സിക്സടിച്ച പന്ത് മുഖത്തുവീണ് കരഞ്ഞ യുവതിയെ നേരിട്ടെത്തി ആശ്വസിപ്പിച്ചു; കളത്തിനു പുറത്തും സ‍ഞ്ജുവിന് കയ്യടി– വിഡിയോ

ജൊഹാനസ്ബർഗ് ∙ ദക്ഷിണാഫ്രിക്കയ്‍ക്കെതിരായ നാലാം ട്വന്റി20 മത്സരത്തിനിടെ തന്റെ സിക്സർ മുഖത്തുപതിച്ച് പരുക്കേറ്റ ആരാധികയെ നേരിൽക്കണ്ട് ആശ്വസിപ്പിച്ച് മലയാളി താരം സഞ്ജു സാംസൺ. സഞ്ജുവിന്റെ സിക്സർ മുഖത്തുപതിച്ച് പരുക്കേറ്റതിനെ തുടർന്ന് ഐസ്പായ്ക്കും മുഖത്തുവച്ച് കണ്ണീരണിഞ്ഞ് നിൽക്കുന്ന ആരാധികയുടെ ദൃശ്യങ്ങൾ സമൂഹമാധ്യമങ്ങളിൽ വൈറലായിരുന്നു. ഇതിനു പിന്നാലെയാണ്, സഞ്ജു ഈ ആരാധികയെ നേരിൽക്കണ്ട് സംസാരിക്കുന്ന വിഡിയോ സമൂഹമാധ്യമങ്ങളിൽ പ്രചരിക്കുന്നത്.

മത്സരം അവസാനിച്ചതിനു പിന്നാലെതന്നെ സഞ്ജു ആരാധികയെ കാണാനെത്തിയെങ്കിലും, അതിന്റെ വിഡിയോ ഇപ്പോഴാണ് സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. സെഞ്ചറി നേട്ടത്തിന്റെ തിളക്കത്തിൽ ഗാലറിയിൽ യുവതിയെ കാണാനെത്തിയ സഞ്ജുവിനെ, ആരാധകർ പൊതിയുന്നത് ദൃശ്യങ്ങളിൽ കാണാം. ഒട്ടേറെ ആരാധകർ സഞ്ജുവിനൊപ്പം സെൽഫിയെടുക്കുന്നുമുണ്ട്. ഇതിനിടെയാണ്, തന്റെ സിക്സർ പതിച്ച് പരുക്കേറ്റ യുവതിയുമായി സഞ്ജു സംസാരിക്കുന്നത്.

പരുക്കേറ്റ ആരാധികയെ മത്സരത്തിനു പിന്നാലെ തന്നെ നേരിട്ടെത്തി ആശ്വസിപ്പിച്ച സഞ്ജുവിന്റെ പ്രവൃത്തിയെ പുകഴ്ത്തി ഒട്ടേറെ ആരാധകരാണ് ദൃശ്യങ്ങൾ പങ്കുവച്ചത്. മത്സരത്തിൽ സെഞ്ചറി നേടിയ സഞ്ജു, രാജ്യാന്തര ട്വന്റി20യിൽ‌ ഒരു കലണ്ടർ വർഷം മൂന്ന് സെഞ്ചറി നേടുന്ന ആദ്യ താരമെന്ന റെക്കോർഡ് ഉൾപ്പെടെ സ്വന്തമാക്കിയിരുന്നു. തിലക് വർമയ്‌ക്കൊപ്പം പിരിയാത്ത രണ്ടാം വിക്കറ്റിൽ ഇരട്ടസെഞ്ചറി കൂട്ടുകെട്ടു തീർത്തും സഞ്ജു റെക്കോർഡ് ബുക്കിൽ ഇടംപിടിച്ചു. മത്സരത്തിൽ കൂറ്റൻ വിജയം നേടിയ ഇന്ത്യ, 3–1ന് പരമ്പരയും സ്വന്തമാക്കിയിരുന്നു.

