'ഇത് ശരിക്കുമൊരു ബഹുമതിയാണ്'; പ്രധാനമന്ത്രിയെ നേരിട്ടുകണ്ട് വിവാഹം ക്ഷണിച്ച് വരലക്ഷ്മി

നടൻ ശരത്‌കുമാറിൻ്റെ ആദ്യ ഭാ​ര്യ ഛായയിലെ മകളാണ് വരലക്ഷ്മി. ഈ ദമ്പതിമാര്‍ക്ക് വരലക്ഷ്മിക്ക് പുറമേ പൂജ എന്ന മകൾ കൂടിയുണ്ട്. പ്രധാനമന്ത്രി നരേന്ദ്ര മോദിയെ നേരിട്ടുകാണുകയും വിവാഹം ക്ഷണിക്കാൻ സാധിച്ചതും വലിയ ബഹുമതിയായി കാണുന്നുവെന്ന് വരലക്ഷ്മി പറഞ്ഞു.

“ഞങ്ങളെ വളരെ ഊഷ്മളമായി സ്വാ​ഗതംചെയ്തതിന് നന്ദി. തിരക്കുകൾക്കിടയിലും വിലയേറിയ സമയം ഞങ്ങൾക്കായി ചെലവഴിച്ചതിന് നന്ദി. ഇതൊരു ബഹുമതി തന്നെയാണ്. ഈ കൂടിക്കാഴ്ച സാധ്യമാക്കിയതിന് അച്ഛൻ ശരത്കുമാറിനോട് നന്ദി പറയുന്നു.” വരലക്ഷ്മി കൂട്ടിച്ചേർത്തു.

വരലക്ഷ്മിയും കുടുംബവും ചലച്ചിത്രമേഖലയ്ക്ക് അകത്തും പുറത്തുമുള്ള പ്രമുഖരെ നേരിട്ടാണ് വിവാഹം ക്ഷണിക്കുന്നത്. നേരത്തേ കേന്ദ്ര മന്ത്രി നിർമലാ സീതാരാമൻ, രജനികാന്ത്, ഐശ്വര്യ രജനികാന്ത്, അല്ലു അർജുൻ തുടങ്ങിയവർ അക്കൂട്ടത്തിൽപ്പെടുന്നു.

ഈ വർഷം മാർച്ചിലാണ് വരലക്ഷ്മിയുടെ വിവാഹനിശ്ചയം നടന്നത്. മുംബൈ സ്വദേശിയായ ആർട്ട് ​ഗാലറിസ്റ്റാണ് പ്രതിശ്രുത വരനായ നിക്കോളായ് സച്ച്ദേവ്. ധനുഷ് സംവിധാനംചെയ്ത് നായകനായി അഭിനയിക്കുന്ന രായൻ ആണ് വരലക്ഷ്മിയുടേതായി റിലീസിന് തയ്യാറെടുത്തിരിക്കുന്ന ചിത്രം. മലയാളചിത്രം കളേഴ്സ്, തെലുങ്ക് ചിത്രം ശബരി എന്നിവയും നടിയുടേതായി വരാനിരിക്കുന്നു.