പൂച്ചെട്ടിയിൽ തട്ടാതെ പോകാൻ പറഞ്ഞു, വഴിയോര കച്ചവടക്കാരനെ ആക്രമിച്ച് മന്ത്രിയുടെ അടുത്ത ബന്ധു

മീറ​റ്റ്: വഴിയോര കച്ചവടക്കാരനെ മർദ്ദിക്കുന്ന ഉത്തർപ്രദേശ് മന്ത്രിയുടെ ബന്ധുവിന്റെ വീഡിയോ പുറത്തുവന്നു. മന്ത്രി സോമേന്ദ്ര തോമറിന്റെ ബന്ധുവിന്റെ വീഡിയോയാണ് സോഷ്യൽ മീഡിയയിൽ വൈറലായത്. ഇടുങ്ങിയ റോഡിലൂടെ വാഹനമോടിച്ചതാണ് പ്രശ്നത്തിന് കാരണമായത്. കഴിഞ്ഞ ദിവസം ഉച്ചയോടെയായിരുന്നു സംഭവം. സോമേന്ദ്ര തോമറിന്റെ മരുമകനായ നിഖിൽ തോമറാണ് പ്രശ്നം ഉണ്ടാക്കിയതെന്നാണ് വിവരം.

നിഖിലും സുഹൃത്തും പ്രശ്നം ഉണ്ടായ റോഡിലൂടെ മഹീന്ദ്ര സ്കോർപിയോയിൽ വരികയായിരുന്നു. റോഡിന് ഇരുവശത്തും നിരവധി പൂക്കടകൾ ഉണ്ടായിരുന്നു. എതിർവശത്ത് നിന്ന് മറ്റൊരു ഓട്ടോറിക്ഷയും കൂടി വന്നതോടെ ഇരുവാഹനങ്ങൾക്കും കടന്നുപോകാൻ കഴിയാതെയായി. അതിനിടയിൽ വാഹനത്തിൽ നിന്ന് നിഖിൽ പുറത്തേക്കിറങ്ങി. പൂച്ചെട്ടിയിൽ തട്ടാതെ പോകണമെന്ന് കടയുടമ പറഞ്ഞതോടെയാണ് ആക്രമണം ഉണ്ടായത്.

നിഖിൽ കടയുടമയെ ക്രൂരമായി മർദ്ദിക്കുന്നത് കണ്ട വഴിയാത്രക്കാരാണ് ഇരുവരെയും പിടിച്ചുമാറ്റിയത്. സംഭവസ്ഥലത്ത് ആളുകൾ തടിച്ചുകൂടിയതോടെ നിഖിലും സുഹൃത്തും വാഹനത്തിൽ കയറി പോകുകയായിരുന്നു. പൊലീസ് ഇരുകൂട്ടരെയും സ്റ്റേഷനിൽ വിളിപ്പിച്ച് കേസെടുക്കാതെ ഒത്തുതീർപ്പാക്കിയെന്നാണ് വിവരം. നിഖിൽ ബിജെപി പ്രവർത്തകനാണെന്നാണ് സൂചന.

…