നമ്മുടെ ജീവിതത്തിൽ സോഷ്യൽ മീഡിയയുടെ സ്വാധീനം വളരെ വലുതാണ്, അതുപോലെതന്നെ അതുണ്ടാക്കുന്ന സാമ്പത്തിക നഷ്ടങ്ങളും. കൺമുന്നിൽ നിരന്തരം മിന്നിമറയുന്ന ഉത്പ്പന്നങ്ങളുടെ പരസ്യങ്ങൾ, ആവശ്യമുള്ളതും ഇല്ലാത്തതുമായ വസ്തുക്കൾ വാങ്ങിക്കൂട്ടുന്നതിനെ ഒരു ശീലമാക്കി മാറ്റിയിരിക്കുന്നു.
ഫർണിച്ചറുകൾ, വസ്ത്രങ്ങൾ, സൗന്ദര്യവർദ്ധക വസ്തുക്കൾ, അടുക്കള ഉപകരണങ്ങൾ, വീടലങ്കാരത്തിനുള്ള സാധനങ്ങൾ എന്നിങ്ങനെ ഈ പട്ടിക നീളുന്നു. ഇത് സാമ്പത്തിക നഷ്ടം, മാലിന്യ വർദ്ധനവ്, സ്ഥലപരിമിതി തുടങ്ങിയ നിരവധി പ്രശ്നങ്ങൾക്ക് വഴിവയ്ക്കുന്നു.
എന്നിരുന്നാലും, ഈ പ്രവണതകൾക്കിടയിലും മിനിമലിസം എന്ന ലളിത ജീവിതരീതി ഇഷ്ടപ്പെടുകയും പിന്തുടരുകയും ചെയ്യുന്ന ഒരു വിഭാഗം ആളുകളും നമുക്കിടയിലുണ്ട്. എന്താണ് മിനിമലിസം? അമിതമായി സാധനങ്ങൾ വാങ്ങിക്കൂട്ടുന്ന ശീലത്തിന് വിപരീതമായി, ജീവിതത്തിന് അത്യാവശ്യമായവ മാത്രം തിരഞ്ഞെടുക്കുന്ന ലളിതമായ ജീവിതശൈലിയാണ് മിനിമലിസം.
ഇത് കേവലം വസ്തുക്കൾ ഒഴിവാക്കുന്നതിൽ ഒതുങ്ങുന്നില്ല, മറിച്ച് ഒരു സമ്പൂർണ്ണ ജീവിതരീതിയാണ്. ഭൗതികതയ്ക്ക് അപ്പുറം, പ്രധാനപ്പെട്ട
ബന്ധങ്ങൾക്കും അർത്ഥവത്തായ ഇടപെടലുകൾക്കും പ്രാധാന്യം നൽകുന്ന ഒരു തത്വമാണിത്. ജീവിതത്തിൽ കൂടുതൽ സമാധാനവും സന്തോഷവും കണ്ടെത്തുക എന്നതാണ് മിനിമലിസത്തിൻ്റെ പ്രധാന ലക്ഷ്യം.
അതിവേഗം മാറുന്ന ഷോപ്പിംഗ് രീതികളും മിനിമലിസത്തിൻ്റെ പ്രാധാന്യവും കടകളിൽ പോകാതെ, സമയം പാഴാക്കാതെ, വിരൽത്തുമ്പിൽ ആയിരക്കണക്കിന് ഉത്പ്പന്നങ്ങൾ ലഭ്യമാകുന്ന ഡിജിറ്റൽ ഷോപ്പിംഗിൻ്റെ കാലഘട്ടത്തിലാണ് നാം ജീവിക്കുന്നത്. പണമടച്ചാൽ നിമിഷങ്ങൾക്കകം സാധനങ്ങൾ വീട്ടിലെത്തും.
സോഷ്യൽ മീഡിയ ഇൻഫ്ലുവൻസർമാരും പരസ്യങ്ങളും നമ്മെ നിരന്തരം പുതിയവ വാങ്ങാൻ പ്രേരിപ്പിക്കുന്നു. ഇതിൻ്റെ ഫലമായി പലപ്പോഴും ആവശ്യമില്ലാത്ത വസ്തുക്കൾ പോലും നാം സ്വന്തമാക്കുന്നു.
എന്നാൽ, ഈ വാങ്ങിക്കൂട്ടലുകൾ യഥാർത്ഥത്തിൽ സന്തോഷം നൽകുന്നുണ്ടോ? വസ്തുക്കളിൽ നിന്ന് ലഭിക്കുന്ന സന്തോഷം പലപ്പോഴും ക്ഷണികമാണ്. ഈ സാഹചര്യത്തിലാണ് മിനിമലിസത്തിൻ്റെ പ്രാധാന്യം വർദ്ധിക്കുന്നതും കൂടുതൽ ആളുകൾ അതിനെക്കുറിച്ച് ചിന്തിക്കാൻ തുടങ്ങുന്നതും.
