ഒരാഴ്ച മുൻപ് കാണാതായ 19കാരിയുടെ മൃതദേഹം യമുനയിൽ; ‘പരാജയപ്പെട്ടെന്ന്’ കുറിപ്പ്

ന്യൂഡൽഹി∙ ഒരാഴ്ചയോളമായി കാണാതായ വിദ്യാർഥിനിയുടെ മൃതദേഹം യമുനാ നദിയിൽനിന്ന് കണ്ടെത്തി. ഡൽഹിയിലെ ആത്മറാം സനാതൻ ധർമ കോളജിലെ വിദ്യാർഥിയായ സ്നേഹ ദേബ്നാഥിന്റെ (19) മൃതദേഹമാണ് ഗീതാ കോളനി ഫ്ലൈ ഓവറിനു താഴെനിന്ന് കണ്ടെത്തിയതെന്ന് ഡൽഹി പൊലീസ് അറിയിച്ചു.

നേരത്തെ സ്നേഹ എഴുതിയതെന്നു കരുതുന്ന കണ്ടെത്തിയതായി കുടുംബം അറിയിച്ചിരുന്നു. ജൂലൈ 7 മുതലാണ് സ്നേഹയെ കാണാതായത്.
ഡൽഹിയിലെ സിഗ്നേച്ചർ പാലത്തിൽനിന്ന് ചാടി ജീവിതം അവസാനിപ്പിക്കാൻ പോകുകയാണെന്ന് കത്തിലുണ്ടെന്ന് കുടുംബം പറഞ്ഞു.

‘ഞാനൊരു പരാജയമാണെന്നും ഭാരമാണെന്നും തോന്നുന്നു. ഇങ്ങനെ ജീവിക്കുന്നത് അസഹനീയമാണ്’–സ്നേഹയുടെ കത്തിൽ പറയുന്നു.

തന്റെ മരണത്തിൽ ആരും ഉത്തരവാദികളല്ലെന്നും സ്വന്തം തീരുമാനമാണ് ഇതെന്നും കത്തിലുണ്ട്.
ത്രിപുര സ്വദേശിയായ സ്നേഹ ഉന്നതപഠനത്തിനായാണ് ഡൽഹിയിലെത്തിയത്. ജൂലൈ 7ന് സുഹൃത്തിനെ സരായി റോഹില്ല റെയിൽവേ സ്റ്റേഷനിൽ ഇറക്കാൻ പോകുന്നുവെന്നു രാവിലെ 5.56ന് മാതാവിനോട് പറഞ്ഞിരുന്നു.

എന്നാൽ അതിനുശേഷം സ്നേഹയെക്കുറിച്ച് വിവരമൊന്നുമില്ല. എട്ടേമുക്കാലോടെ മാതാവ് വിളിച്ചപ്പോൾ ഫോൺ സ്വിച്ച് ഓഫായിരുന്നു.

പിന്നീട് അന്വേഷിച്ചപ്പോൾ സ്നേഹ സുഹൃത്തിനെ കണ്ടിട്ടില്ലെന്നറിഞ്ഞു. സ്നേഹ വിളിച്ചതു പ്രകാരമെത്തിയ കാർ ഡ്രൈവറാണ് പെൺകുട്ടി പോയത് റെയിൽവേ സ്റ്റേഷനിലേക്കല്ലെന്നും സിഗ്നേച്ചർ പാലത്തിനു സമീപത്തേക്കാണെന്നും കുടുംബത്തെ അറിയിക്കുന്നത്.
തുടർന്ന് ജൂലൈ 9ന് ക്രൈംബ്രാഞ്ചിന്റെ നിർദേശപ്രകാരം ദേശീയ ദുരന്തപ്രതികരണ സേന 7 കിലോമീറ്റർ ചുറ്റളവിൽ തിരച്ചിൽ നടത്തിയെങ്കിലും സ്നേഹയെ കണ്ടെത്താനായിരുന്നില്ല.

പെൺകുട്ടി ബാങ്ക് അക്കൗണ്ടിൽനിന്ന് പണമൊന്നും പിൻവലിച്ചിട്ടില്ലെന്നും ഫോൺ ഒഴികെയുള്ള ഒരു വസ്തുക്കളും എടുത്തിട്ടില്ലെന്നും അന്വേഷണത്തിൽ കണ്ടെത്തിയിരുന്നു. 
അതേസമയം, പൊലീസ് അന്വേഷണം നല്ലരീതിയിലായിരുന്നില്ലെന്ന് കുടുംബം ആരോപിച്ചു. പരാതിയിൽ 48 മണിക്കൂറിനുശേഷമാണ് എഫ്ഐആർ റജിസ്റ്റർ ചെയ്തതെന്നും സിഗ്നേച്ചർ പാലത്തിനു സമീപമുള്ള സിസിടിവി ക്യാമറകൾ പ്രവർത്തിച്ചിരുന്നില്ലെന്നും കുടുംബം പറഞ്ഞു.

കുടുംബം ത്രിപുര മുഖ്യമന്ത്രി മണിക് സാഹയുടെ ഓഫിസുമായി ബന്ധപ്പെട്ട് സഹായം തേടിയതോടെയാണ് തിരച്ചിലിൽ പങ്കാളിയാകാൻ ത്രിപുര പൊലീസിനോട് മുഖ്യമന്ത്രി നിർദേശിച്ചത്. റിട്ട.

ഓണററി ലഫ്റ്റനന്റ് സുബേദാർ പ്രിതിഷ് ദേബ്നാഥാണ് സ്നേഹയുടെ പിതാവ്.
(Disclaimer : വാർത്തയു‍ടെ കൂടെയുള്ള ചിത്രം ചിത്രം @awkdipti എന്ന എക്സ് അക്കൗണ്ടിൽ നിന്ന് എടുത്തതാണ്.)

…