ഇത് കലക്കും, ജോജുവിനൊപ്പം ഹിറ്റ് സം​ഗീത സംവിധായകർ; 'പണി'യിൽ വിഷ്ണു വിജയും സാം സി എസും 

മലയാളത്തിലും തമിഴിലുമായി നിരവധി ഗാനങ്ങൾക്ക് സംഗീതം നൽകിയ, അവയെല്ലാം തന്നെ ഹിറ്റടിക്കുകയും ചെയ്ത ഇരുവരുടെയും ഗാനങ്ങൾക്ക് ആരാധകർ കാത്തിരിക്കാറുണ്ട്. ജോജുവിന്റെ പണിയിൽ ഇരുവരും ഒന്നിക്കുന്നുവെന്ന വാർത്ത തന്നെ സിനിമയ്ക്ക് നൽകുന്ന ഹൈപ്പ് വലുതാണ്. ഓഗസ്റ്റ് ആദ്യ വാരം ചിത്രം റിലീസിനെത്തുമെന്നാണ് സൂചനകൾ.

അതേസമയം റിലീസിന് മുന്നോടിയായി കഴിഞ്ഞ ദിവസം പുറത്തിറങ്ങിയ ‘പണിയിലെ’ നായകൻ ജോജുവിന്റെയും നായിക അഭിനയയുടെയും ചിത്രങ്ങൾ സമൂഹ മാധ്യമങ്ങളിൽ വൈറലായിരുന്നു. ‘ഗിരി ആൻഡ് ഗൗരി ഫ്രം പണി’ എന്ന ക്യാപ്ഷനിൽ എത്തിയ ചിത്രങ്ങൾ സോഷ്യൽ മീഡിയ ഏറ്റെടുത്തിരുന്നു. ജോജുവിന്റെ നായികയായി എത്തുന്ന അഭിനയ സംസാരശേഷിയും കേൾവി ശക്തിയും ഇല്ലാത്ത പെൺകുട്ടിയാണ്. തമിഴ്, തെലുങ്ക് ഭാഷകളിലും അഭിനയ വേഷമിട്ടിട്ടുണ്ട്. അറുപതോളം ജൂനിയർ താരങ്ങൾ അണിനിരക്കുന്ന ചിത്രം 100 ദിവസങ്ങൾ കൊണ്ടാണ് ചിത്രീകരിച്ചത്. വൻ ബജറ്റിലാണ് ‘പണി’ ഒരുങ്ങുന്നത്.

സാഗർ, ജുനൈസ്, ഗായിക അഭയ ഹിരൺമയി, പ്രശാന്ത് അലക്സ്, സുജിത് ശങ്കർ തുടങ്ങി വൻ താരനിര അണിനിരക്കുന്ന ചിത്രത്തിൽ അറുപതോളം പുതിയ താരങ്ങളാണ് അഭിനയിക്കുന്നത്. നേരത്തെ പുറത്തിറങ്ങിയ ചിത്രത്തിന്റെ ഫസ്റ്റ് ലുക്ക് പോസ്റ്റർ സമൂഹമാധ്യമങ്ങളിൽ വൈറൽ ആയിരുന്നു. ഇന്ത്യൻ സിനിമയിലെ പ്രമുഖ താരങ്ങളും സംവിധായകരും ഫസ്റ്റ് ലുക്ക് പോസ്റ്റർ പങ്ക് വെച്ചിരുന്നു. ഒരു മാസ്സ്, ത്രില്ലർ, റിവഞ്ച് ജോണറിൽ എത്തുന്ന ചിത്രം ജോജുവിന്റെ തന്നെ പ്രൊഡക്ഷൻ കമ്പനി ആയ അപ്പു പാത്തു പപ്പു പ്രൊഡക്ഷന്സിന്റെയും, എ ഡി സ്റ്റുഡിയോസിന്റെയും, ശ്രീ ഗോകുലം മൂവീസിന്റെയും ബാനറിൽ എം റിയാസ് ആദം, സിജോ വടക്കൻ എന്നിവർ ചേർന്നാണ് നിർമ്മിച്ചിരിക്കുന്നത്. വിഷ്ണു വിജയ്, സാം സി എസ് എന്നിവരാണ് സംഗീതം. ക്യാമറ വേണു ISC, ജിന്റോ ജോർജ്. ശ്രീ ഗോകുലം മൂവിസിലൂടെ ഡ്രീം ബിഗ് ഫിലിംസ് ആണ് ചിത്രം വിതരണത്തിന് എത്തിക്കുന്നത്.