മെന്റലിസം വിഷയമാക്കി ഒരു സിനിമ എത്തുന്നു. ‘ഡോ. ബെന്നറ്റ്’ എന്നാണ് ചിത്രത്തിന് പേര്. പുതുമുഖങ്ങള്‍ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ടി.എസ്. സാബു സംവിധാനം ചെയ്യുന്നു. സിനിമയുടെ പൂജ പാലാരിവട്ടം റെനെ ഹോട്ടലില്‍ നടന്നു. ചടങ്ങില്‍ നിര്‍മ്മാതാവ് വിനോദ് വാസുദേവന്റെ അമ്മ രാധാമണി, കൊച്ചച്ചന്‍ മുരളി, സംവിധായകന്‍ ടി.എസ്. സാബുവിന്റെ പിതാവ് കോളിന്‍ തോമസ്, സഹോദരി ബെറ്റ്‌സി എന്നിവര്‍ ചേര്‍ന്ന് ഭദ്രദീപം തെളിയിച്ചു.
കേരള കോണ്‍ഗ്രസ് എസ്. ചെയര്‍മാന്‍ ബിനോയ് ജോസഫ് ഫസ്റ്റ് ക്ലാപ്പ് നിര്‍വഹിച്ചു. അതൊടൊപ്പം, അദ്ദേഹം മെന്റലിസത്തിലുള്ള വേള്‍ഡ് റെക്കോര്‍ഡ് മെന്റലിസ്റ്റ് ഷമീറിന് സമ്മാനിച്ചു. ഫ്‌ലവേഴ്‌സ് സ്റ്റാര്‍ മാജിക് ഡയറക്ടര്‍ അനൂപ് ജോണ്‍ മെന്റലിസ്റ്റ് ഷമീറിനെ മെഡല്‍ അണിയിച്ച് ആദരിച്ചു.
വി.ആര്‍. മൂവി ഹൗസ് പ്രൊഡക്ഷന്‍ ബാനറിന്റെ ഒഫീഷ്യല്‍ ലോഞ്ച് നടന്‍ ധര്‍മ്മജന്‍ ബോള്‍ഗാട്ടി നിര്‍വഹിച്ചു. സിനിമയുടെ ടൈറ്റില്‍ നടന്‍ ബിബിന്‍ ജോര്‍ജ്ജ് പുറത്തിറക്കി. നവാഗതനായ ജിന്‍സ് ജോയ് നായകനായെത്തുന്ന സിനിമയില്‍ കന്നഡ നടിയും തമിഴ് ബിഗ് ബോസ് താരവുമായ ആയിഷയാണ് നായികയായെത്തുന്നത്. ഐ.പി.എസ്. കഥാപാത്രമായാണ് ആയിഷ എത്തുന്നത്. സൈക്കോ ത്രില്ലര്‍ സിനിമയായാണ് ചിത്രം ഒരുങ്ങുന്നത്. സയന്‍സും ഹിപ്‌നോട്ടിസവും മെന്റലിസവുമൊക്കെ ചേര്‍ന്ന സിനിമയില്‍ ഒട്ടേറെ യൂട്യൂബ് ഇന്‍ഫ്‌ലുവന്‍സേഴ്‌സും അഭിനയിക്കുന്നുണ്ട്. 160-ഓളം സപ്പോര്‍ട്ടിങ് ആക്ടേഴ്‌സും ചിത്രത്തിലുണ്ട്.
ജനുവരി പത്തിന് കാസര്‍കോഡും പരിസരപ്രദേശങ്ങളിലുമാണ് സിനിമയുടെ ചിത്രീകരണം ആരംഭിക്കുന്നത്. വി.ആര്‍. മൂവി ഹൗസിന്റെ ബാനറില്‍ ടി.എസ്. സാബു സംവിധാനം ചെയ്യുന്ന ചിത്രം നിര്‍മ്മിക്കുന്നത് വിനോദ് വാസുദേവനാണ്. ദീര്‍ഘകാലം സിനിമാ മേഖലയില്‍ അസോസിയേറ്റ് ഡയറക്ടറായിരുന്ന ശേഷമാണ് ടി.എസ്. സാബു സംവിധാനത്തിലേക്ക് കടക്കുന്നത്. വിനോദ് വാസുദേവന്‍ ഏറെ നാള്‍ പ്രൊഡക്ഷന്‍ കണ്‍ട്രോളറായിരുന്നു. ശ്രദ്ധേയനായ മെന്റലിസ്റ്റ് ഷമീര്‍ ആണ് സിനിമയുടെ കഥയൊരുക്കുന്നത്. ഛായാഗ്രഹണം ജനീഷ് ജയാനന്ദന്‍, ആര്‍ട്ട് വേലു വാഴയൂര്‍, മേക്കപ്പ് മനോജ് അങ്കമാലി, കോസ്റ്റ്യൂം സതീഷ്, പ്രൊഡക്ഷന്‍ കണ്‍ട്രോളര്‍ പ്രകാശ് തിരുവല്ല, പി.ആര്‍.ഒ. ആതിര ദില്‍ജിത്ത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
