രാവിലെ തകർത്ത റെക്കോർഡ് ഉച്ചയ്ക്ക് വീണ്ടും പുതുക്കിയെഴുതി സ്വർണത്തിന്റെ കുതിച്ചുകയറ്റം. രാജ്യാന്തര വില വീണ്ടും ഔൺസിന് 3,700 ഡോളറും ഭേദിച്ച് കാഴ്ചവയ്ക്കുന്ന മുന്നേറ്റമാണ് ആവേശക്കാറ്റായി കേരളത്തിലും ആഞ്ഞടിക്കുന്നത്.
ഇന്നുച്ചയ്ക്ക് സംസ്ഥാനത്ത് ഗ്രാമിന് 45 രൂപ കൂടി വർധിച്ച് വില 10,365 രൂപയായി. പവന് 360 രൂപ മുന്നേറി 82,920 രൂപയുമെത്തി.
രാവിലെ കുറിച്ച ഗ്രാമിന് 10,320 രൂപയും പവന് 82,560 രൂപയുമെന്ന റെക്കോർഡിനുണ്ടായിരുന്നത് ഏതാനും മണിക്കൂറുകളുടെ മാത്രം ആയുസ്സ്.
ഇന്ന് ഒറ്റദിവസം ഇതോടെ ഗ്രാമിന് 85 രൂപയും പവന് 680 രൂപയുമാണ് കൂടിയത്. 83,000 രൂപയെന്ന പുത്തൻ നാഴികക്കല്ലിലേക്ക് ഇനി പവനുള്ളത് വെറും 80 രൂപയുടെ അകലം.
ജിഎസ്ടിയും (3%), പണിക്കൂലിയും (3-35%), ഹോൾമാർക്ക് ഫീസും (53.10 രൂപ) കൂടിച്ചേരുമ്പോഴുള്ള സ്വർണാഭരണത്തിന്റെ മിനിമം വാങ്ങൽവില പോലും ഗ്രാമിന് 11,200 രൂപയ്ക്കടുത്തായി; ഒറ്റ പവൻ ആഭരണം വാങ്ങാൻ കൊടുക്കേണ്ടത് മിനിമം 89,400 രൂപയോളവും.
രാജ്യാന്തര വില കഴിഞ്ഞവാരം കുറിച്ച ഔൺസിന് 3,704 ഡോളർ എന്ന റെക്കോർഡും ഭേദിച്ച് ഇപ്പോൾ സർവകാല ഉയരമായ 3,722 ഡോളറിലെത്തിയിട്ടുണ്ട്.
ഓരോ നിമിഷവും വില കൂടുന്ന ട്രെൻഡാണ് രാജ്യാന്തര വിപണിയിൽ കാണുന്നതും; ആനുപാതികമായി കേരളത്തിൽ ഇനിയും വില കൂടും. ഒരുപക്ഷേ ഇന്നുതന്നെയോ നാളി രാവിലെയോ കേരളത്തിൽ പവൻവില 83,000 രൂപ കടക്കും.
യുഎസിൽ അടിസ്ഥാന പലിശനിരക്ക് കഴിഞ്ഞവാരം കുറച്ചതും ഈയാഴ്ച പുറത്തുവരുന്ന പണപ്പെരുപ്പക്കണക്ക് തുണച്ചാൽ ഇനിയും പലിശനിരക്ക് കുറയാനുള്ള സാധ്യതയുമാണ് സ്വർണത്തിന് നേട്ടമാകുന്നത്. പലിശനിരക്ക് കുറയുമ്പോൾ ബാങ്ക് നിക്ഷേപം, യുഎസ് ഗവൺമെന്റിന്റെ കടപ്പത്രങ്ങളിൽ നടത്താവുന്ന നിക്ഷേപം എന്നിവ അനാകർഷകമാകും.
ഇത് ഗോൾഡ് ഇടിഎഫ് പോലുള്ള സ്വർണ നിക്ഷേപങ്ങളുടെ സ്വീകാര്യ കൂട്ടും. ഇതാണ് വില കൂടാനിടയാക്കുന്നത്.
കേരളത്തിൽ ചില ജ്വല്ലറികളിൽ 18 കാരറ്റ് സ്വർണവില ഗ്രാമിന് ഉച്ചയ്ക്ക് 35 രൂപ കൂടി വർധിച്ച് 8,585 രൂപയായി.
വെള്ളിവില ഉച്ചയ്ക്ക് മാറിയില്ല; ഗ്രാമിന് 144. മറ്റ് ചില ജ്വല്ലറികൾ 18 കാരറ്റിന് ഈടാക്കുന്നത് ഗ്രാമിന് ഉച്ചയ്ക്ക് 40 രൂപ ഉയർത്തി 8,520 രൂപയാണ്; വെള്ളിക്ക് 140 രൂപയും.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
(Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല.
ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക) … FacebookTwitterWhatsAppTelegram
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
