മുംബൈ/ദില്ലി: പാകിസ്ഥാൻ വ്യോമപാത അടച്ചതിനാൽ ഇന്ത്യൻ വിമാന കമ്പനികൾക്ക് ആഴ്ചയിൽ 77 കോടി രൂപയുടെ അധിക ചെലവ് നേരിടേണ്ടി വന്നേക്കാമെന്ന് റിപ്പോര്‍ട്ട്. വ്യോമപാതയിലെ നിയന്ത്രണങ്ങൾ കാരണം ഇന്ധന ഉപഭോഗം വർധിക്കുകയും യാത്രാ ദൈർഘ്യം കൂടുകയും ചെയ്യും. ഇതോടെ വടക്കേ ഇന്ത്യൻ നഗരങ്ങളിൽ നിന്നുള്ള അന്താരാഷ്ട്ര വിമാനങ്ങൾക്ക് വലിയ തിരിച്ചടിയാണ് നേരിടേണ്ടി വരിക.
അന്താരാഷ്ട്ര വിമാനങ്ങളുടെ എണ്ണത്തെയും, വർധിച്ച യാത്രാ സമയം കണക്കാക്കിയുള്ള ഏകദേശ ചെലവുകളെയും കുറിച്ചുള്ള വിശകലനം അനുസരിച്ച്, പ്രതിമാസ അധിക പ്രവർത്തന ചെലവ് 306 കോടി രൂപയിലധികമായിരിക്കുമെന്നും റിപ്പോര്‍ട്ടുകൾ പറയുന്നു. പഹൽഗാം ഭീകരാക്രമണത്തെ തുടർന്ന് ഇന്ത്യയും പാകിസ്ഥാനും തമ്മിലുള്ള സംഘർഷം വർധിക്കുന്നതിനിടയിലാണ് വ്യോമപാത അടച്ചത്. ഇന്ത്യൻ വിമാനക്കമ്പനികൾക്ക് തങ്ങളുടെ വ്യോമപാത ഉപയോഗിക്കുന്നതിന് വിലക്കേർപ്പെടുത്തുകയാണെന്ന് വ്യാഴാഴ്ചയാണ് പാകിസ്ഥാൻ അറിയിച്ചത്. ദില്ലിയില്‍ നിന്നും വടക്കേ ഇന്ത്യൻ നഗരങ്ങളിൽ നിന്നുമുള്ള അന്താരാഷ്ട്ര വിമാനങ്ങൾക്ക് ബദൽ റൂട്ട് സ്വീകരിക്കുന്നത് യാത്രാ സമയം 1.5 മണിക്കൂർ വരെ വർദ്ധിപ്പിക്കും.
വടക്കേ അമേരിക്കയിലേക്കുള്ള 16 മണിക്കൂർ യാത്രാ വിമാനങ്ങൾക്ക് ഏകദേശം 1.5 മണിക്കൂർ അധികമായി വരും എന്ന് വിമാനഗതാഗത മേഖലയിലെ ഒരു മുതിർന്ന ഉദ്യോഗസ്ഥൻ പറഞ്ഞു. 1.5 മണിക്കൂർ അധിക യാത്രയ്ക്ക്, യാത്രാമധ്യേയുള്ള ഒരു വിമാനത്താവളത്തിൽ ഇറങ്ങുന്നതിന്, പാർക്കിംഗ് ചാർജുകൾ എന്നിവ ഉൾപ്പെടെ ഏകദേശം 29 ലക്ഷം രൂപ ചെലവ് വരും എന്നും അദ്ദേഹം പറഞ്ഞു. അതുപോലെ, യൂറോപ്പിലേക്കുള്ള ഒമ്പത് മണിക്കൂർ യാത്രാ വിമാനങ്ങൾക്ക് ഏകദേശം 1.5 മണിക്കൂർ യാത്രാ സമയം കൂടും. അധിക ചെലവ് ഏകദേശം 22.5 ലക്ഷം രൂപയായിരിക്കും. മിഡിൽ ഈസ്റ്റ് വിമാനങ്ങളുടെ കാര്യത്തിൽ, യാത്രാ സമയം ഏകദേശം 45 മിനിറ്റ് കൂടും. ഏകദേശം അഞ്ച് ലക്ഷം രൂപയുടെ അധിക ചെലവ് വരും എന്നും ഉദ്യോഗസ്ഥൻ പറഞ്ഞു.
ഇന്ത്യൻ വിമാനക്കമ്പനികൾ ഏപ്രിൽ മാസത്തിൽ വിവിധ അന്താരാഷ്ട്ര ലക്ഷ്യസ്ഥാനങ്ങളിലേക്ക് 6,000 ൽ അധികം നേരിട്ടുള്ള വിമാന സർവീസ് നടത്താൻ ഷെഡ്യൂൾ ചെയ്തിട്ടുണ്ട്. വടക്കേ ഇന്ത്യൻ നഗരങ്ങളിൽ നിന്ന് വടക്കേ അമേരിക്ക, യുകെ, യൂറോപ്പ്, മിഡിൽ ഈസ്റ്റ് തുടങ്ങിയ വിദേശ ലക്ഷ്യസ്ഥാനങ്ങളിലേക്ക് ഇന്ത്യൻ വിമാനക്കമ്പനികൾ പ്രതിവാരം 800 ലധികം വിമാനങ്ങൾ സർവീസ് നടത്തുന്നുണ്ട്. പ്രതിമാസം അങ്ങോട്ടും ഇങ്ങോട്ടും ഏകദേശം 3,100 വിമാനങ്ങളും പ്രതിവാരം ഏകദേശം 800 വിമാനങ്ങളും സര്‍വീസ് നടത്തുന്നുണ്ട്.
അങ്ങനെ മൊത്തം പ്രതിമാസ വിമാനങ്ങളിൽ, ഏകദേശം 1,900 വിമാനങ്ങൾ മിഡിൽ ഈസ്റ്റിലേക്ക് നാരോ-ബോഡി വിമാനങ്ങളും ചില വൈഡ്-ബോഡി വിമാനങ്ങളും ഉപയോഗിച്ചാണ് സർവീസ് നടത്തുന്നത്. അധിക 45 മിനിറ്റിന് ഒരു വിമാനത്തിന് അഞ്ച് ലക്ഷം രൂപയുടെ അധിക ചെലവ് കണക്കാക്കിയാൽ, മൊത്തം ചെലവ് ഏകദേശം 90 കോടി രൂപയായിരിക്കും.
യൂറോപ്പിനും വടക്കേ അമേരിക്കയ്ക്കുമായി, അങ്ങോട്ടും ഇങ്ങോട്ടുമുള്ള മൊത്തം വിമാന സര്‍വീസുകൾ ഏകദേശം 1,200 ആണ്. വടക്കേ അമേരിക്കൻ സർവീസുകൾക്ക് 1.5 മണിക്കൂർ അധിക യാത്രയ്ക്ക് ഏകദേശം 29 ലക്ഷം രൂപയും യൂറോപ്യൻ വിമാനങ്ങൾക്ക് 22 ലക്ഷം രൂപയും വരുന്ന അധിക യാത്രാ സമയം കണക്കാക്കുമ്പോൾ, മൊത്തം തുക പ്രതിമാസം ഏകദേശം 306 കോടി രൂപയായിരിക്കും. മൊത്തം പ്രതിമാസ അധിക ചെലവ് ഏകദേശം 307 കോടി രൂപയും പ്രതിവാരം 77 കോടി രൂപയുമായിരിക്കുമെന്നാണ് പ്രതീക്ഷിക്കുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
