പത്തനംതിട്ട ജനറൽ ആശുപത്രിയിലെ കെട്ടിട അറ്റകുറ്റപ്പണികൾ വിവാദത്തിൽ: ബി ആൻഡ് സി ബ്ലോക്കിലെ നിർമാണത്തിൽ ഗുരുതര വീഴ്ചയെന്ന് ആക്ഷേപം

പത്തനംതിട്ട ജനറൽ ആശുപത്രിയിലെ ബി ആൻഡ് സി ബ്ലോക്കിൽ നടത്തിവരുന്ന അറ്റകുറ്റപ്പണികൾക്കെതിരെ വ്യാപക പ്രതിഷേധം ഉയരുന്നു.

കെട്ടിടത്തിന്റെ ബലക്ഷയം പരിഹരിക്കാൻ ലക്ഷ്യമിട്ട് നടത്തിയ നിർമാണപ്രവർത്തനങ്ങൾ അപൂർണമാണെന്നും പുറംമോടിക്ക് മാത്രമാണ് മുൻഗണന നൽകിയതെന്നും വിമർശനം ശക്തമായിരിക്കുകയാണ്. പരിശോധന നടത്തിയ വിദഗ്ധർ കെട്ടിടത്തിലെ പില്ലറുകൾ ബലപ്പെടുത്താൻ നിർദേശം നൽകിയതിന്റെ അടിസ്ഥാനത്തിൽ നടപടികൾ സ്വീകരിച്ചിരുന്നു.

എന്നാൽ, കെട്ടിടത്തിന്റെ പിൻവശത്തുള്ള തൂണുകൾ ഇപ്പോഴും ശോച്യാവസ്ഥയിൽ തുടരുകയാണ്. തൂണുകളിലെ കമ്പികൾ പുറത്തുകാണുന്ന അവസ്ഥ പരിഹരിക്കാൻ പെയ്ന്റ് പൂശിയെങ്കിലും, സിമന്റ് പാളികൾ അടർന്നു വീഴാറായ സ്ഥിതിയിലാണ്.

കെട്ടിടത്തിന്റെ രണ്ടാം നിലയിലെ ശുചിമുറിയിൽ സൺഷേഡിനു മുകളിൽ ജനൽ ചാരിവെച്ച നിലയിൽ കാണപ്പെടുന്നു. സ്വകാര്യതയ്ക്കും സുരക്ഷയ്ക്കും ഭീഷണിയാകുംവിധം ശുചിമുറിക്ക് ഉള്ളിൽ ഷീറ്റ് കെട്ടി മറച്ചിരിക്കുകയാണ്.

പൊതുജനങ്ങൾ കാണുന്ന ഭാഗത്ത് മാത്രം അറ്റകുറ്റപ്പണി നടത്തി അധികൃതർ കണ്ണിൽ പൊടിയിടുകയാണെന്ന ആരോപണമാണ് ഉയരുന്നത്. കെ.ശിവദാസൻ എംഎൽഎ ആയിരുന്ന കാലയളവിൽ നിർമിച്ച ഈ കെട്ടിടത്തിന് ഏകദേശം 20 വർഷത്തെ പഴക്കമാണുള്ളത്.

ആറ് വർഷം മുൻപ് ബലക്ഷയം കണ്ടെത്തിയിട്ടും അറ്റകുറ്റപ്പണികൾ ആരംഭിക്കാൻ വൈകിയത് കെട്ടിടത്തിന്റെ ശോച്യാവസ്ഥ വർധിപ്പിച്ചു. രണ്ട് വർഷം മുൻപ് കാർഡിയോളജി വിഭാഗത്തിൽ മേൽക്കൂര അടർന്നു വീണ സംഭവത്തിൽ, അന്ന് അവിടെ ചികിത്സയിലുണ്ടായിരുന്ന ഗർഭിണിയും ഭർത്താവും അദ്ഭുതകരമായാണ് രക്ഷപ്പെട്ടത്.

ഈ സാഹചര്യത്തിൽ പുതിയ ബ്ലോക്കിന്റെ നിർമാണം സമീപത്ത് ആരംഭിച്ചിട്ടുണ്ടെങ്കിലും, രോഗികളെ എപ്പോൾ പുതിയ കെട്ടിടത്തിലേക്ക് മാറ്റാൻ കഴിയുമെന്ന കാര്യത്തിൽ വ്യക്തതയില്ല. കേന്ദ്ര വിഹിതമായി ലഭിച്ച മൂന്നു കോടി രൂപയും സംസ്ഥാന വിഹിതമായി ലഭിച്ച രണ്ട് കോടി രൂപയും ഉൾപ്പെടെ അഞ്ച് കോടി രൂപ ചെലവഴിച്ചാണ് ദേശീയ ആരോഗ്യ ദൗത്യത്തിന്റെ ഭാഗമായി ഇവിടെ നവീകരണം നടത്തിയത്.

ഉപകരണങ്ങൾ താൽക്കാലികമായി കോന്നി മെഡിക്കൽ കോളജിലേക്ക് മാറ്റിയെങ്കിലും പിന്നീട് അവ തിരിച്ചെത്തിച്ചിരുന്നു. എങ്കിലും, കെട്ടിടത്തിന്റെ സുരക്ഷിതത്വം ഉറപ്പാക്കാൻ കഴിഞ്ഞില്ലെന്ന ആശങ്കയിലാണ് രോഗികളും ജീവനക്കാരും.