ലാഹ്‌ലി (ഹരിയാന) ∙ രഞ്ജി ട്രോഫിയിൽ ഗ്രൂപ്പിലെ ഒന്നാം സ്ഥാനക്കാരും രണ്ടാം സ്ഥാനക്കാരും നേർക്കുനേരെത്തിയ മത്സരത്തിൽ, ഒന്നാം സ്ഥാനക്കാരായ ഹരിയാന‌യ്‌ക്കെതിരെ കേരളത്തിന് നിർണായകമായ ഒന്നാം ഇന്നിങ്സ് ലീഡ്. മത്സരത്തിൽ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ കേരളം 116.1 ഓവറിൽ 291 റൺസിന് പുറത്തായപ്പോൾ, ഹരിയാനയുടെ മറുപടി 74.2 ഓവറിൽ 164 റൺസിൽ അവസാനിച്ചു. ഇതോടെ കേരളത്തിന് ലഭിച്ചത് 127 റൺസിന്റെ ഒന്നാം ഇന്നിങ്സ് ലീഡ്.
മറുപടി ബാറ്റിങ് ആരംഭിച്ച കേരളം രണ്ടാം ഇന്നിങ്സിൽ നാല് ഓവറിൽ വിക്കറ്റ് നഷ്ടം കൂടാതെ 14 റണ്‍സ് എന്ന നിലയിലാണ്. രോഹൻ എസ്.കുന്നുമ്മൽ (7), ക്യാപ്റ്റൻ സച്ചിൻ ബേബി (7) എന്നിവർ ക്രീസിൽ. കേരളത്തിന് ആകെ 141 റൺസ് ലീഡായി.
നേരത്തെ, മൂന്നു വിക്കറ്റ് വീതം പിഴുത ബേസിൽ തമ്പി, എം.ഡി. നിധീഷ് എന്നിവർ ചേർന്നാണ് ഹരിയാനയെ 164 റൺസിൽ ഒതുക്കിയത്. ബേസിൽ തമ്പി 22 ഓവറിൽ 66 റൺസ് വഴങ്ങിയും, നിധീഷ് 19 ഓവറിൽ 41 റൺസ് വഴങ്ങിയും മൂന്നു വിക്കറ്റ് വീതം വീഴ്ത്തി. എൻ.പി. ബേസിൽ 12.2 ഓവറിൽ 28 റൺസ് വഴങ്ങി രണ്ടു വിക്കറ്റെടുത്തു. ജലജ് സക്സേന 11 ഓവറിൽ 21 റൺസ് വഴങ്ങി ഒരു വിക്കറ്റും സ്വന്തമാക്കി.
93 പന്തിൽ മൂന്നു ഫോറുകൾ സഹിതം 29 റൺസെടുത്ത നിഷാന്ത് സിന്ധുവാണ് ഹരിയാനയുടെ ടോപ് സ്കോറർ. 90 പന്തിൽ 29 റൺസുമായി ഇന്ന് ബാറ്റിങ് പുനരാരംഭിച്ച നിഷാന്ത്, മൂന്നു പന്തുകൾക്കുള്ളിൽ പുറത്തായി. ബേസിൽ തമ്പിക്കായിരുന്നു വിക്കറ്റ്. ജയന്ത് യാദവ് (47 പന്തിൽ 12), അൻഷുൽ കംബോജ് (31 പന്തിൽ 10) എന്നിവരും പുറത്തായതോടെ ഹരിയാന ഇന്നിങ്സിന് തിരശീല വീണു. ഓപ്പണർ ലക്ഷ്യ ദലാൽ (48 പന്തിൽ 21), യുവരാജ് സിങ് (37 പന്തിൽ 20), ക്യാപ്റ്റൻ അങ്കിത് കുമാർ (51 പന്തിൽ 27), ഹിമാൻഷു റാണ (24 പന്തിൽ 17) എന്നിവരും ഭേദപ്പെട്ട പ്രകടനം കാഴ്ചവച്ചു.
∙ പത്തിൽ പത്ത്, കംബോജ്!
നേരത്തേ, ഇന്നിങ്സിലെ 10 വിക്കറ്റും സ്വന്തമാക്കിയ അൻഷുൽ കംബോജ് എന്ന പേസ് ബോളറാണ് കേരളത്തെ 291 റൺസിൽ ഒതുക്കിയത്. 39 വർഷത്തിനിടെ ആദ്യമായാണ് രഞ്ജി ട്രോഫിയിൽ ഇന്നിങ്സിലെ പത്തു വിക്കറ്റുകളും ഒരു താരം സ്വന്തമാക്കുന്നത്. വെള്ളിയാഴ്ച കേരള താരം ഷോൺ റോജറിനെ പുറത്താക്കിയാണ് അന്‍ഷൂൽ കാംബോജ് ചരിത്ര നേട്ടത്തിലെത്തിയത്. 30.1 ഓവറുകൾ പന്തെറിഞ്ഞ അൻഷൂൽ 49 റൺസ് വഴങ്ങി. മൂന്നാം ദിവസം എട്ട് വിക്കറ്റ് നഷ്ടത്തില്‍ 285 റണ്‍സെന്ന നിലയില്‍ ബാറ്റിങ് തുടങ്ങിയ കേരളം ലഞ്ചിനു പിരിയുംമുൻപേ ഓള്‍ഔട്ടാകുകയായിരുന്നു.
23 വയസ്സുകാരനായ ഹരിയാന താരം കരിയറിലെ 19–ാം മത്സരം മാത്രമാണു കേരളത്തിനെതിരെ കളിക്കുന്നത്. ഇന്ത്യ എ, ഇന്ത്യ അണ്ടർ 19 ടീമുകൾക്കു വേണ്ടി കളിച്ചിട്ടുള്ള അൻഷൂൽ ഐപിഎല്ലിൽ മുംബൈ ഇന്ത്യൻസിന്റെ താരമായിരുന്നു. ആദ്യ ഇന്നിങ്സിൽ കേരളത്തിനായി അക്ഷയ് ചന്ദ്രൻ (178 പന്തിൽ 59), രോഹൻ എസ്. കുന്നുമ്മൽ (102 പന്തിൽ 55), സച്ചിൻ ബേബി (146 പന്തിൽ 52), മുഹമ്മദ് അസറുദ്ദീന്‍ (74 പന്തില്‍ 53) എന്നിവർ അർധ സെഞ്ചറി നേടിയിരുന്നു. 107 പന്തുകൾ നേരിട്ട ഷോൺ റോജർ 42 റൺസും സ്വന്തമാക്കി.
English Summary:
Haryana vs Kerala, Ranji Trophy 2024-25 Elite Group C Match, Day 4 – Live Cricket Score
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
