മുഷറഫിന് തുല്യമായ അധികാരവുമായി അസിം മുനീർ; പാകിസ്ഥാനിൽ ഇനി സമ്പൂർണ്ണ സൈനിക ഭരണം

ഇസ്ലാമാബാദ്: പാകിസ്ഥാൻ്റെ സൈനിക ചരിത്രത്തിൽ നിർണായകമായ മാറ്റങ്ങൾക്ക് തുടക്കമിട്ട് സൈനിക മേധാവി ജനറൽ അസിം മുനീർ രാജ്യത്തെ പ്രഥമ ചീഫ് ഓഫ് ഡിഫൻസ് ഫോഴ്‌സായി (CDF) ചുമതലയേറ്റു. സൈനിക അട്ടിമറിയില്ലാതെ തന്നെ രാജ്യത്തെ ഏറ്റവും വലിയ അധികാര കേന്ദ്രമായി സൈന്യത്തെ മാറ്റുന്നതാണ് പുതിയ നീക്കം.

കര, നാവിക, വ്യോമ സേനകളുടെയെല്ലാം പൂർണ നിയന്ത്രണം അസിം മുനീറിന് നൽകുന്ന ഈ പദവി, പാക് ഭരണഘടനയിലെ 27-ാം ഭേദഗതിയിലൂടെയാണ് സൃഷ്ടിച്ചത്. അഞ്ച് വർഷമാണ് സിഡിഎഫിൻ്റെ കാലാവധി.

അധികാരം കേന്ദ്രീകരിക്കുന്നതിലെ മാറ്റങ്ങൾ പുതിയ ഭേദഗതിയോടെ, സൈനിക മേധാവികളിലെ ഏറ്റവും ഉയർന്ന പദവിയായിരുന്ന ചെയർമാൻ ഓഫ് ജോയിൻ്റ് ചീഫ്‌സ് ഓഫ് സ്റ്റാഫ് കമ്മിറ്റി (CJCSC) ഇല്ലാതായി. 1971-ലെ ഇന്ത്യ-പാക് യുദ്ധത്തിന് ശേഷം 1976-ൽ സുൾഫിക്കർ അലി ഭൂട്ടോയാണ് ഈ തസ്തിക രൂപീകരിച്ചത്.

സിഡിഎഫ് പദവി നിലവിൽ വന്നതോടെ കരസേനാ മേധാവിക്ക് മറ്റ് രണ്ട് സേനാ വിഭാഗങ്ങൾക്ക് മുകളിൽ വ്യക്തമായ മേൽക്കൈ ലഭിച്ചു. രാജ്യത്തിൻ്റെ ആണവായുധങ്ങളുടെ പൂർണ നിയന്ത്രണവും ഇനി സിഡിഎഫിനായിരിക്കും.

നേരത്തെ പ്രസിഡൻ്റിലും മന്ത്രിസഭയിലും നിക്ഷിപ്തമായിരുന്ന സേനകളുടെ സംയുക്ത നിയന്ത്രണം ഇതോടെ പൂർണമായും സിഡിഎഫിന് കീഴിലായി. 1947-ൽ സ്വാതന്ത്ര്യം നേടിയത് മുതൽ സൈനിക ഭരണത്തിനും ജനാധിപത്യ സർക്കാരുകൾക്കും ഇടയിൽ ചാഞ്ചാടുന്നതാണ് പാകിസ്ഥാൻ്റെ ചരിത്രം.

