിൽ ഇന്ന് വലിയ വ്യതിയാനം രേഖപ്പെടുത്തി. മുൻപ് 830 രൂപ നിലവാരത്തിലുണ്ടായിരുന്ന ഓഹരി വില ഇന്ന് 417 രൂപയിലേക്ക് താഴുകയായിരുന്നു.

ഓഹരി മൂല്യം 50 ശതമാനത്തോളം ഇടിഞ്ഞോ എന്ന ആശങ്ക നിക്ഷേപകർക്കിടയിൽ ഉയർന്നെങ്കിലും, ഇതിനു പിന്നിലെ പ്രധാന കാരണം കമ്പനിയുടെ ബോണസ് ഓഹരി പ്രഖ്യാപനമാണെന്ന് വ്യക്തമായിട്ടുണ്ട്. കമ്പനിയുടെ ചരിത്രത്തിലാദ്യമായി ഓഹരി ഉടമകൾക്ക് 1:1 എന്ന അനുപാതത്തിൽ ബോണസ് ഓഹരികൾ വിതരണം ചെയ്യാൻ എൽഐസി നേരത്തെ തീരുമാനിച്ചിരുന്നു.

ഈ ബോണസ് ഇഷ്യൂവിന് അനുസൃതമായി ഓഹരി വിലയിൽ ക്രമീകരണം വരുത്തിയതാണ് വില പെട്ടെന്ന് പകുതിയായി കുറയാൻ കാരണം. എന്താണ് ബോണസ് ഓഹരി? ഒരു കമ്പനി തങ്ങളുടെ നിലവിലെ ഓഹരി ഉടമകൾക്ക് കൈവശമുള്ള ഓഹരികളുടെ എണ്ണത്തിന് ആനുപാതികമായി സൗജന്യമായി ഓഹരികൾ നൽകുന്ന രീതിയാണിത്.

ലാഭവിഹിതം നൽകുന്നതിന് സമാനമായ ഒരു നടപടിയാണിത്. 1:1 അനുപാതത്തിൽ ബോണസ് ഓഹരി ലഭിക്കുമ്പോൾ, ഒരു നിക്ഷേപകന്റെ കൈവശം 100 ഓഹരികളുണ്ടെങ്കിൽ അത് 200 ആയി വർദ്ധിക്കും.

ഓഹരികളുടെ എണ്ണം വർദ്ധിക്കുമ്പോഴും മൊത്തം മൂല്യത്തിൽ മാറ്റമുണ്ടാകുന്നില്ല. ഈ സാങ്കേതിക ക്രമീകരണത്തിന്റെ ഭാഗമായാണ് ഓഹരി വില 830 രൂപയിൽ നിന്ന് പാതിയായി കുറഞ്ഞത്.

പുതുക്കിയ വില കണക്കുകൾ പ്രകാരം, ഇന്നത്തെ വ്യാപാര ദിനത്തിന്റെ അവസാനത്തിൽ എൻഎസ്ഇ (NSE)-യിൽ എൽഐസി ഓഹരി വില 0.84 ശതമാനം ഇടിഞ്ഞ് 411.50 രൂപയിലാണ് വ്യാപാരം അവസാനിപ്പിച്ചത്. (Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി/ഐപിഒ/സ്വർണം മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല.

ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക)