വീണ്ടും ഇംഗ്ലണ്ടിന്റെ ഷോർട്ട് ബോൾ ട്രാപ്പിൽ, വിക്കറ്റിനു പിന്നിൽ ക്യാച്ചും റണ്ണൗട്ട് അവസരവും പാഴാക്കി; പുണെയിൽ സഞ്ജുവിന് ‘ഓഫ് ഡേ’– വിഡിയോ

പുണെ∙ ഇംഗ്ലണ്ടിനെതിരായ നാലാം ട്വന്റി20 മത്സരത്തിൽ വിക്കറ്റിനു മുന്നിലും പിന്നിലും ഒരുപോലെ നിരാശപ്പെടുത്തി സഞ്ജു സാംസൺ. ആദ്യത്തെ മൂന്നു മത്സരങ്ങളിലും പരാജയപ്പെട്ടിട്ടും നാലാം മത്സരത്തിലും ഇന്ത്യയ്‌ക്കായി ഇന്നിങ്സ് ഓപ്പൺ ചെയ്യാൻ അവസരം ലഭിച്ച സഞ്ജു, ഇത്തവണയും ബാറ്റിങ്ങിൽ നിരാശപ്പെടുത്തി. പിന്നീട് വിക്കറ്റിനു പിന്നിൽ ഒരു ക്യാച്ചും റണ്ണൗട്ട് അവസരവും താരം പാഴാക്കി. ഒപ്പത്തിനൊപ്പമുള്ള പോരാട്ടത്തിനൊടുവിൽ ഇന്ത്യ മത്സരം ജയിച്ചത് സഞ്ജുവിനും ഭാഗ്യമായി. തോറ്റിരുന്നെങ്കിൽ ഒരുപക്ഷേ, ഏറ്റവും കൂടുതൽ ചർച്ചയാകുമായിരുന്നത് സഞ്ജുവിന്റെ നിരാശപ്പെടുത്തുന്ന പ്രകടനം തന്നെയാകണം!

ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഇന്ത്യയ്‍ക്കായി ഇന്നിങ്സ് ഓപ്പൺ ചെയ്ത സഞ്ജു, ഇത്തവണ സാഖിബ് മഹ്മൂദിന്റെ പന്തിലാണ് പുറത്തായത്. ആദ്യ മൂന്നു മത്സരങ്ങളിലും ജോഫ്ര ആർച്ചറിന്റെ ഷോർട്ട് ബോൾ ട്രാപ്പിൽ വീണ സഞ്ജു, ഇത്തവണ ആർച്ചറിനെ ചെറുത്തുനിന്നെങ്കിലും സാഖിബ് മഹ്മൂദിന്റെ ഷോർട്ട് ബോളിൽ പുറത്തായി. മൂന്നു പന്തിൽ നേടിയത് ഒറ്റ റൺ മാത്രം.

പിന്നീട് വിക്കറ്റിനു പിന്നിലും സഞ്ജുവിന്റെ നിരാശപ്പെടുത്തുന്ന പ്രകടനം തുടർന്നു. 16–ാം ഓവറിലെ ആദ്യ പന്തിലാണ് ഇംഗ്ലിഷ് യുവതാരം ജേക്കബ് ബെത്തലിനെ റണ്ണൗട്ടാക്കാനുള്ള സുവർണാവസരം സഞ്ജു പാഴാക്കിയത്. ഹർഷിത് റാണയുടെ ഓവറിൽ പന്ത് മിഡ്‌വിക്കറ്റിലേക്ക് തട്ടിയിട്ട് ബെത്തലും ഓവർട്ടനും റണ്ണിനായി ഓടി. ഒരു റൺ പൂർത്തിയാക്കി രണ്ടാം റണ്ണിനു ശ്രമിക്കുന്നതിനിടെ റിങ്കു സിങ് പന്ത് പിടിച്ചെടുത്ത് അതിവേഗം എറിഞ്ഞുനൽകി. കയ്യിലൊതുക്കിയിരുന്നെങ്കിൽ ബെത്തലിനെ അനായാസം റണ്ണൗട്ടാക്കാമായിരുന്നെങ്കിലും, സഞ്ജുവിന് പന്ത് കയ്യിലൊതുക്കാനായില്ല. എങ്കിലും അതേ ഓവറിലെ അഞ്ചാം പന്തിൽ റാണ ബെത്തലിനെ പുറത്താക്കിയത് സഞ്ജുവിനു ഭാഗ്യമായി.