1999-ൽ അധികാരം പിടിച്ചെടുത്ത പർവേസ് മുഷറഫാണ് രാജ്യത്തെ അവസാനത്തെ സൈനിക ഭരണാധികാരി. അതിനുശേഷം തിരഞ്ഞെടുക്കപ്പെട്ട

സർക്കാരുകൾ അധികാരത്തിൽ വന്നെങ്കിലും രാഷ്ട്രീയ, സാമ്പത്തിക രംഗങ്ങളിൽ സൈന്യത്തിൻ്റെ അദൃശ്യമായ സ്വാധീനം ശക്തമായി തുടർന്നു. ഈ ഭരണസംവിധാനത്തെ രാഷ്ട്രീയ നിരീക്ഷകർ ‘ഹൈബ്രിഡ് ഭരണം’ എന്നാണ് വിശേഷിപ്പിക്കുന്നത്.

അസിം മുനീറിൻ്റെ വർധിച്ച അധികാരവും നിയമപരിരക്ഷയും പുതിയ നിയമനിർമ്മാണം ജനറൽ അസിം മുനീറിന് 2030 വരെ കാലാവധി ഉറപ്പാക്കുന്നു. യഥാർത്ഥത്തിൽ വിരമിക്കേണ്ടിയിരുന്ന അദ്ദേഹത്തിൻ്റെ കാലാവധി, കഴിഞ്ഞ വർഷത്തെ ഭേദഗതിയിലൂടെ 2027 നവംബർ വരെ നീട്ടിയിരുന്നു.

ഇപ്പോൾ സിഡിഎഫ് ആയി നിയമിതനായതോടെ അഞ്ച് വർഷം കൂടി അധികമായി ലഭിച്ചു. ഈ നിയമമാറ്റങ്ങൾ അസിം മുനീറിന് പ്രസിഡൻ്റിന് തുല്യമായ നിയമപരിരക്ഷയാണ് നൽകുന്നത്.

ഫീൽഡ് മാർഷൽ പദവി ലഭിക്കുന്നതോടെ, നിയമനടപടികളിൽ നിന്ന് അദ്ദേഹത്തിന് ആജീവനാന്ത സംരക്ഷണം ലഭിക്കും. സമാനമായ പരിരക്ഷ മറ്റ് രണ്ട് സേനാ മേധാവികൾക്കും നൽകിയിട്ടുണ്ട്.

ഇതുകൂടാതെ, സൈന്യത്തിന്മേലുള്ള സിവിൽ സർക്കാരിൻ്റെ നിയന്ത്രണം കുറയ്ക്കുന്ന ഭേദഗതികളും പാസാക്കിയിട്ടുണ്ട്. വൈസ് ചീഫ് ഓഫ് ആർമി സ്റ്റാഫിനെ (VCOAS) നിയമിക്കാനുള്ള ശുപാർശ നൽകാനുള്ള അധികാരം ഇനി സിഡിഎഫിനായിരിക്കും.

മുൻപ് ഇത് സർക്കാരിൻ്റെ അധികാരപരിധിയിലായിരുന്നു. “ഫീൽഡ് മാർഷൽ അസിം മുനീർ ഇതോടെ പാകിസ്ഥാനിലെ ഏറ്റവും ശക്തനായ വ്യക്തിയായി മാറി.

രാഷ്ട്രീയക്കാരാണ് അദ്ദേഹത്തിന് ഈ അധികാരം നൽകിയത്. സ്വന്തം താൽക്കാലിക നേട്ടങ്ങൾക്കായി അവർ രാജ്യത്തിൻ്റെ ദീർഘകാല താൽപര്യങ്ങൾ ബലികഴിച്ചു,” എന്ന് പ്രതിരോധ വിദഗ്ദ്ധൻ നയീം ഖാലിദ് ലോധി പ്രതികരിച്ചു.

മുൻ സൈനിക ഭരണാധികാരി പർവേസ് മുഷറഫിന് തുല്യമായ അധികാരമാണ് മുനീറിന് ലഭിച്ചിരിക്കുന്നതെന്ന് സൗത്ത് ഏഷ്യൻ വിഷയങ്ങളിലെ വിദഗ്ദ്ധൻ ശുജാ നവാസും അഭിപ്രായപ്പെട്ടു. FacebookTwitterWhatsAppTelegram