കൊച്ചി: എറണാകുളം ജില്ലയില്‍ 221 ഇടങ്ങളില്‍ കേരള ഐടി മിഷന്‍റെ സൗജന്യ വൈ-ഫൈ സേവനം ഉടനെത്തും. ഇന്‍റര്‍നെറ്റ് എല്ലാ പൗരന്‍മാരുടെയും അവകാശമാണ് എന്ന കേരളത്തിന്‍റെ പോളിസി അനുസരിച്ചാണ് കൊച്ചി നഗരത്തിലടക്കം ഫ്രീ വൈ-ഫൈ സ്പോട്ടുകള്‍ അവതരിപ്പിച്ചിരിക്കുന്നത്. കെ-ഫൈ എന്നാണ് ഈ സേവനത്തിന്‍റെ പേര്.
സെ-ഫൈ എന്ന സൗജന്യ വൈ-ഫൈ പദ്ധതി വ്യാപിപ്പിക്കുകയാണ് കേരള ഐടി മിഷന്‍. ഇതിന്‍റെ ഭാഗമായി വരും ആഴ്‌ചകളില്‍ എറണാകുളം ജില്ലയില്‍ 221 ഇടങ്ങളില്‍ സൗജന്യ വൈ-ഫൈ സ്പോട്ടുകള്‍ പൂര്‍ത്തിയാകും. കൊച്ചി നഗരത്തിലെ പ്രധാനപ്പെട്ട സ്ഥലങ്ങളിലെല്ലാം ഈ സേവനമുണ്ടാകും. മൊബൈല്‍ ഫോണുകളിലും ലാപ്‌ടോപ്പുകളിലും ദിവസവും 1 ജിബി വരെ ഡാറ്റ 10 എംബിപിഎസ് വേഗത്തില്‍ ഉപയോഗിക്കാന്‍ കഴിയുന്ന രീതിയിലാണ് ഐടി മിഷന്‍ സൗജന്യ വൈ-ഫൈ വിഭാവനം ചെയ്‌തിരിക്കുന്നത്. സര്‍ക്കാര്‍ നിശ്ചയിച്ച നിരക്ക് പ്രകാരം റീച്ചാര്‍ജ് ചെയ്‌ത് 1 ജിബി പരിധിക്ക് ശേഷവും വൈ-ഫൈ ആക്സസ് ചെയ്യാം. ഒരു ഹോട്ട്‌-സ്പോട്ടില്‍ നിന്ന് ഒരേസമയം 100 പേര്‍ക്ക് വൈ-ഫൈ ആക്സസ് ലഭിക്കും.
ബസ് സ്റ്റാന്‍ഡുകള്‍, ജില്ലാ ഭരണകൂട ഓഫീസുകള്‍, പഞ്ചായത്തുകള്‍, പാര്‍ക്കുകള്‍, സര്‍ക്കാര്‍ സ്ഥാപനങ്ങള്‍, ആശുപത്രികള്‍, കോടതി, പൊതുസേവന കേന്ദ്രങ്ങള്‍ തുടങ്ങിയ ഇടങ്ങളില്‍ നിലവില്‍ ഈ സൗജന്യ വൈ-ഫൈ സേവനം ലഭ്യമാണ്. പൊതുമേഖല ടെലികോം കമ്പനിയായ ബിഎസ്എന്‍എല്ലിന്‍റെ സഹായത്തോടെയാണ് പദ്ധതി നടപ്പാക്കുന്നത്.
‘കെ-ഫൈ’യില്‍ എങ്ങനെ ലോഗിന്‍ ചെയ്യാം?
ഫോണിലോ ലാപ്‌ടോപ്പിലോ വൈ-ഫൈ ഓപ്ഷന്‍ ഓണാക്കി K-FI സെലക്ട് ചെയ്യുകയാണ് ആദ്യം ചെയ്യേണ്ടത്. ഇതിന് ശേഷം തുറന്നുവരുന്ന ലാന്‍ഡിംഗ് പേജില്‍ 10 അക്ക മൊബൈല്‍ നമ്പര്‍ നല്‍കി ഒടിപി ജനറേറ്റ് ചെയ്യുക. ഒടിപി നല്‍കുന്നതോടെ സൗജന്യ വൈ-ഫൈ സേവനം ഫോണിലും ലാപ്‌ടോപ്പിലും ലഭ്യമാകും. എല്ലാ സര്‍ക്കാര്‍ വെബ്‌സൈറ്റുകളും ആപ്ലിക്കേഷനുകളും സൗജന്യമായി ഈ വൈ-ഫൈ വഴി ഉപയോഗിക്കാം എന്ന പ്രത്യേകതയുമുണ്ട്. ഇതിനൊപ്പം വിനോദസഞ്ചാര ഇടങ്ങള്‍, ടിക്കറ്റ്, ടിക്കറ്റ് ബുക്കിംഗ്, ഹോട്ടല്‍ ബുക്കിംഗ് എന്നിവയും സൗജന്യമാണ്.
Read more: ചിത്രം കണ്ട് ഞെട്ടണ്ടാ, അടുത്ത തലമുറ വിമാനങ്ങള്‍ ഇങ്ങനെയാവും! പഠിക്കാന്‍ 97 കോടി രൂപ നല്‍കി നാസ
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
