റെനോ ക്വിഡിന്റെ പത്താം വാർഷികം; പുതിയ പതിപ്പ് വിപണിയിൽ

2015 ൽ ആദ്യമായി പുറത്തിറക്കിയ റെനോ ക്വിഡ് ഇപ്പോൾ ഇന്ത്യൻ വിപണിയിൽ വിജയകരമായ 10 വർഷങ്ങൾ പൂർത്തിയാക്കിയിരിക്കുന്നു. ഈ നാഴികക്കല്ലിന്റെ ഓർമ്മയ്ക്കായി ഫ്രഞ്ച് വാഹന നിർമ്മാതാക്കൾ വേരിയന്റ് ലൈനപ്പിലെ അപ്‌ഡേറ്റുകൾക്കൊപ്പം ഹാച്ച്ബാക്കിന്റെ ഒരു പ്രത്യേക പത്താം വാർഷിക പതിപ്പ് അവതരിപ്പിച്ചു.

ടെക്നോ വേരിയന്റിനെ അടിസ്ഥാനമാക്കിയുള്ളതാണ് റെനോ ക്വിഡ് 10 ആം വാർഷിക പതിപ്പ്. മാനുവൽ പതിപ്പിന് 5.14 ലക്ഷം രൂപയും എഎംടി വേരിയന്റിന് 5.63 ലക്ഷം രൂപയുമാണ് വില.

ഈ പ്രത്യേക പതിപ്പിന്റെ 550 യൂണിറ്റുകൾ മാത്രമേ ഇന്ത്യയിലുടനീളം വിൽക്കുകയുള്ളൂ. കറുത്ത മേൽക്കൂരയുള്ള ഫിയറി റെഡ്, കറുത്ത മേൽക്കൂരയുള്ള പുതിയ ഷാഡോ ഗ്രേ എന്നീ രണ്ട് ഡ്യുവൽ-ടോൺ കളർ ഓപ്ഷനുകളിലാണ് സ്പെഷ്യൽ എഡിഷൻ വരുന്നത്.

പുറംഭാഗത്ത്, മഞ്ഞ ഇൻസേർട്ടുള്ള റെനോയുടെ സിഗ്നേച്ചർ ഗ്രിൽ, തിളങ്ങുന്ന കറുത്ത ഫ്ലെക്സ് വീലുകൾ, വാതിലുകളിലും സി-പില്ലറിലും വാർഷിക ഡെക്കലുകൾ എന്നിവ ഇതിന്റെ സവിശേഷതകളാണ്. മഞ്ഞ നിറത്തിലുള്ള സീറ്റ് അപ്ഹോൾസ്റ്ററി, തീം ഇൻഫോടെയ്ൻമെന്റ് സറൗണ്ടുകൾ, മസ്റ്റാർഡ് സ്റ്റിച്ചിംഗുള്ള ലെതറെറ്റ് സ്റ്റിയറിംഗ്, പ്രകാശിതമായ സ്കഫ് പ്ലേറ്റുകൾ എന്നിവയാൽ റെനോ ക്വിഡ് 10 -ാം വാർഷിക പതിപ്പിന്റെ ഇന്റീരിയർ സ്പോർട്ടി ലുക്കാണ്.

യാത്രികരുടെ സുരക്ഷ വർദ്ധിപ്പിക്കുന്നതിനായി, റെനോ ഇപ്പോൾ എല്ലാ സീറ്റുകളിലും മൂന്ന് പോയിന്റ് സീറ്റ് ബെൽറ്റുകൾ സ്റ്റാൻഡേർഡായി വാഗ്ദാനം ചെയ്യുന്നു. അതേസമയം ക്ലൈമ്പർ വേരിയന്റിന് ആറ് എയർബാഗുകൾ ലഭിക്കുന്നു.

RXL വേരിയന്റിന്റെ പേര് എവലൂഷൻ എന്നും ആർഎക്സ്‍ടി വേരിയന്റിന്റെ പേര് ടെക്നോ എന്നും റെനോ പുനർനാമകരണം ചെയ്തിട്ടുണ്ട്. അതേസമയം ക്ലൈമ്പർ വേരിയന്റ് മാറ്റമില്ലാതെ തുടരുന്നു.

2025 റെനോ ക്വിഡിൽ 1.0 ലിറ്റർ, 3 സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിൻ തുടർന്നും ഉപയോഗിക്കും. ഈ എഞ്ചിൻ പരമാവധി 68 bhp കരുത്തും 91 Nm ടോർക്കും പുറപ്പെടുവിക്കും.

ട്രാൻസ്മിഷൻ തിരഞ്ഞെടുപ്പുകളിലും മാറ്റമില്ല. അതായത് 5-സ്പീഡ് മാനുവൽ, 5-സ്പീഡ് എഎംടി തന്നെ ആയിരിക്കും ട്രാൻസ്‍മിഷൻ.

ഇന്ത്യയിലെ റെനോയുടെ യാത്രയെ രൂപപ്പെടുത്തുന്നതിലും, അതിന്റെ നൂതനത്വം, പ്രവേശനക്ഷമത 95 ശതമാനത്തിൽ അധികം പ്രാദേശികവൽക്കരണം എന്നിവയിലൂടെ എൻട്രി സെഗ്‌മെന്റിനെ പുനർനിർവചിക്കുന്നതിലും ക്വിഡ് നിർണായക പങ്ക് വഹിച്ചിട്ടുണ്ടെന്ന് റെനോ ക്വിഡ് വാർഷിക പതിപ്പിന്റെ ലോഞ്ചിൽ സംസാരിച്ച റെനോ ഇന്ത്യ മാനേജിംഗ് ഡയറക്ടർ വെങ്കട്ട്‌റാം മാമില്ലപള്ളെ പറഞ്ഞു. മൈക്രോ-എസ്‌യുവി വിഭാഗത്തിൽ ഇതിനകം തന്നെ പുതിയ മാനദണ്ഡങ്ങൾ സ്ഥാപിച്ചിട്ടുള്ളതിനാൽ, പത്താം വാർഷിക പതിപ്പ് ഒരു സുപ്രധാന നാഴികക്കല്ലാണെന്നും ഒരു ദശാബ്ദക്കാലത്തെ ഉപഭോക്തൃ വിശ്വാസവും ഉയർന്ന മൂല്യമുള്ള മൊബിലിറ്റി പരിഹാരങ്ങൾ നൽകുന്നതിനുള്ള തങ്ങളുടെ പ്രതിബദ്ധതയും ആഘോഷിക്കുന്നുവെന്നും അദ്ദേഹം വ്യക്തമാക്കി.

  … FacebookTwitterWhatsAppTelegram