പുനർനിർമാണത്തിനായി പൊളിച്ചുമാറ്റിയ തൃശൂർ കെഎസ്ആർടിസി ബസ് സ്റ്റാൻഡിന്റെ നിർമാണ പ്രവർത്തനങ്ങൾ മാസങ്ങൾ പിന്നിട്ടിട്ടും എങ്ങുമെത്താതെ തുടരുന്നു. മാർച്ച് 7-ന് അന്നത്തെ ഗതാഗത വകുപ്പ് മന്ത്രി കെ.ബി.ഗണേഷ്കുമാർ ഉദ്ഘാടനം നിർവഹിച്ച പദ്ധതിയാണ് അനിശ്ചിതത്വത്തിലായത്.
സ്റ്റാൻഡ് പൊളിച്ചു നീക്കിയതോടെ ബസ് ജീവനക്കാരും യാത്രക്കാരും ഒരുപോലെ വലിയ ദുരിതമാണ് നേരിടുന്നത്. അത്യാധുനിക സൗകര്യങ്ങളോട് കൂടിയ പുതിയ ബസ് ടെർമിനൽ നിർമിക്കുമെന്നായിരുന്നു പ്രഖ്യാപനം.
പി.ബാലചന്ദ്രൻ എംഎൽഎയുടെ വികസന ഫണ്ടിൽ നിന്ന് 7 കോടി രൂപ, നവകേരള സദസ്സ് ഫണ്ടിൽ നിന്ന് 5 കോടി രൂപ, ആസ്തി വികസന ഫണ്ടിൽ നിന്ന് 2.5 കോടി രൂപ എന്നിങ്ങനെ ആകെ 20 കോടി രൂപ ചെലവഴിച്ചാണ് പദ്ധതി ആസൂത്രണം ചെയ്തിരുന്നത്. സാംസ്കാരിക പൈതൃകം വിളിച്ചോതുന്ന മൂന്നുനില കെട്ടിടം, 24 ബസുകൾക്ക് ഒരേസമയം പാർക്ക് ചെയ്യാനുള്ള സൗകര്യം, റെയിൽവേ സ്റ്റേഷനുമായി ബന്ധിപ്പിക്കുന്ന ആകാശപ്പാത, കന്റീൻ, ശുചിമുറി സമുച്ചയം, വെയിറ്റിങ് ഏരിയ, മുലയൂട്ടൽ കേന്ദ്രം തുടങ്ങിയവയായിരുന്നു വാഗ്ദാനങ്ങൾ.
എങ്കിലും, ഉദ്ഘാടനത്തിന് ശേഷം പൊളിക്കൽ ജോലികൾ മാത്രമാണ് നടന്നത്. നിർമാണ പ്രവർത്തനങ്ങൾക്കായുള്ള ടെൻഡർ നടപടികൾ പോലും ഇതുവരെ പൂർത്തിയായിട്ടില്ല എന്നതാണ് യാഥാർത്ഥ്യം.
കെഎസ്ആർടിസി ഓഫിസ് ഇപ്പോൾ ശക്തൻ സ്റ്റാൻഡിലേക്കാണ് മാറ്റിയിരിക്കുന്നത്. ഐഒസി പെട്രോൾ പമ്പിന്റെ സാന്നിധ്യം കാരണം ബസുകൾക്ക് തിരിയാൻ പോലും സ്ഥലമില്ലാത്ത സ്ഥിതിയാണുള്ളത്.
പ്രതിദിനം 1200-ലധികം ബസുകൾ സർവീസ് നടത്തുന്ന ഇവിടെ, യാത്രക്കാർ ജീവൻ പണയം വെച്ചാണ് സ്റ്റാൻഡിനുള്ളിലേക്ക് പ്രവേശിക്കുന്നത്. തിരക്കേറിയ റോഡിൽ വാഹനങ്ങൾ അനിയന്ത്രിതമായി പാർക്ക് ചെയ്യുന്നത് ഗതാഗതക്കുരുക്ക് രൂക്ഷമാക്കുകയും ചെയ്യുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
