ജാപ്പനീസ് വാഹന നിർമ്മാതാക്കളായ കവാസാക്കി, 2026 മോഡൽ KLX 230 സീരീസ് ബൈക്കുകളുടെ ഇന്ത്യൻ നിർമ്മാണം ആരംഭിച്ചതായി അറിയിച്ചു. രാജ്യത്ത് നിർമ്മിക്കുന്ന ഈ മോഡലുകൾ ഉടൻ ഉപഭോക്താക്കളിലേക്ക് എത്തുമെന്നാണ് പ്രതീക്ഷ.
ബുക്ക് ചെയ്ത ഉപഭോക്താക്കൾക്കുള്ള ബൈക്കുകളുടെ വിതരണം വരുന്ന ആഴ്ചകളിൽ ആരംഭിക്കുമെന്ന് കമ്പനി വ്യക്തമാക്കി. ആറ് സ്പീഡ് ഗിയർബോക്‌സുള്ള 233 സിസി, എയർ-കൂൾഡ്, സിംഗിൾ-സിലിണ്ടർ എഞ്ചിൻ തന്നെയാണ് ബൈക്കിന് കരുത്തേകുന്നത്.
ഇത് 8,000 ആർപിഎമ്മിൽ 18.7 ബിഎച്ച്പി കരുത്തും 6,000 ആർപിഎമ്മിൽ 19 എൻഎം ടോർക്കും ഉത്പാദിപ്പിക്കുന്നു. എഞ്ചിനിൽ മാറ്റങ്ങളില്ലെങ്കിലും, സസ്പെൻഷൻ സംവിധാനം പരിഷ്കരിച്ചിട്ടുണ്ട്.
കൂടാതെ, ഡ്യുവൽ-ചാനൽ എബിഎസിന് പകരം സിംഗിൾ-ചാനൽ എബിഎസ് ആണ് പുതിയ മോഡലിൽ ഉൾപ്പെടുത്തിയിരിക്കുന്നത്. ബൈക്കിന്റെ ഡ്യുവൽ-സ്‌പോർട്‌സ് ഡിസൈൻ നിലനിർത്തിയിട്ടുണ്ട്.
സ്ലിം ഫ്രെയിം, മികച്ച നിയന്ത്രണം നൽകുന്ന റൈഡിംഗ് പൊസിഷൻ, ഓഫ് റോഡ് യാത്രകൾക്ക് അനുയോജ്യമായ ഫ്ലാറ്റ് സിംഗിൾ-പീസ് സീറ്റ് എന്നിവ ഇതിന്റെ പ്രധാന ആകർഷണങ്ങളാണ്. പൂർണ്ണമായും എൽഇഡി ലൈറ്റിംഗ്, ബ്ലൂടൂത്ത് കണക്റ്റിവിറ്റിയോടുകൂടിയ ഡിജിറ്റൽ എൽസിഡി ക്ലസ്റ്റർ തുടങ്ങിയ ആധുനിക സൗകര്യങ്ങളും ബൈക്കിൽ ഉൾപ്പെടുത്തിയിട്ടുണ്ട്.
2026 മോഡൽ KLX 230, ലൈം ഗ്രീൻ, ബാറ്റിൽ ഗ്രേ എന്നീ രണ്ട് പുതിയ നിറങ്ങളിൽ ലഭ്യമാകും. ഇന്ത്യയിൽ തന്നെ ബൈക്ക് അസംബിൾ ചെയ്യുന്നതിനാൽ ഇറക്കുമതി ചെലവുകൾ ഒഴിവാക്കാനും ആകർഷകമായ വിലയിൽ KLX 230 വിപണിയിലെത്തിക്കാനും കവാസാക്കിക്ക് സാധിക്കും.
കൂടാതെ, സ്പെയർ പാർട്സുകളുടെ ലഭ്യത ഉറപ്പാക്കുന്നതിനും വിൽപ്പനാനന്തര സേവനങ്ങൾ വേഗത്തിലാക്കുന്നതിനും ഇത് സഹായിക്കുമെന്ന് കമ്പനി പ്രതീക്ഷിക്കുന്നു. FacebookTwitterWhatsAppTelegram
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