മത്സരം നിർണായക ഘട്ടത്തിൽ നിൽക്കെയാണ് സഞ്ജു ജെയ്മി ഓവർട്ടന്റെ ക്യാച്ച് കൈവിട്ടത്. അവസാന 10 പന്തിൽ രണ്ടു വിക്കറ്റ് കയ്യിലിരിക്കെ വിജയത്തിലേക്ക് 21 റൺസ് എന്ന നിലയിലായിരുന്നു ഈ സമയത്ത് ഇംഗ്ലണ്ട്. 11 പന്തിൽ 17 റൺസുമായി ക്രീസിലുള്ള ജെയ്മി ഓവർട്ടനിലായിരുന്നു ഇംഗ്ലണ്ടിന്റെ പ്രതീക്ഷയത്രയും. 19–ാം ഓവറിലെ ആദ്യ പന്തിൽ ഫോറടിച്ചു തുടങ്ങിയ ഓവർട്ടനെ, മൂന്നാം പന്തിലാണ് സ‍ഞ്ജു കൈവിട്ടത്. ഓവർട്ടന്റെ പാളിയ ഷോട്ട് നേരേ ഉയർന്നു പൊങ്ങിയതിനു പിന്നാലെ ക്യാച്ചിനായി ഷോർട്ട് തേഡ് മാനിൽ ഫീൽഡ് ചെയ്തിരുന്ന വരുൺ ചക്രവർത്തി തയാറെടുത്തു.

pic.twitter.com/KEZRLnhVJM

— Drizzyat12Kennyat8 (@45kennyat7PM) January 31, 2025

ഇതിനിടെ, വിക്കറ്റിനു പിന്നിൽനിന്ന് പിന്നിലേക്ക് ഓടിയെത്തിയ സഞ്ജുവും ക്യാച്ചിനായി ശ്രമിച്ചു. കൂട്ടിയിടി ഒഴിവാക്കാൻ വരുൺ ചക്രവർത്തി ഒഴിഞ്ഞുമാറിക്കൊടുത്തെങ്കിലും, സഞ്ജുവിന് പന്ത് പിടിച്ചെടുക്കാനായില്ല. ഇംഗ്ലണ്ട് താരങ്ങൾ രണ്ടു റൺസ് കൂടി ഓടിയെടുത്തതോടെ അവരുടെ വിജയലക്ഷ്യം ഒൻപതു പന്തിൽ 19 റൺസായി കുറഞ്ഞു. ഇതേ ഓവറിലെ അവസാന പന്തിൽ ഓവർട്ടനെ ഹർഷിത് റാണ ക്ലീൻ ബൗൾഡാക്കിയത് ഇന്ത്യയ്‌ക്കും സഞ്ജുവിനും ഭാഗ്യമായി. കൈവിട്ട ക്യാച്ചിന് അധികം വില കൊടുക്കേണ്ടി വന്നില്ലെന്ന ആശ്വാസം സഞ്ജുവിനും ജയത്തിന് തൊട്ടരികയെന്ന സന്തോഷം ടീമിനും!

English Summary:
Sanju Samson’s Disappointing Performance in India’s Narrow T20 Win

TAGS

Indian Cricket Team

Board of Cricket Control in India (BCCI)

Gautam Gambhir

Sanju Samson

.news-buzz-outer {
margin-right: auto;
margin-left: auto;
max-width: 845px;
width: 100%;
}
.news-buzz-inner {
width: 100%;
position: relative;
}
#news-buzz-iframe {
width: 100%;
min-width: 100%;
width: 200px;
display: block;
border: 0;
height: 105px;
}

@media only screen and (max-width:510px) {
#news-buzz-iframe {
height: 180px;
}
}

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.

അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com

…