തൈക്കാട്ടുശേരി അപ്രോച്ച് റോഡ് പൈപ്പിന്റെ അറ്റകുറ്റപ്പണി 11 മുതൽ; ജലവിതരണം മുടങ്ങും

തുറവൂർ∙ തൈക്കാട്ടുശേരി–തുറവൂർ റോഡിന്റെ അനുബന്ധറോഡായ  തൈക്കാട്ടുശേരി അപ്രോച്ച് റോഡിൽ പൊട്ടിയ ജപ്പാൻ ശുദ്ധജല പൈപ്പിന്റെ അറ്റകുറ്റപ്പണി 11ന് തുടങ്ങും. അരൂർ, എഴുപുന്ന, കോടംതുരുത്ത്, കുത്തിയതോട്, തുറവൂർ, പട്ടണക്കാട്, കടക്കരപ്പള്ളി, വയലാർ പഞ്ചായത്തുകളുടെ പരിധിയിൽ ജലവിതരണം പൂർണമായും തടസ്സപ്പെടും.

മാക്കേക്കടവ് പ്രധാന സംഭരണിയിൽ നിന്നു പോകുന്ന 800 എംഎം എച്ച്ഡിപി പൈപ്പാണ് പൊട്ടിയത്. അരൂർ മണ്ഡലത്തിലെ അരൂർ, എഴുപുന്ന, കോടംതുരുത്ത്, കുത്തിയതോട്, തുറവൂർ, ചേർത്തല മണ്ഡലത്തിലെ പട്ടണക്കാട്, വയലാർ, കടക്കരപ്പള്ളി എന്നീ പഞ്ചായത്തുകളിലെ ജലസംഭരണികളിലേക്കു ശുദ്ധജലം എത്തിക്കുന്ന പ്രധാന പൈപ്പാണിത്.
ജപ്പാൻ ശുദ്ധജല വിതരണക്കുഴലിൽ ചോർച്ചയുണ്ടായ ഭാഗത്തു രാവിലെ മുതൽ അറ്റകുറ്റപ്പണി തുടങ്ങുമെന്നാണ് അധികൃതർ പറയുന്നത്.

വെള്ളം വിതരണം പൂർണമായും നിർത്തിവച്ചും തൈക്കാട്ടുശ്ശേരി–തുറവൂർ പാലത്തിലൂടെയുള്ള ഗതാഗതം നിരോധിച്ചുമാണ് പണികൾ നടത്തുന്നത്. എത്രയും വേഗം അറ്റകുറ്റപ്പണികൾ തീർക്കാനുള്ള ശ്രമത്തിലാണ് അധികൃതർ.
ശുദ്ധജല പദ്ധതി കമ്മിഷൻ ചെയ്ത് മാസങ്ങൾക്കകം ഇവിടെ ചോർച്ച കണ്ടെത്തി.

നിലവിൽ ഇരുപതിലേറെ തവണ ഇവിടെ പൈപ്പ് പൊട്ടി ചോർച്ചയുണ്ടായിട്ടുണ്ട്. തൈക്കാട്ടുശേരി പാലത്തിന്റെ അപ്രോച്ച് റോഡിലെ വളവിലൂടെയാണ് പൈപ്പ് പോകുന്നത്.

ചതുപ്പ് സ്ഥലമായതിനാൽ ഇതിലൂടെ ഭാരവാഹനങ്ങൾ കടന്നുപോകുമ്പോൾ സമ്മർദം താങ്ങാനാകാതെ പൈപ്പിന്റെ ജോയിന്റ് ഭാഗത്ത് നിന്നു ചോർച്ച സംഭവിക്കുകയാണ്.
പൊട്ടിയ എച്ച്ഡിപി പൈപ്പ് മാറ്റി സ്റ്റീൽ പൈപ്പ് സ്ഥാപിച്ചാൽ മാത്രമേ ശാശ്വത പരിഹാരമാകുകയുള്ളൂ. മണ്ണുമാന്തി യന്ത്രം ഉപയോഗിച്ച് റോഡ് പൊളിച്ച ശേഷം ചോർച്ചയുണ്ടായ ഭാഗത്ത് മെക്കാനിക്കൽ ജോയിന്റ് ഉപയോഗിച്ച് കുഴലുകൾ കൂട്ടിയോജിപ്പിക്കും.

അറ്റകുറ്റപ്പണികൾക്കായി 13 വരെ സമയം വേണ്ടിവരുമെന്നാണ് അതോറിറ്റി പറയുന്നത്. … FacebookTwitterWhatsAppTelegram