കോഴിക്കോട് നഗരത്തിലെ പ്രധാന പാതയായ മലാപ്പറമ്പ്–മാനാഞ്ചിറ റോഡ് നാലുവരിയായി വികസിപ്പിച്ചെങ്കിലും, സുരക്ഷാ ക്രമീകരണങ്ങൾ പൂർത്തിയാക്കാതെ നടത്തിയ ഗതാഗത ട്രയൽ റൺ പാളി. റോഡിൽ ഇരുവശത്തേക്കും വാഹനങ്ങൾ കടത്തിവിടുന്നതിനുള്ള പരീക്ഷണമാണ് അഞ്ചു മിനിറ്റിനുള്ളിൽ തന്നെ തടസ്സപ്പെട്ടത്.
നിലവിൽ മലാപ്പറമ്പ് ഭാഗത്തുനിന്ന് മാനാഞ്ചിറയിലേക്ക് ഒറ്റദിശയിൽ മാത്രമാണ് ഗതാഗതം അനുവദിച്ചിരുന്നത്. ഇത് മാറ്റി, പൂർണ്ണതോതിൽ ഇരുദിശകളിലേക്കും ഗതാഗതം ക്രമീകരിക്കുന്നതിന്റെ ഭാഗമായാണ് ഇന്നലെ ഉച്ചയ്ക്ക് പന്ത്രണ്ടരയോടെ ട്രയൽ റൺ നടത്തിയത്.
സിഎസ്ഐ ജംക്ഷൻ മുതൽ മലബാർ ക്രിസ്ത്യൻ കോളജ് വരെയുള്ള ഭാഗത്ത് പരീക്ഷണാടിസ്ഥാനത്തിൽ വാഹനങ്ങൾ കടത്തിവിടാൻ പോലീസ് തീരുമാനിച്ചിരുന്നു. ഇതിനായി മലബാർ ക്രിസ്ത്യൻ കോളജ് ജംക്ഷനിൽ പടിഞ്ഞാറുവശത്തെ പാത താൽക്കാലിക ബാരിക്കേഡുകൾ ഉപയോഗിച്ച് അടയ്ക്കുകയും ചെയ്തു.
എന്നാൽ, മാവൂർ റോഡ് ജംക്ഷനിൽനിന്ന് വാഹനങ്ങൾ ഈ പാതയിലേക്ക് പ്രവേശിച്ചതോടെ ഗതാഗതം പൂർണ്ണമായും തടസ്സപ്പെട്ടു. മാവൂർ റോഡ് ജംക്ഷനിൽ വലത്തോട്ട് തിരിയാൻ വാഹനങ്ങൾക്ക് സാധിക്കാത്തതും തിരക്ക് വർദ്ധിക്കാൻ കാരണമായി.
മാനാഞ്ചിറ മുതൽ ക്രിസ്ത്യൻ കോളജ് ജംക്ഷൻ വരെ രൂക്ഷമായ ഗതാഗതക്കുരുക്ക് ഉണ്ടായതോടെ, ആദ്യം കടത്തിവിട്ട വാഹനങ്ങൾ തിരികെ മാനാഞ്ചിറ ഭാഗത്തേക്ക് തന്നെ മടങ്ങേണ്ടി വന്നു.
റോഡിന്റെ ടാറിങ് പൂർത്തിയായെങ്കിലും, സുരക്ഷാ സംവിധാനങ്ങൾ ഇനിയും ഒരുക്കേണ്ടതുണ്ട്. സിഎസ്ഐ, സിഎച്ച് ഫ്ലൈ ഓവർ, മാവൂർ റോഡ്, വൈഎംസിഎ ക്രോസ് റോഡ്, ക്രിസ്ത്യൻ കോളജ്, മനോരമ ജംക്ഷൻ, നടക്കാവ് ക്രോസ് റോഡ്, എരഞ്ഞിപ്പാലം, കരിക്കാംകുളം എന്നിങ്ങനെ ഒൻപത് ജംക്ഷനുകളിലാണ് സിഗ്നൽ സംവിധാനം ആവശ്യമായുള്ളത്.
എരഞ്ഞിപ്പാലത്ത് മാത്രമാണ് നിലവിൽ പഴയ സിഗ്നൽ സംവിധാനമുള്ളത്. സിഗ്നൽ സംവിധാനം പൂർണ്ണമായി പ്രവർത്തനസജ്ജമാക്കാതെ ഇരുദിശകളിലേക്കും ഗതാഗതം അനുവദിക്കുന്നത് വലിയ അപകടങ്ങൾക്ക് വഴിവെക്കുമെന്ന ആശങ്ക ശക്തമാണ്.
ക്രിസ്ത്യൻ കോളജ് ജംക്ഷനിൽ സിഗ്നൽ ഇല്ലാത്തതിനാൽ നിലവിൽ തന്നെ അപകടങ്ങൾ പതിവാണെന്ന് നാട്ടുകാർ ചൂണ്ടിക്കാട്ടുന്നു. ഈ സാഹചര്യത്തിൽ, സിഗ്നൽ സംവിധാനം സ്ഥാപിച്ച ശേഷം മാത്രം ഗതാഗതം ഇരുദിശകളിലേക്കും മാറ്റിയാൽ മതിയെന്ന നിലപാടിലാണ് പോലീസ് അധികൃതർ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