‘എല്ലാം വേണം’ എന്ന ചിന്തയിൽ നിന്ന് ‘യഥാർത്ഥത്തിൽ എന്താണ് ആവശ്യം’ എന്ന ചോദ്യത്തിലേക്ക് മാറുന്നതാണ് മിനിമലിസത്തിൻ്റെ കാതൽ. ആവശ്യത്തിനുള്ള വസ്ത്രങ്ങൾ, വീട്ടിലേക്ക് വേണ്ട
അവശ്യവസ്തുക്കൾ എന്നിങ്ങനെ തിരഞ്ഞെടുപ്പുകൾ പരിമിതപ്പെടുത്തുക. ഉപയോഗശൂന്യമായ വസ്തുക്കൾ വീട്ടിൽ നിന്ന് ഒഴിവാക്കുന്നതിലൂടെ ഭൗതികമായ സ്ഥല സൗകര്യം മാത്രമല്ല, മനസ്സിനും കൂടുതൽ വെളിച്ചവും തെളിച്ചവും ലഭിക്കുന്നു.
ഇതാണ് മിനിമലിസം നൽകുന്ന പ്രധാന പാഠം. മിനിമലിസത്തിൻ്റെ ഗുണങ്ങൾ സമ്മർദ്ദം കുറയ്ക്കുന്നു: അനാവശ്യ വസ്തുക്കളും സങ്കീർണ്ണമായ സാഹചര്യങ്ങളും നിറഞ്ഞ ജീവിതം മാനസിക സമ്മർദ്ദം വർദ്ധിപ്പിക്കും.
എന്നാൽ, മിനിമലിസം ജീവിതം ലളിതമാക്കുന്നതിലൂടെ ഈ സമ്മർദ്ദം കുറയ്ക്കാൻ സഹായിക്കുന്നു. കാര്യക്ഷമത വർദ്ധിപ്പിക്കുന്നു: അപ്രധാനമായ കാര്യങ്ങളിൽ നിന്ന് ശ്രദ്ധ മാറുമ്പോൾ, പ്രധാനപ്പെട്ട
ജോലികളിൽ കൂടുതൽ ശ്രദ്ധ കേന്ദ്രീകരിക്കാൻ സാധിക്കുന്നു. ഇത് കാര്യക്ഷമതയും ഉത്പാദനക്ഷമതയും വർദ്ധിപ്പിക്കാൻ സഹായിക്കുന്നു.
സാമ്പത്തിക നേട്ടം: അത്യാവശ്യ വസ്തുക്കൾ മാത്രം വാങ്ങാൻ തീരുമാനിക്കുന്നതിലൂടെ അനാവശ്യ ചെലവുകൾ ഒഴിവാക്കാനാകും. ഇത് വലിയ സാമ്പത്തിക ലാഭത്തിന് വഴിയൊരുക്കുകയും സാമ്പത്തിക ഭദ്രത നൽകുകയും ചെയ്യുന്നു.
പരിസ്ഥിതിക്ക് ഗുണകരം: ഉപഭോഗം കുറയ്ക്കുന്നതിലൂടെ മാലിന്യത്തിൻ്റെ അളവ് ഗണ്യമായി കുറയ്ക്കാൻ സാധിക്കും. പ്ലാസ്റ്റിക് പോലുള്ള വസ്തുക്കളുടെ ഉപയോഗം പരിമിതപ്പെടുത്തുന്നത് പരിസ്ഥിതിക്ക് വലിയ നേട്ടമാണ്.
ഇത് സുസ്ഥിരമായ ഒരു ജീവിതരീതിക്ക് അടിത്തറ പാകുന്നു. ഡിജിറ്റൽ മിനിമലിസം: ഭൗതിക വസ്തുക്കളിൽ മാത്രമല്ല, ഡിജിറ്റൽ ലോകത്തും മിനിമലിസം പ്രായോഗികമാക്കാം.
സോഷ്യൽ മീഡിയയുടെയും മറ്റ് ഡിജിറ്റൽ ഉപകരണങ്ങളുടെയും അമിതോപയോഗം നമ്മുടെ സമയവും മാനസികാരോഗ്യവും കവർന്നെടുക്കുന്നു. അമിതമായ വിവരങ്ങൾ, താരതമ്യങ്ങൾ, എന്നിവ മാനസിക പിരിമുറുക്കത്തിന് കാരണമാകുന്നു.
സ്ക്രീൻ സമയം കുറച്ച്, ഡിജിറ്റൽ ഉപകരണങ്ങളെ നിയന്ത്രിതമായി ഉപയോഗിക്കുന്നത് മാനസികാരോഗ്യത്തിന് അത്യന്താപേക്ഷിതമാണ്. വ്യക്തമായ ലക്ഷ്യബോധം: അനാവശ്യ കാര്യങ്ങൾ ഒഴിവാക്കുന്നതിലൂടെ ജീവിതത്തിലെ യഥാർത്ഥ ലക്ഷ്യങ്ങളിൽ ശ്രദ്ധ കേന്ദ്രീകരിക്കാൻ സാധിക്കുന്നു.
