ദക്ഷിണ കൊറിയയിൽ ആക്‌ടിംഗ് പ്രസിഡന്റിനെയും ഇംപീച്ച് ചെയ്‌തു

സോൾ: ദക്ഷിണ കൊറിയയിൽ രാഷ്ട്രീയ പ്രതിസന്ധി രൂക്ഷമാകുന്നു. ആക്ടിംഗ് പ്രസിഡന്റും പ്രധാനമന്ത്രിയുമായ ഹാൻ ഡക്ക്-സൂവിനെ പാർലമെന്റ് ഇന്നലെ ഇംപീച്ച് ചെയ്‌തു. ധനമന്ത്രി ചായ് സാങ്ങ്-മോക് പുതിയ ആക്ടിംഗ് പ്രസിഡന്റിന്റെ ചുമതല ഏറ്റെടുത്തു. പട്ടാള നിയമം പ്രഖ്യാപിച്ച് വിവാദം സൃഷ്ടിച്ച പ്രസിഡന്റ് യൂൻ സുക് യോൾ രണ്ടാഴ്ച മുമ്പാണ് ഇംപീച്ച്മെന്റിലൂടെ സസ്‌പെൻഡ് ചെയ്യപ്പെട്ടത്. സസ്പെൻഷനിലായ യൂനിന്റെയും ഡക്ക്-സൂവിന്റെയും ഭാവി ഭരണഘടനാ കോടതി തീരുമാനിക്കും. ഇരുവരെയും വിചാരണ ചെയ്യുന്ന കോടതി കുറ്റക്കാരെന്ന് കണ്ടെത്തിയാൽ അധികാരത്തിൽ നിന്ന് പുറത്താക്കും. മറിച്ചായാൽ ഇരുവരും പദവിയിൽ തിരിച്ചെത്തും.

 വീണ്ടും ഭീതി

300 അംഗ പാർലമെന്റിൽ പ്രധാന പ്രതിപക്ഷമായ ഡെമോക്രാറ്റിക് പാർട്ടിക്കാണ് ഭൂരിപക്ഷം (170 സീറ്റ്). മറ്റ് അഞ്ച് പാർട്ടികളും ചേരുമ്പോൾ പ്രതിപക്ഷത്ത് 192 എം.പിമാരുണ്ട്. ഇവരെല്ലാം ഡക്ക്-സൂവിനെ ഇംപീച്ച് ചെയ്യാൻ വോട്ട് ചെയ്തു. 108 സീറ്റുള്ള ഭരണകക്ഷിയായ പീപ്പിൾ പവർ പാർട്ടി വോട്ട് ബഹിഷ്കരിച്ചു.

പ്രതിപക്ഷ എം.പിമാരെ എതിർത്താൽ പുതിയ ആക്ടിംഗ് പ്രസിഡന്റ് ചായ് സാങ്ങ്-മോകിനും ഇംപീച്ച്മെന്റ് നേരിടേണ്ടി വന്നേക്കും. ഇതിനിടെ, ദക്ഷിണ കൊറിയൻ കറൻസിയായ വോണിന്റെ മൂല്യം ഇടിഞ്ഞ് 15 വർഷത്തിനിടെയിലെ ഏറ്റവും താഴ്ന്ന നിലയിലെത്തി.

 ആവശ്യം നിരസിച്ചു, പിന്നാലെ ഇംപീച്ച്മെന്റ്

 ഭരണഘടനാ കോടതിയിൽ 9 ജസ്റ്റിസുമാരാണുള്ളത്. ഇതിൽ ഒഴിവുള്ള 3 സീറ്റ് ഉടൻ നികത്തണമെന്ന പ്രതിപക്ഷത്തിന്റെ ആവശ്യം നിരസിച്ചതാണ് ഡക്ക്-സൂവിന്റെ ഇംപീച്ച്മെന്റിന് കാരണം
 ഇംപീച്ച്മെന്റിന് വിധേയമായ പ്രസിഡന്റിനെ പുറത്താക്കാൻ കോടതിയിൽ 6 ജസ്റ്റിസുമാർ അനുകൂലിക്കണം
 ഈ മാസം 3നാണ് യൂൻ സുക് യോൾ രാജ്യത്ത് പട്ടാള നിയമം പ്രഖ്യാപിച്ചത്. സമ്മർദ്ദം ശക്തമായതോടെ ആറ് മണിക്കൂറിനുള്ളിൽ പിൻവലിച്ചു
 14ന് യൂനിനെ പാർലമെന്റ് ഇംപീച്ച് ചെയ്തു. ഇതോടെ പ്രധാനമന്ത്രി ഡക്ക്-സൂ ആക്ടിംഗ് പ്രസിഡന്റായി
 പ്രതിപക്ഷം ഉത്തര കൊറിയയോട് അനുഭാവം പുലർത്തുന്നെന്നും ഭരണത്തെ അട്ടിമറിക്കാൻ ശ്രമിക്കുന്നെന്നും ആരോപിച്ചായിരുന്നു യൂൻ പട്ടാള നിയമം ഏർപ്പെടുത്തിയത്

 യൂനിന്റെ ഇംപീച്ച്മെന്റുമായി ബന്ധപ്പെട്ട ആദ്യ വാദം ഇന്നലെ ഭരണഘടനാ കോടതിയിൽ നടന്നു. 180 ദിവസത്തിനകം അന്തിമ തീരുമാനം. യൂനിനെ കോടതി പുറത്താക്കിയാൽ 60 ദിവസത്തിനുള്ളിൽ തിരഞ്ഞെടുപ്പ്

…