Sanju met the girl whose face was hurt by his shot.❤️‍🩹#SanjuSamson #INDvSA #T20I #UFC308 pic.twitter.com/fAuU7lLhAd

— 🏏CricketFeed (@CricketFeedIN) November 17, 2024

∙ മത്സരത്തിൽ സംഭവിച്ചത്…

പരമ്പരയിൽ തുടർച്ചയായ രണ്ടു ഡക്കുകൾക്കു ശേഷം ഫോമിലേക്കു തിരിച്ചെത്തിയ സഞ്ജു, അർധസെഞ്ചറി പിന്നിട്ട് മുന്നേറുന്നതിനിടെയാണ് സംഭവം. ട്രിസ്റ്റൻ സ്റ്റബ്സ് എറിഞ്ഞ 10–ാം ഓവറിലെ രണ്ടാം പന്തിലാണ്, സഞ്ജുവിന്റെ സിക്സർ യുവതിയുടെ ദേഹത്തു പതിച്ചത്. സ്റ്റബ്സിന്റെ ഓവർ ‍ആരംഭിക്കുമ്പോൾ 27 പന്തിൽ 46 റൺസുമായി സഞ‌്ജുവായിരുന്നു ക്രീസിൽ. ആദ്യ പന്തിൽ ലോങ് ഓണിനു മുകളിലൂടെ തകർപ്പൻ സിക്സറിനു പറത്തി സഞ്ജു രാജകീയമായി അർധസെഞ്ചറി പൂർത്തിയാക്കി. ആദ്യ മത്സരത്തിലെ സെഞ്ചറിയുടെ തിളക്കം കുറച്ച രണ്ട് തുടർ ഡക്കുകൾക്കു ശേഷം മലയാളി താരത്തിന് വീണ്ടുമൊരു അർധസെഞ്ചറി.

അർധസെഞ്ചറി നേട്ടം ആഘോഷിക്കാൻ അടുത്ത പന്തിൽ സ‍ഞ്ജുവിന്റെ വക വീണ്ടും സിക്സർ. ഇത്തവണ ഡീപ് മിഡ്‌വിക്കറ്റിനു മുകളിലൂടെ പന്ത് ഗാലറിയിലേക്ക്. ഇതിനിടെ ഗാലറിയിലെ ആൾക്കൂട്ടത്തിലേക്ക് വീണ പന്ത് സുരക്ഷാ ജീവനക്കാരന്റെ ദേഹത്തു തട്ടി യുവതിയുടെ മുഖത്തു പതിച്ചു.പന്തു മുഖത്തു പതിച്ചതിന്റെ വേദനയിൽ കണ്ണീരോടെ നിന്ന യുവതിക്ക് സമീപത്തുനിന്നും ആരോ ഐസ് പായ്ക്ക് എത്തിച്ചുകൊടുത്തു.

Wishing a quick recovery for the injured fan! 🤕🤞

Keep watching the 4th #SAvIND T20I LIVE on #JioCinema, #Sports18 & #ColorsCineplex 👈#JioCinemaSports pic.twitter.com/KMtBnOa1Hj

— JioCinema (@JioCinema) November 15, 2024

ഈ ഐസ് പായ്ക്കും മുഖത്തുചേർത്തുവച്ച് യുവതി കണ്ണീരോടെ നിൽക്കുന്ന ദൃശ്യം മത്സരം സംപ്രേക്ഷണം ചെയ്ത ചാനലും കാണിക്കുന്നുണ്ടായിരുന്നു. ഈ ദൃശ്യങ്ങൾ സമൂഹമാധ്യമങ്ങളിൽ ഉടൻ വൈറലാവുകയും ചെയ്തു. യുവതിയുടെ ദേഹത്തു പന്തു തട്ടിയെന്ന് തിരിച്ചറിഞ്ഞ സഞ്ജു, ക്ഷമാപണ രൂപത്തിൽ കയ്യുയർത്തുന്നതും ദൃശ്യങ്ങളിലുണ്ട്.

English Summary:
Heart of Gold: Sanju Samson Consoles Fan Injured by His Six in South Africa T20I

…