ഇത് കൂടുതൽ സംതൃപ്തിയും മാനസിക സന്തോഷവും നൽകുന്നു. ലളിതമായ ജീവിതം, നിറഞ്ഞ സന്തോഷം: ആവശ്യങ്ങൾക്കനുസരിച്ചുള്ള ഒരു ചെറിയ വീട്, അതിൽ അത്യാവശ്യ ഫർണിച്ചറുകളും മറ്റ് വസ്തുക്കളും മാത്രം.
വസ്തുക്കളുടെ പരിപാലനത്തിനായി സമയം കളയാതെ, മനസ്സിന് സന്തോഷം നൽകുന്ന കാര്യങ്ങളിൽ കൂടുതൽ ശ്രദ്ധ കേന്ദ്രീകരിക്കാൻ ഈ ജീവിതരീതി സഹായിക്കുന്നു. ലോകം മിനിമലിസം പരിശീലിക്കുമ്പോൾ ഇന്ത്യ ഉൾപ്പെടെ ലോകമെമ്പാടും ഇന്ന് നിരവധി ആളുകൾ മിനിമലിസം ഒരു ജീവിതരീതിയായി സ്വീകരിക്കുന്നുണ്ട്.
ഈ വിഷയത്തെക്കുറിച്ചുള്ള പുസ്തകങ്ങൾ, ഡോക്യുമെൻ്ററികൾ, വീഡിയോകൾ എന്നിവയെല്ലാം ഈ മാറ്റത്തിന് പ്രചോദനമാകുന്നു. നിങ്ങളും മിനിമലിസത്തിലേക്ക് മാറാൻ ആഗ്രഹിക്കുന്നുവെങ്കിൽ, ഇതൊരു പെട്ടെന്നുള്ള മാറ്റമല്ലെന്ന് മനസ്സിലാക്കുക.
തുടക്കത്തിൽ ചില പ്രയാസങ്ങൾ നേരിടാം. അതിനാൽ, ഈ ജീവിതശൈലി നിങ്ങൾക്ക് അനുയോജ്യമാണോ എന്ന് സ്വയം വിലയിരുത്തേണ്ടത് അത്യാവശ്യമാണ്.
മിനിമലിസത്തിലെ 90/90 നിയമം: മിനിമലിസം പരീക്ഷിക്കാൻ ആഗ്രഹിക്കുന്നവർക്ക് പിന്തുടരാവുന്ന ഒരു ലളിതമായ നിയമമാണിത്. കഴിഞ്ഞ 90 ദിവസമായി നിങ്ങൾ ഉപയോഗിക്കാത്ത ഒരു വസ്തു, അടുത്ത 90 ദിവസത്തിനുള്ളിൽ ഉപയോഗിക്കാൻ സാധ്യതയില്ലെങ്കിൽ, അത് ഒഴിവാക്കുക.
അപ്രധാനമായ വസ്തുക്കളെ ജീവിതത്തിൽ നിന്ന് മാറ്റിനിർത്താൻ ഈ നിയമം സഹായിക്കും. ഷോപ്പിംഗ് നിയന്ത്രിക്കുക: ഒരു നിശ്ചിത കാലയളവിലേക്ക് (ഉദാഹരണത്തിന് ഒരാഴ്ചയോ ഒരു മാസമോ) ഷോപ്പിംഗ് പൂർണ്ണമായി ഒഴിവാക്കുന്നത് മിനിമലിസത്തിലേക്കുള്ള ഒരു മികച്ച ചുവടുവെപ്പാണ്.
ഈ കാലയളവിലേക്ക് ആവശ്യമായ സാധനങ്ങൾ മുൻകൂട്ടി വാങ്ങിവെച്ച ശേഷം, പുതിയതൊന്നും വാങ്ങില്ലെന്ന് തീരുമാനിക്കുക. ഇത് കയ്യിലുള്ള വസ്തുക്കൾ പൂർണ്ണമായി ഉപയോഗിക്കാനും അനാവശ്യ വാങ്ങലുകൾ ഒഴിവാക്കാനും സഹായിക്കും.
വീട് നിർമ്മാണം മുതൽ ദൈനംദിന ജീവിതത്തിലെ പല കാര്യങ്ങളിലും ഇന്ന് മിനിമലിസം സ്വാധീനം ചെലുത്തുന്നുണ്ട്. തിരക്കേറിയ ജീവിതവും ഡിജിറ്റൽ ലോകത്തെ അമിതമായ ഇടപെടലുകളും സൃഷ്ടിക്കുന്ന മടുപ്പിൽ നിന്നും തളർച്ചയിൽ നിന്നും രക്ഷനേടാൻ പലരും ഈ വഴി തിരഞ്ഞെടുക്കുന്നു.
ആഡംബരങ്ങൾക്കും പരസ്യങ്ങൾക്കും പിന്നാലെ പോയി സമ്മർദ്ദവും സാമ്പത്തിക ബാധ്യതയും വർദ്ധിപ്പിക്കുന്നതിന് പകരം, ചെലവുകൾ കുറച്ച് മാനസികമായ സന്തോഷം കണ്ടെത്താൻ മിനിമലിസം സഹായിക്കുമെന്നതിൽ സംശയമില്ല. FacebookTwitterWhatsAppTelegram
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
